Grupi për Siguri dhe Barazi Gjinore (GSBGJ) ka dënuar vrasjen e vajzës 18 vjeçe e cila u soll pa shenja jete në Spitalin e Ferizajt të dielën. GSBGJ u ka bërë thirrje institucioneve përkatëse të marrin masa efektive për t’i hetuar në hollësi rrethanat që çuan në vdekjen e viktimës dhe, nëse konstatohet se ka pasur sjellje kriminale, të sjellin drejtësi për viktimën.
“Gjithashtu, GSBGJ u bën thirrje institucioneve përkatëse që të promovojnë dhe zbatojnë masa për parandalimin e dhunës me bazë gjinore”, kanë thënë nga ky grup në një komunikatë.
Sipas GSBGJ-së, ky rast duhet të trajtohet më tej në përputhje me Konventën e Këshillit të Evropës për parandalimin dhe luftimin e dhunës ndaj grave dhe dhunës në familje (Konventa e Stambollit), e inkorporuar në nenin 22, paragrafi 9, të Kushtetutës së Kosovës.
Për të siguruar mbrojtjen e grave nga çdo formë dhune, GSBGJ u bëri thirrje institucioneve që të marrin parasysh:
-Institucionet e Kosovës duhet të ndërmarrin veprime konkrete për të parandaluar dhunën kundër grave dhe vajzave, për t’i mbrojtur viktimat, për t’i ndjekur penalisht dhe dënuar kryerësit në përputhje me Konventën e Stambollit.
-Duhet të ndërmerren hapat e nevojshëm për përfshirjen e materialeve edukative për çështje të tilla si “barazia midis grave dhe burrave, rolet gjinore jo të stereotipizuara, respekti reciprok, zgjidhja e konflikteve në marrëdhëniet ndërpersonale në mënyrë jo të dhunshme, dhuna me bazë gjinore kundër grave dhe e drejta për integritet personal”.
Ndërkaq, ka shprehur shqetësim edhe për deklaratat në fazën paragjyqësore nëpër rrjete sociale, të cilave, “nuk duhet t’u jepet hapësirë apo të promovohen duke i shpërndarë më tej”.
GSBGJ është grup i përbërë nga shumë palë, i kryesuar nga UN Women.
© KOHA. Të gjitha të drejtat janë të rezervuara.
