“Luftë” deklaratash mes Ministrisë së Drejtësisë dhe Këshillit Prokurorial

“Në vitin 2016, konkretisht më 6 prill, ka hyrë në fuqi Ligji i ri për mjekësinë ligjore, me ç’rast janë ishin shfuqizuar të gjitha aktet nënligjore që kanë qenë të bazuara në ligjin paraprak. Në vitin 2017, Këshilli Prokurorial përmes një letre kishte njoftuar ministren e asaj kohe, Dhurata Hoxha se udhëzimi që rregullon kompensimin jashtë orarit të punës së ekspertëve mjekoligjorë kishte vazhduar të bazohet në ligjin që ishte shfuqizuar dhe jo në ligjin e ri të vitit 2016. Por ajo e kishte injoruar këtë letër dhe nuk kishte ndryshuar asgjë”, ka thënë ai.

Sallahu ka thënë se udhëzimi për kompensimin e punës jashtë orarit dhe pjesëmarrjen në seanca gjyqësore të ekspertëve mjekoligjorë është bazuar në Ligjin për Mjekësinë Ligjore të vitit 2010.

“Edhe pas transformimit ligjor, Këshilli Prokurorial ka vazhduar ndarjen e mjeteve financiare ne mënyrë të kundërligjshme për grupe të caktuara të ekspertëve mjekoligjorë me udhëzimin i cili është i bazuar në ligjin që është shfuqizuar. Kjo kundërligjshmëri është përsëritur vit pas viti deri sot nga viti 2016 dhe vlera që është kompensuar kundërligjshëm arrin shumën prej 785.000 eurosh të buxhetit të shtetit. Për këtë ka qenë në dijeni edhe KPK-ja, edhe ata që kanë përfituar jashtëligjshëm, por edhe ish-ministrja Dhurata Hoxha”, ka thënë më tej Sallahu.

Por krejt ndryshe e ka shpjeguar këtë situatë përmes një reagimi publik Këshilli Prokurorial i Kosovës.

Pretendimet e paraqitura nga zëvendësministri i Drejtësisë ndaj Këshillit Prokurorial i kanë quajtur të pabaza, dhe sipas tyre shpërfaqin mosnjohuri të thella profesionale me tendencën e vetme për të denigruar dhe goditur institucionin e pavarur.

“Edhe pse në konferencë u theksua se “me hyrjen në fuqi të këtij Ligji ishin shfuqizuar të gjitha aktet nënligjore që ishin bazuar në Ligjin paraprak”, ky konstatim nuk qëndron dhe kjo shpërfaq mosnjohuritë bazike, ligjore dhe profesionale të zëvendësministrit të Drejtësisë, duke dezinformuar mediat dhe opinionin, ngase në Ligjin nr. 05/L-060 për Mjekësinë Ligjore të vitit 2016, me asnjë dispozitë nuk shfuqizohet asnjë akt nënligjor”, thuhet në sqarimin për media të këtij institucioni.

KPK-ja pretendon që asnjë pagesë s’është e jashtëligjshme.

“Për hir të njoftimit të saktë dhe të drejtë të opinionit publik lidhur me pagesat e ekspertëve mjekoligjorë, ju njoftojmë se zbatohet Udhëzimi Administrativ i Qeverisë së Kosovës nr. 07/2013 për kompensimin e punës jashtë orarit dhe pjesëmarrjen në seanca gjyqësore të ekspertëve mjekoligjorë, ku në nenin 5 të tij obligohen Këshilli Gjyqësor dhe Prokurori i Shtetit që t’i bëjnë të gjitha pagesat për ekspertët e mjekësisë ligjore në bazë të tarifave të përcaktuara në udhëzim, të cilat ekzekutohen nga Ministria e Financave”, thuhet në këtë reagim.

Në konferencën për media është përmendur ish-ministrja Dhurata Hoxha, ani pse kanë qenë edhe tre ministra në këtë institucion pas saj. Por Hoxha ka deklaruar se këto ndryshime ligjore nuk ishin bërë në kohën e saj.

“Ligji ka hyrë në fuqi në prill të 2016-s, ndërsa unë jam emëruar në MD në korrik të 2016-s, ku menjëherë kemi filluar me hartimin e ligjeve dhe akteve nënligjore të cilat kanë qenë në agjendën legjislative. Sa i përket rastit në fjalë ka qenë pjesë e rishikimit funksional të sektorit të sundimit të ligjit, të cilin rishikim e kam iniciuar unë qysh në fillim të vitit 2017. Me gjithë vullnetin e madh dhe dëshirën për të përmirësuar kornizën ligjore, shpërbërja e Kuvendit dhe koha e shkurtër na kanë pamundësuar që t’i bëjmë këto ndryshime”, ka thënë ajo.

Sipas saj, prej vitit 2016 është dashur të adresohet kjo çështje.

“Shpresoj që ministrat që kanë ardhë pas meje kanë arritur t’i përmirësojnë këto zbrazëtira ligjore të cilat janë evidentuar dhe që po vazhdojnë të evidentohen. Pra, kanë qenë edhe tre ministra pas meje, duke përfshirë edhe ministren aktuale dhe të gjithë ata paskan pasur mosveprim atëherë, mirëpo vetëm emrin tim e paskan përmendur”, është shprehur ajo.

Përplasjet mes Këshillit Prokurorial dhe Ministrisë së Drejtësisë nuk janë të rralla. Para disa muajsh Këshilli Prokurorial i kishte konsideruar disa deklarata të ministres se Drejtësisë, Albulena Haxhiu, si ndërhyrje në punën e tyre e Haxhiu javën e kaluar ka thënë se nuk mund të bashkëpunojë me KPK-në përderisa nuk reagojnë në lidhje me incizimet e publikuara në media, që shpërfaqnin dyshimet se njerëz të këtij sistemi i kryenin favore një personi.

© KOHA Ditore

Fotolegjenda: Kompensimi i ekspertëve mjekoligjorë nga ana e Këshillit Prokurorial është arsyeja e një tjetër përplasjeje mes Ministrisë se Drejtësisë dhe Prokurorisë së shtetit. Rreth 800 mijë euro është dëmi që zëvendësministri i kësaj ministrie, Blerim Sallahu, pretendon se është bërë nga këto pagesa që, sipas tij, janë të

© KOHA. Të gjitha të drejtat janë të rezervuara.