Arbëri

MSH-ja pa masa të reja, me gjithë rritjen e rasteve të infektimit

Më se dyfish më shumë raste të reja të infektimit me koronavirus, krahasuar me një ditë më parë, janë regjistruar gjatë 24 orëve të fundit në Kosovë.

Sipas raportit ditor të MSH-së, një person ka vdekur dhe 221 kanë dalë pozitivë në Sars-Cov-2, shifër kjo më e larta që nga muaji prill.

Për Ministrinë, megjithatë, ajo nuk po konsiderohet aq alarmante, sa për rikthim dhe ashpërsim të masave.

Zëdhënësi i Ministrisë së Shëndetësisë, Faik Hoti, për KOHËN ka thënë se hapat e ardhshëm do të ndërmerren në varësi të situatës së krijuar.

“Çfarë hapash do të ndërmerren, do të varet nga ecuria e mëtejme e situatës epidemiologjike, do varet nga analiza e situatës që do i bëjë instituti dhe nga rekomandimet që do të jepen për Ministrinë e Shëndetësisë”, ka thënë Hoti.

Që nga maji i këtij viti, kur masat janë liruar, qytetarët nuk bartin maska, dhe as nuk respektohet distanca fizike. Në shumicën e vendeve të botës masat kanë nisur të rikthehen, duke e bërë të detyrueshme bartjen edhe jashtë të maskës. Edhe epiqendra e koronavirusit, Wuhani në Kinë, po përballet me rikthim të rasteve të infektimit me variantin Delta pas më shumë se një viti pa asnjë të infektuar lokal.

Gjithashtu, Ministria nuk paralajmëron as kushtëzime për personat që nuk vaksinohen dhe thotë se ata e rrezikojnë shëndetin e vet, duke shpërfillur kësisoj shpejtësinë e përhapjes së variantit Delta.

“Ata që nuk vaksinohen do t'i nënshtrohen rrezikut më të lartë për t'u infektuar dhe për t'u shtrirë në spital. Prandaj, qytetarët duhet të zgjedhin vaksinimin para çdo kufizimi, hezitimi apo mase tjetër që do t'i detyronte ata të vaksinohen kundër COVID-19”, ka shtuar Hoti.

Delta përfshin 70 për qind të rasteve të infektimit në Kosovë. Por, testimi për të ende nuk kryhet në vend. Nuk dihet as se kur do të krijohen kushtet për të. Madje, Kosova aktualisht, për shkak të problemeve me transport, as nuk mund të dërgojë mostra për testim jashtë vendit.

“Fatkeqësisht, kompania përgjegjëse për transportim të mostrave nga Kosova nuk po ka kapacitet dhe njohuri profesionale për këtë process të punës, kshu që tash jemi në diskutim me e gjet një kompani tjetër e cila do të transportojë mostrat”, ka thënë Xhevat Jakupi, drejtor i Departamentit të Mikrobiologjisë në IKSHPK.

Shtimi i rasteve e ka rritur edhe numrin e të infektuarve që kërkojnë ndihmë spitalore. U.d i drejtorit të Infektivit, Arben Vishaj, në emisionin SOT në KTV ka bërë të ditur se në mesin e të hospitalizuarve ka edhe persona të vaksinuar.

“Kemi tre pacientë të spitalizuar që ishin të vaksinuar, por e kemi vërejtur që pacientët e vaksinuar manifestojnë forma klinike më të lehta, e ata të pavaksinuar e sidomos në formë të shtyrë e me sëmundje kronike manifestojnë forma jashtëzakonisht të rënda”, ka pohuar Vishaj.

Sipas raportit të SHSKUK-së, në klinikat COVID në QKUK e spitalet e përgjithshme në Kosovë janë duke u trajtuar 107 pacientë, 64 prej tyre të konfirmuar pozitivë, ndërsa 72 janë me oksigjenoterapi e dy prej tyre në gjendje të rëndë shëndetësore.