3 perditesime
21:14

Vllasi: Edhe pse dialogu po zhvillohet në Bruksel, roli i SHBA-së do të jetë vendimtar

Ish-politikani dhe avokati Azem Vllasi, vlerëson se roli i SHBA-së në Kosovë e më gjerë është i pazëvendësueshëm.

Ai thotë se çdo fitore që ka arritur Kosova është bërë me ndihmën e SHBA-së.

Vllasi në një intervistë në Deskun e KOHËS, ka thënë se do të vijë një moment kur SHBA-ja vërtetë do të inkuadrohet në dialogun Kosovë – Serbi.

Sipas tij, SHBA-ja nuk inkuadrohet në dialog kur e fton Kosova, por kur e sheh të arsyeshme – në finale.

“Roli i Amerikës është i patjetërsueshëm. Prej që ka filluar kriza me shpërbërjen e Jugosllavisë, në fund roli vendimtar i Amerikës ka qenë vendimtar, si për ndërprerje të atyre tragjedive, për dizajnimin e hartës së re gjeopolitike në këtë rajon. Roli i SHBA-së ka qenë vendimtar edhe ne Kosovë. Duhet ta dimë se për çlirimin e Kosovës me intervenimin e NATO-s, ka qenë roli i Amerikës vendimtar, edhe për shpalljen e pavarësisë ishte njësoj. Prandaj, në dialogun në Bruksel, në një pikë të caktuar, do të jetë roli amerikan vendimtar për një stabilitet paqësor, për t’ia ulë kaçepin Serbisë, të mos i kërcënojë më fqinjët, të mos jetë më destablitet në rajon”, ka thënë Vllasi.

20:58

Vllasi: Serbia është faktor kryesor i destabilitetit rajonal

Azem Vllasi, njohës i rrethanave në vend e rajon, ka thënë se Serbia nuk i ka shuar synimet e veta për një Serbi të madhe, duke shtuar se ajo është bërë faktor kryesor i destabilitetit në rajon.

“Ne duhet të jemi të angazhuar gjithmonë për stabilitet, fqinjësi normale madje edhe me Serbinë. Mos të harrojmë as ne, as këto shtetet nga ish-jugosllavi rreth Serbisë, që Serbia nuk i ka shuar synimet e veta për një Serbi më të madhe se që është. Tash Serbia synon nëse mundet diçka të shkul nga Bosnja, Malin e Zi ta shkrijë, nëse mundet Kosovës nëse nuk mundet t’ia marrë ndonjë pjesë të territorit por ta mundë si shtet të brishtë. Serbia tash me ato synime të veta, kohëve të fundit haptazi është më agresive si faktor kryesor i destabilitetit regjionit dhe kërcënim i paqes në regjion”, ka thënë ai në Deskun e KOHËS.

Vllasi nuk sheh dallim në synimet e retorikën e pushtetarëve serbë aktualë nga Slobodan Millosheviqi dikur.

“Dallimi në retorikë, pretendime, synime, nuk është hiç dallim sepse këta janë këta që janë qenë në pushtet sepse janë nxënës të shkollës së Millosheviqit. Por, dallimi është i madh sepse Serbia nuk e ka atë potencial të rrezikshmërisë qysh e ka pasur në kohën e Millosheviqit”, përfundoi Vllasi.

20:53

Vllasi për dialogun: Me dje ka përfunduar “elaborimi historik”, duhet shikuar nga ardhmëria

Ish-politikani dhe njohësi i rrethanave në Kosovë e rajon, Azem Vllasi, ka folur për dy takimet e para të kryeministrit Albin Kurti me presidentin e Serbisë, Aleksandar Vuçiq, në kuadër të dialogut në Bruksel.

Vllasi në një intervistë në Deskun e KOHËS, tha se më këto dy takime, ka bindjen se ka përfunduar “elaborimi historik”, dhe se tash duhet shikuar përpara.

Vllasi iu referua kritikave që bëri Kurti në takim, duke akuzuar Serbinë për tri gjenocide ndaj shqiptarëve në 150 vjetët e fundit.

“Ka qenë e pritshme se nuk do të vazhdojë ashtu, se Z. Kurti do të ketë qasje tjetër. Nxjerr disa mësime, disa gabime që janë bërë deri më tash, por nuk është mirë të thotë se nuk është bërë asgjë deri më tash dhe duhet të fillojë nga fillimi. Nga marrëveshjet e deritashme, më e keqja ishte ajo për asociacionin. Me këtë qasje, Kurti e ka nervozuar Vuçiqin dhe mirë ka bërë. Historia nuk harrohet, por duhet t'i kthehet ardhmërisë, me këto dy takime, janë kryer këto elaborime historike. Nuk them se duhet të harrohen krimet, gjithnjë duhet të përkujtohen, por shikimi duhet të jetë përpara”, ka thënë Vllasi.

20:30

Vllasi: Propozimet e Kurtit duhet të jenë pjesë e marrëveshjes finale me Serbinë

Njohësi i rrethanave në Kosovë e rajon, Azem Vllasi, ka thënë se elementet e propozimit të kryeministrit Albin Kurti përballë palës serbe në Bruksel për dialogun, janë pjesë e marrëveshjes gjithëpërfshirëse.

Vllasi në Deskun e KOHËS ka thënë se palët duhet të përqendrohen në marrëveshjen finale dhe për asnjë çështje tjetër.

“Elementet e saj duhet të jenë pjesë përbërëse e marrëveshjes finale, gjithëpërfshirëse dhe për normalizimin e marrëdhënieve. Ka këtu elemente për ata marrëveshje. Por strategjia në biseda me Serbinë duhet të jetë, së pari jo biseda për Kosovës, por biseda mes dy shteteve për normalizimin e raporteve. Ka shumë elemente që duhet të përfshihen, disa janë në atë tekst që u parashtruan në takimin e fundit. E paramendoj atë marrëveshje që duhet të fillojë me zotimin e dy shteteve që marrëdhëniet e veta do t’i normalizojnë, çështjet e hapura do t’i zgjidhin në mënyrë paqësore”, ka thënë ai.