Aktivistë të Partisë Socialdemokrate kanë njoftuar se kryetari i kësaj partie do të mbahet në paraburgim pas aksionit të zhvilluar të premten.
Policia arrestoi tetë aktivistë të kësaj partie pas një aksioni që zhvilluan kundër “taksës ngjitëse” prej 5 eurosh për regjistrim të veturave.
Për këtë arrestim, PSD-ja ka akuzuar Qeverinë Kurti.
“Dhunë, në mbrojtje të monopoleve. Pas dhunës së kryepolicit Xhelal Sveçla, prokuroria vendos në paraburgim kryetarin e PSD-së Dardan Molliqaj. Kur ju doli afera e keqpërdorimit, tentuan të mbrohen duke gënjyer. Kur gënjeshtra u doli shpejt, dhunës i erdhi radha. Aktivistët u arrestuan brutalisht, për një aksion politik krejtësisht paqësor. Paralajmërim më të qartë nuk ka. Veç kush s'don me pa e me kuptu: Paratë do t'ia marrin shumicës (sundim i ligjit e formalitet), për t'ia dhënë pakicës (monopole e përqendrim i pasurisë). Kushdo që guxon me i kritiku, arrestohet brutalisht e burgoset. Ky pra është kombinimi i rrezikshëm i autoritarizmit me oligarkinë e pabarazinë”, ka shkruar në Facebook Frashër Krasniqi nga kjo parti.
13:20
Tetë të arrestuar në aksionin e PSD-së, Policia jep detaje
Policia e Kosovës ka arrestuar tetë aktivistë të Partisë Socialdemokrate, në aksionin e këtyre të fundit, të zhvilluar në rrugën “Ukshin Hoti” në Prishtinë.
Policia i ka thënë KOHËS se të arrestuarit kanë shkruar grafitë dhe kanë dëmtuar disa vetura zyrtare.
“Të njëjtit vazhdimisht kanë shfaqur shenja të agresivitetit, veprimeve të ulëta të kontaktit fizik me pjesëtarë të policisë, shpërfilljes së urdhrave të zyrtarëve policor si dhe pengim të tyre në kryerjen e detyrës zyrtare. Duke u gjendur në rrethana të tilla, policia ka shoqëruar në stacionin policor tetë prej tyre dhe aktualisht të njëjtit janë duke u proceduar në fazën preliminare”, thuhet në njoftimin policor.
Lidhur me këto veprime, është njoftuar prokurori që së bashku me Policinë po punojnë në zbardhjen e të gjitha rrethanave.
13:09
PSD: Arrestimi ishte brutal, të lirohen aktivistët
PSD ka reaguar lidhur me arrestimin e aktivistëve të saj në aksionin e sotëm. “Gjatë aksionit të sotëm për të shfaqur zhvatjen që pushteti i Kurtit po e bën ndaj qytetarëve, duke taksuar shtesë regjistrimin e makinës e duke krijuar monopol për një kompani, policia ndërhyri dhunshëm për ta ndërprerë aksionin duke arrestuar e lënduar brutalisht aktiviste e aktivistë të PSD-së.
Policia, nën urdhërat e Kurtit, me përdorim brutal të dhunës po dëshiron të shtyp këdo që kundërshton atë. Zhvatja ndaj qytetarëve nuk guxon të kaloj heshtur e nën kërcënimin e dhunshëm e brutal të pushtetit” është thënë në reagimin e PSD-së.
PSD ka kërkuar urgjentisht që aktivistet e aktivistët Dardan Molliqaj, Teutë Rrusta, Nol Nushi, Zgjim Hyseni, Qëndrim Sahiti, Frashër Krasniqi, Ali Krasniqi dhe Korab Korça të lirohen siç kanë thënë ata nga arrestimi i padrejtë.
12:26
Arrestohen aktivistë të PSD-së pasi shkruan në veturat zyrtare
Kundërshtimin e taksës prej 5 euro për regjistrimin e veturave përmes një aksioni e ka shprehur Partia Socialdemokrate. Kjo parti thotë se po zhvatet buxheti me këtë pagesë, përgjegjëse e së cilës është zgjedhur një kompani, sipas saj, pa konkurrencë.
“Mbi 2 milionë euro në vit një kompanie private. Pa konkurencë. Monopol. Çmim 5 fish më të shtrenjtë, 90% e të cilit është fitim për kompaninë. Kompani me 3 punëtorë. Arsyetimi? Skandaloz. E paska nisur qeveria e kaluar. Pra këta qenkan vetëm vazhdimësi, jo ndryshim. Këtë na e tha Hysen Durmishi dje. Këtë po e thotë Albin Kurti përditë”, thuhet në njoftimin e PSD-së.
Në veturat qeveritare, PSD-ja ka vendosur “tiketa” me mbishkrimin “zhvatës” dhe po ashtu edhe me sprej nëpër vetura.
Ndërkaq, pas aksionit Policia ka arrestuar Dardan Molliqajn dhe disa aktivistë të tjerë.
