1 perditesime
23:39

Berisha: Në QKMF-në e Deçanit kemi barna deri nesër, MSH-ja s’ka reaguar

Drejtori i QKMF-së në Deçan, Selmon Berisha, ka deklaruar se gjendja në QKMF-të e kësaj komune është e keqe pasi ka mungesë të barnave për pacientët e helmuar.

Berisha ka thënë në Interaktiv të KTV-së se në dispozicion kanë barna deri të martën, dhe se sipas tij, nëse nuk reagon Ministria e Shëndetësisë, rrezikojnë të kenë mungesë masive.

Ai ka shtuar se vazhdojnë të punojnë me ekipe të shtuara nëpër QKMF.

“Nëse shtohet një fluks i tillë, i pacientëve që vijnë me helmime, lutemi që të mos ndodh një gjë e tillë. Si pikë referente e kemi Spitalin Rajonal të Pejës, deri më tani i kemi 2 pacientë në Pejë. Janë njoftuar të gjitha inspekcionet e Kosovës. Është njoftuar prokuroria e shtetit, stacioni i policisë. Është krijuar një task-forcë që të dalim nga kjo gjendje në këtë endemi nëse mund ta quaj ashtu. Kemi pasur përkrahje nga IKSHPK që janë përgjigjur menjëherë”, ka potencuar ai.

Aktualisht janë të shtrirë 20 pacientë në QKMF e Deçanit që kanë shenja helmimi.

Berisha u ka bërë apel qytetarëve të Deçanit që të mos përdorin ujin e ujësjellësit dhe në rast se kanë ndonjë shenjë si helmim apo dhimbje stomaku, të lajmërohen në QKMF.

 

23:36

Në Deçan po rritet numri i pacientëve, nëse vazhdohet kështu duhet staf shtesë shëndetësor

Drejtori i Qendrës Kryesore Familjare në Deçan, Selmon Berisha, është i shqetësuar me rritjen e numrit të pacientëve që kërkojnë ndihmë si dhe me shtrirjen e hartës së fshatrave të prekura nga helmimi, që fillimisht është dyshuar se erdhi si pasojë e ujit të pijshëm.

Berisha në një intervistë në Interaktiv, tha se nëse vazhdon me këtë rritëm të numrit të pacientëve, atëherë do të kërkojë ndihmë nga institucionet për përkrahje me staf shëndetësor.

Sipas tij, pandemia në njëren anë, ikja e mjekëve për specializim në Prishtinë dhe jashtë vendit, si dhe tash ky rast me helmim, ka çuar në limit forcën e mantelbardhëve.

“Sonte, deri në orën 22:20, ishin 412 pacientë. Dje ishin 420, por që shumë prej tyre janë lëshuar për shtëpi. Më brengos fakti që numri po vazhdon të rritet, sikur që me brengos fakti se sot kishin pacientë edhe nga fshatra të tjera, nga ato që u paraqitën dje e që furnizohen me të njëjtin degëzim të ujësjellësit. Nëse vazhdohet kështu, duhet të kërkojmë nga institucionet ndihmë me staf shëndetësor”, ka thënë Berisha.

Ai tha se gjendja e pacientëve nuk është e rëndë, por është shqetësues numri në rritje.