Prej 15 qershorit të këtij viti, Qeveria e Kosovës kishte lajmëruar se do të fillonte vaksinimi masiv sipas planit shtetëror. E që nga ajo ditë asnjëherë nuk u arrit numri i premtuar, madje kohëve të fundit numri i të vaksinuarve brenda 24 orëve nuk po arrin ta tejkalojë 7-mijëshin.
Arsyeja e rënies së numrit të të imunizuarve po del të jetë hezitimi i qytetarëve për ta marrë vaksinën “AstraZeneca”, edhe pse kjo e fundit është e certifikuar nga organizatat ndërkombëtare të shëndetësisë, siç janë EMA evropiane, si dhe FDA amerikane.
KOHA ka provuar të kontaktojë me Ministrinë e Shëndetësisë, por ata nuk kanë kthyer përgjigje.
Ndërkohë ka ditë që koordinatori i Qendrës së Vaksinimit në Prishtinë, Niman Bardhi, nuk është duke dalë në konferencë për media.
Në sallën “1 Tetori” u pa një numër i vogël qytetarësh. Sipas tyre procesi po shkon me rregull.
“Në dozën e parë kam pasur dhimbje bukur shumë, nja dy ditë a tri, kom pasur njëfarë temperature të brendshme e m’kaloi ajo. Mirë, faleminderit, mirë m’kanë pritë”, ka thënë Nazmi Gerbeshi, qytetar i Prishtinës.
E Bedrie Rexha nga Prishtina ka bërë thirrje që të mos ketë hezitime për ta marrë vaksinën
“Herën e parë e kom marrë s’mka mundu hiç, tash e mora s’e ndjeva, shumë mirë jam. Duhet patjetër me e marrë, s’ka pse me u frikësu”, ka thënë Rexha.
Gjatë ditës së hënë, zëvendësministrja e Shëndetësisë, Dafina Gexha-Bunjaku, dhe drejtori i Institutit Kombëtar të Shëndetësisë Publike, Naser Ramadani, janë imunizuar kundër COVID-19. Të dy kanë bërë thirrje tek qytetarët që të vaksinohen.
Ditë më parë ishte imunizuar edhe ministri i Shëndetësisë, Arben Vitia, i cili kishte bërë po të njëjtën thirrje. Sipas njoftimit të MSH-së, në 24 orët e fundit janë dhënë 6361 doza të vaksinës. Pesë raste kanë rezultuar pozitive nga testimi i 1050 mostrave dhe 6 persona janë shëruar. Numri i rasteve aktive në nivel vendi është 131.
© KOHA. Të gjitha të drejtat janë të rezervuara.
