Hodaj: Do të na ndihmonte një opinion i Komisionit të Venecias për vetingun

Avokati Taulant Hodaj, ka thënë se një opinion i Komisionit të Venecias do ta ndihmonte shumë Kosovën në procesin e vetingut.

Hodaj ka thënë se ndonëse qeveria është munduar të gjejë një zgjidhje, ndryshimet kushtetuese janë të vështira, ose edhe të pamundura.

“Mendoj që një opinion paraprak nga Komisioni i Venecias do të ishte ndihmesë në këtë drejtim. Është një përpjekje e mirë ligjore që të mund të procedohet më tutje me veting pa ndryshime kushtetuese. Ka gjyqtarë jashtëzakonisht dhe prokurorë të dobët, ata do të duhet domosdo të bien pjesë e kësaj rrjete. Kam kritikat e mija edhe në raport me avokatët. Çdo mënyrë tjetër që i eliminon dembelat dhe joprofesionistat është e mirë”, ka thënë Hodaj.

Ai ka thënë se vetingu në Kosovë duhet të zhvillohet pa hakmarrje politike ose personale dhe se sipas tij, Shqipëria është një shembull i mirë në këtë drejtim.

Ehat Miftaraj nga IKD ka kritikuar Qeverinë në krye me Albin Kurti lidhur me shuarjen e Task-Forcës Kundër Korrupsion nga ish-kryeministri Avdullah Hoti. Në Deskun e KOHËS Miftaraj ka thënë se pavarësisht se e patën kritikuar Vetëvendosja sa ishte në opozitë këtë vendim, tash nuk është marrë asnjë vendim.

“Ua shoh shumë për të madhe se flasin për luftën kundër korrupsionit, çkapje të shtetit, por pse 100 ditëshin e parë nuk e anuluan vendimin e ish-kryeministrit Hoti për Task-Forcën Kundër Korrupsion. Arsyetimi i Hotit ishte se është kundërkushtetues, IKD-ja ka thënë se është kundër ligjore, është kapje e shtetit, është qëllimi të mbyllen një kallaballëk raste që kanë qenë në task forcë ku kanë qenë të përfshirë LDK, AAK, PDK, etj”, ka thënë ai.

“Edhe VV-ja në atë kohë ishte e zëshme dhe e kritikoi një vendim të Hotit, sot, ende nuk kemi vendim për atë task-forcë. Tash ajo task-forcë është kthyer në një njësi hetuese të veçantë”.

Avokati Taulant Hodaj, ka thënë se në Kosovë ka mosbesim të madh në sistemin e rregullt juridik prandaj vetingu duhet të zhvillohet pa hakmarrje politike dhe personale.

Hodaj ka thënë në “Desku” të KTV-së se vetingu si proces duhet të jetë i rregullt, i besueshëm për qytetarët dhe i përkrahur nga miqtë ndërkombëtarë.

“Ka një mosbesim total në sistemin e rregullt juridik të Kosovës. Në këtë drejtim mendoj që është koha për veting, por për një veting të mirë analizuar, mos të ketë hakmarrje politike, mos të ketë hakmarrje personale. Kemi Shqipërinë një shembull të pasur që të mësojmë nga pengesat. Duhet të bëjmë një proces të rregullt, të besueshëm për qytetarët dhe të përkrahur nga miqtë tanë ndërkombëtar”, ka thënë Hodaj.

Ai ka folur edhe për konfiskimin e pasurisë së pajustifikuar duke thënë se kjo duhet të shkojë paralel me procesin e vetingut.

“Këto janë të ndërlidhura, të jenë në mënyrë paralele, apo pjesë e paketës së re të vetingut, vetëm nëse shihet që është e pamundur të shkohet përpara me ndryshime ligjore atëherë mund të bëhet një lloj kamuflazhe dhe të bëhet më e mira e mundshme në kuadër të mundësive. Ndryshimet kushtetuese nuk shihet se mund të bëhen. Nëse nuk ka gatishmëri, do të shkohet me ndryshime ligjore por ndryshimet ligjore janë shumë diskutabile”, është shprehur avokati Hodaj.

Ehat Miftaraj nga Instituti i Kosovës për Drejtësi ka thënë se propozimi i Qeverisë Kurti për një ligj të ri për konfiskim të pasurisë së pajustifikueshme është ende herët të ndodhë. Në anën tjetër, iniciativën për veting në sistemin e drejtësisë e ka cilësuar si mënyrë të duhur për të kthyer besimin e qytetarëve në sistemin e drejtësisë.

Sipas tij, me këtë ligj “po ofrohet një rrugë e tretë e më e shkurtër për t’u kthyer te gjyqësori i njëjtë që themi se është i kapur e s’po i ushtron kompetencat që i ka me ligj”.

“Kosova nga viti 2013 e ka inkorporuar në Kodin Penal sistemin tradicional të sekuestrimit të pasurisë së fituar në mënyrë të kundërligjshme. Me ngritjen e aktakuzës, prokurori si pjesë të saj duhet të identifikojë pasurinë e fituar në mënyrë të tillë dhe më pas bëhet kërkesë për konfiskim. Efikasiteti lidhet me mungesën e profesionalizmit dhe guximit të prokurorëve që të ushtrojnë kompetencat në bazë të ligjit. Në bashkëpunim me BE-në, u bë edhe Ligji për kompetencat e zgjeruara për konfiskimin e pasurisë së fituar përmes veprës penale. Përmes këtij ligji i është dhënë mundësi e re që prokurori një të dënuari për vepër penale, për periudhë të caktuar kohore t’ia identifikojë pasurinë dhe pasurinë e dërgon në gjykatë e i pandehuri duhet ta vërtetojë si e ka fituar. Kur të dyja kanë dështuar po duam rrugë të tretë të shkurtër e të kthehemi te i njëjti gjyqësor që themi se është i kapur e s’po i ushtron kompetencat që i ka me ligj”, ka thënë ai në emisionin “Desku” në KTV. “Kanë dështuar mekanizmat nga të njëjtit njerëz, pse duhet të punojë me ligj të ri?”

Miftaraj ka thënë se kushtet e punës në sistemin e drejtësisë në vend janë në nivel shumë të mirë.

© KOHA. Të gjitha të drejtat janë të rezervuara.