Nuk do të shtyhet përpara iniciativa për shndërrimin e Listës Guxo në subjekt politik, të paktën jo në zgjedhjet lokale të këtij viti. Kështu kanë thënë zyrtarë të këtij subjekti, të cilët aktivitetin partiak do ta vazhdojnë në kuadër të Lëvizjes Vetëvendosje.
Nuk do të shtyhet përpara iniciativa për shndërrimin e Listës Guxo në subjekt politik, të paktën jo në zgjedhjet lokale të këtij viti. Kështu kanë thënë zyrtarë të këtij subjekti, të cilët aktivitetin partiak do ta vazhdojnë në kuadër të Lëvizjes Vetëvendosje.
Deputeti Haxhi Avdyli ka thënë se edhe për zgjedhjet lokale do të vihet në funksion pika e marrëveshjes Kurti-Osmani, e nënshkruar në janar të këtij viti.
“Për modalitetet e këtij bashkëpunimi në komuna të veçanta jemi në diskutim se si do të jetë ai- si do të jetë pjesëmarrja jonë në listat për asamble, në pushtetin e drejtorive e pozita të tjera. Për këto ende nuk kemi një marrëveshje konkrete se si, ka kohë ende, por edhe në këto zgjedhje lokale do ta kemi bashkëpunimin me LVV-në. Derisa bashkëpunimi ynë në nivel qendror ka shkuar shumë mirë dhe po funksionon, besoj se dhe në pushtetin lokal ky bashkëpunim do të vazhdojë tutje”, ka thënë ai për KOHËN.
Në mbledhjen e Këshillit të Përgjithshëm, të dielën, Kurti ka përmendur edhe synimin që të bashkëpunojnë me Listën Guxo.
këto zgjedhje lokale jo vetëm që jemi të gatshëm, por edhe synojmë, që të bashkëpunojmë me Listën Guxo, sikurse për zgjedhjet parlamentare të 14 shkurtit. Kemi dëshmuar sinqeritet e seriozitet me punë e aktivizëm të përbashkët, një model suksesi përmes efektit sinergjik, të cilin e kemi për detyrë ta kultivojmë e ta forcojmë”, ka theksuar Kurti.
Kur diskutohej për votimin e presidentes në këmbim të pjesëmarrjes së LDK-së në votim kishte dalë kërkesa që themeluesja e Listës, Vjosa Osmani, të zotohet se nuk angazhohet për formimin e partisë së re. Kjo për shkak të frikës së do të prekej elektorati i LDK-së, parti kjo që e kishte përjashtuar Osmanin nga Kryesia e saj.
Por Avdyli thotë se arsyeja e vërtetë është fakti se më të fuqishëm janë nëse garojnë bashkë me VV-në.
“Nuk e shohim patjetër që të garojmë vetë. Besoj që përmes një bashkëpunimi me Vetëvendosjen do ta arrijmë efektin e fitores dhe impaktin tonë edhe në pushtet lokal. Prandaj e shohim si një lloj mundësie më të mirë garimin e përbashkët, në mënyrë që ta kapitalizojmë fitoren e përbashkët që do të ndodhë edhe në zgjedhjet lokale”, ka deklaruar Avdyli.
Në zgjedhjet e 14 shkurtit, gjashtë deputetë nga grupimi që u shkëput prej LDK-së siguruan ulëse në Kuvend brenda listës së Vetëvendosjes.
Pa e zyrtarizuar asnjë emër të kandidatëve për kryetarë të komunave, lideri i LVV-së, Albin Kurti, ka thënë se synim i partisë është që të fitohet një pjesë e madhe e komunave pa balotazh.
Por ka dhënë sinjale se partia që ai drejton po përballet me përçarje të brendshme për shkak të emrave të mundshëm për garën lokale. Ai ka dërguar porosi që askush nuk mund të vetëshpallet kandidat, e edhe ata që do të udhëheqin me komuna nuk mund të qeverisin me miqtë e tyre.
“Fushatat negative duhet të ndalen, ashtu siç duhet të ndalen edhe vetëshpalljet apo vetëkandidimet, si dhe pretendimet që dikush ka mbështetje nga niveli i tretë apo nga Kryesia e Lëvizjes. Mbështetja jepet vetëm në mënyrë statutore, demokratike dhe institucionale, nuk është mbështetje një fotografi, apo një takim diku”, ka thënë Kurti.
Zgjedhjet lokale do të mbahen më 17 tetor, ndërkaq afati për aplikim të subjekteve politike për t’u certifikuar për pjesëmarrje në zgjedhje është deri më 16 gusht.
© KOHA. Të gjitha të drejtat janë të rezervuara.
