1 perditesime
23:23

Hoxha: Në kushte normale Kastrati e Dugolli duhej të përjashtoheshin nga UP-ja

Koordinatori i Organizatës për Rritjen e Cilësisë në Arsim (ORCA), Dibran Hoxha, ka thënë se në kushte normale, profesorët Ardian Kastrati e Bujar Dugolli, do të duhej të përjashtoheshin nga Universiteti i Prishtinës për plagjiaturë.

Hoxha në Interaktiv të KTV-së ka thënë se 70 për qind e punimit të tyre ka dal se është plagjiaturë.

“Unë besoj që në universitete tjera prestigjioze, por edhe në universitete tona, përveç diskreditimeve publike, ata duhet me u ndëshku qoftë me suspendim, e në rastin më optimal me përjashtim nga Universiteti i Prishtinës. Kjo do të ndodhte në universitete tjera. Këshilli i etikës ka bazë ligjore me adresu çështje e nëse nuk gaboj e ka rregulloren për masa disiplinore”, ka thënë Hoxha.

23:07

Hoxha: 70% e punimit të Bujar Dugollit e Ardian Kastratit është plagjiaturë

Dibran Hoxha, koordinator në Organizatën për Rritjen e Cilësisë në Arsim (ORCA) ka thënë se deri të zbulimi se punimi i profesorëve universitarë Bujar Dugolli e Ardian Kastrati është plagjiaturë, ka ardhur pas një denoncimi anonim që ka shkuar në adresë të tyre.

Hoxha ka thënë në “Interaktiv” të KTV-së, se me të marrë këtë informatë, e kanë bërë detektimin e punimit përmes platformes ndërkombëtare anti-plagjiaturë Turnitin, dhe ka dalë se punimi është 70% plagjiaturë.

“Në fillim të këtij viti kemi pranuar një denoncim anonim ku tregohej se një punim i Ardian Kastratit dhe Bujar Dugollit kanë elemente të plagjiaturës. Me të marrë këtë informim kemi shikuar për ta konfirmuar dhe ka dalë se 70% e punimit është i ngjashëm me burime të tjera. Burimi dhe sasia e ngjashmërisë nuk do të thotë domosdo që ka plagjiaturë, nëse ka referenca. Mirëpo shumica e tekstit të këtyre profesorëve universitarë është kopjim pa referencim, pa kurrfarë citimi në tekst. Po flasim për një punim që është 8 faqesh. Pjesa e hijezuar me të verdhë edhe komplet kopjim pa kurrfarë reference”, ka thënë Hoxha.

Sipas tij, këto punime u kanë shërbyer atyre për tu avancuar në grada akademike në Universitetin e Prishtinës.