1 perditesime
Arbëri

Di Maio e quan avanturizëm politik ridizajnimin e kufijve në Ballkan

Di Maio e quan avanturizëm politik ridizajnimin e kufijve në Ballkan
Foto: Alban Bujari \ KOHA
18:55

Di Maio e quan avanturizëm politik ridizajnimin e kufijve në Ballkan

Ministri i Punëve të Jashtme dhe Bashkëpunimit Ndërkombëtar të Italisë, Luigi Di Maio, para deputetëve të Kosovës tha se nuk e mbështesin aspak idenë e ridizajnimit të kufijve në Ballkan, duke thënë se e kanë parë me shqetësimin ringjalljen e presioneve nacionaliste, raporton Ekonomia Online.

“Kemi parë me shqetësim ringjalljen e presioneve nacionaliste dhe thirrjeve okulte që synojnë ridizajnimin e kufijve në rajon dhe vënien në dyshim të integritetit territorial të disa vendeve. Ne hedhim poshtë këto provokime me vendosmëri absolute, por në të njëjtën kohë duhet të jemi të vetëdijshëm se vetëm një perspektivë konkrete evropiane është në gjendje të shfuqizojë rifillimin e nacionalizmit ashtu edhe një avanturizëm të caktuar politik që do të donte të kthente Ballkanin 30 vjet pas. Sfida ndaj të cilës është e thirrur të përgjigjet BE-ja është rikthimi i besueshmërisë”.

Tutje ai inkurajoi deputetët kosovarë që ta çojnë përpara dialogun me Serbinë dhe të arrijnë një marrëveshje sa më shpejt.

“Uroj që ky Kuvend të interpretojë këtë linjë ndryshimi dhe të punojë me unitet të plotë, që të shikoni përpara duhet të identifikoni problemet dhe të gjitha dhimbjet e Kosovës. Integriteti territorial i Kosovës nuk është në diskutim asnjëherë, Italia inkurajon që të dyja shtetet të çojnë diskutimin përpara për të hapur një fletore të re dhe të pastër për një paqe të përbashkët”, përfundoi ai.

Di Maio vë në pah mos liberalizimin e vizave, duke thënë se BE-ja është dritëshkurtër në rastin e Kosovës.

“BE nganjëherë është dritëshkurtër në rastin e Kosovës, ku ende qytetaret nuk gëzojnë vizat edhe pse i kanë plotësuar të gjitha kërkesat. Italia do vazhdojë të luftojë në mënyrë që përparimi i të gjitha vendeve të përkthehet në një progres me Evropën, sepse ne mbështetemi nga shumë vende. Krimi dhe korrupsioni janë plagë të vërteta që shkaktojnë mos besim, kjo është një sfidë strukturore në tërë rajonin, ku viktimat janë brezat e rinj”, deklaroi ai./EO

18:12

Di Maio: Kosova gjithmonë mund të mbështetet tek Italia

Ministri i Jashtëm i Italisë, Luigi di Maio, në fjalimin e tij para deputetëve të Kosovës, ka thënë se Kosova mund të mbështetet çdoherë tek vendi i tij.

Di Maio është për vizitë në Kosovë dhe kjo është e treta prej se ka marrë postin e të parit të diplomacisë italianë më 2019.

“Për mua është nder t’i drejtohem këtij kuvendi që përfaqëson demokracinë më të re në Evropë. Italia gjithmonë i ka qëndruar afër dhe këtë e dëshmon vizita ime, që është e treta në Kosovë që nga 2019. Në të gjitha takimet kam kuptuar entuziazmin e plotë dhe të sinqertë për bashkëpunimin tonë. Ju e dini se mund të mbështeteni plotësisht tek Italia. Italia e ka dëshmuar këtë, që nga fillimi më 12 qershor 1999, kur ushtarët tanë hynë në Kosovë. Që nga atëherë vazhdojmë të ruajmë sigurinë në këtë vend. Historia ka treguar se ajo që ndodh në këtë pjesë, ka pasoja të menjëhershme në Evropë dhe në vendin tonë padyshim”, ka thënë Luigi di Maio para deputetëve.