Hoxha: U humbën miliona euro me moszgjedhjen e komisioneres për Informim e Privatësi
23:17
Hoxha: U humbën miliona euro me moszgjedhjen e komisioneres për Informim e Privatësi
Erblin Hoxha nga Lëvizja FOL ka kritikuar mënyrën se si është zgjedhur komisionierja për Informim dhe Privatësi. Ai, në një intervistë në Interaktiv, ka thënë se është mirë që ky proces ka përfunduar dhe se pozita më nuk është vakante, por ka kritikuar punën e komisionit përkatës parlamentar për mostransparencë.
Hoxha ka thënë se Kosova për dy vjet sa ishte pa zyrtar në këtë pozitë ka humbur miliona euro.
“Ne kemi pasur vërejtje jashtëzakonisht të mëdha për procesin, për transparencën. Për herë të parë bëhet një vlerësim ku ne nuk e dimë cili prej anëtarëve të komisionti voton, me sa pikë për cilin kandidat, ka qenë një fshehtësi e mënyrës së votimit që për ne ka qenë shqetësuese dhe një praktikë e paparë më herët. Kandidatja është votuar në Kuvend, ka qenë e vlerësuar edhe nga britanikët para 2 e 3 viteve, edhe nga komisionet e mëhershme. Në praktikë kur e shohim tash, i kemi humbur dy vite e shumë miliona euro, sidomos vitin e kaluar për mos mundësinë e zgjedhjes së kësaj pozite, që ka qenë edhe një prej kushteve të BE-së. Tash jemi kthyer në pikën zero”, ka thënë Hoxha.
Komisionere për Informim dhe Privatësi është zgjedhur Krenare Sogojeva – Dermaku.
22:58
Hoxha: Qeveria Kurti ende nuk ka plan të saktë për prioritetet e saj
Erblin Hoxha nga Lëvizja FOL ka folur për 100 ditëshin e parë të Qeverisë Kurti. Ai ka thënë se muajin e parë kishte intensitet të ulët të punës së Qeverisë, e që sipas tij, mund të arsyetohej edhe për shkak të moskompletimit të stafit qeverisës.
Ai ka thënë se ende nuk ka një plan të saktë të Qeverisë Kurti se çfarë planifikon të bëjë këtë vit.
Hoxha për procesin e vettingut ka thënë se deri tash është pjesa e draftimit dhe është duke marrë pjesë një numër i madh i akterëve.
Ai ka thënë se dje e kanë pranuar draftin e parë dhe për 10 ditë grupet punuese do të japin komentet.
“Unë mendoj që është herët me bë një vlerësim të tillë, por ka vullnet që këtë proces ta bëjë me ndryshime kushtetuese. Duhet të jetë vetting i thellë”, ka thënë ai.
