Komisioni Qendror i Zgjedhjeve, të enjten, ka miratuar planin operacional për organizimin e zgjedhjeve lokale, që do të mbahen më 17 tetor.
Në planin me 11 pika, janë edhe disa që kanë të bëjnë me votuesit jashtë vendit.
Në pikën 7, thuhet se afati për aplikim të votuesve jashtë vendit është nga 10 korriku deri më 18 gusht, pra një muaj e një javë, ndërkohë në pikën 8, thuhet se votimi përmes postës do të bëhet nga 15 shtatori deri më 15 tetor, dy ditë para mbajtjes së zgjedhjeve.
Në zgjedhjet e fundit, ato qendrore të mbajtura më 14 shkurt, afati për regjistrim dhe dërgim të votës me postë ishte shumë më i vogël.
Shumë prej votave në Kosovë erdhën me postë të shpejtë.
Fushata zgjedhore do të zgjasë një muaj 16 shtator – 15 tetor, ndërkohë afati për aplikim të subjekteve politike për certifikim nis qysh sot dhe mbaron më 16 gusht.
Mbledhja e sotme, ishte e para nën drejtimin e kryesuesit të ri të KQZ-së, Kreshnik Radoniqi, që zëvendësoi Valdete Dakën e shkarkuar të hënën.
© KOHA. Të gjitha të drejtat janë të rezervuara.
