Organizata dhe aktivistë po kërkojnë që të mos procedohet në seancë plenare votimi i Komisionerit për Informim dhe Privatësi.

Kjo për shkak të kandidatit Enver Bujarit, që sipas tyre, ai nuk ka ofruar dokumentin që dëshmon mbi përvojën e punës siç është kërkuar me konkurs dhe ligj, por vetëm raportin e Trustit Pensional.

Për këtë pozitë kërkohet që kandidatët të kenë, së paku tetë vite përvojë pune profesionale, nga të cilat, së paku pesë vite përvojë në pozita udhëheqëse.

Në një komunikatë të përbashkët të shoqërisë civile është thënë se në mungesë të këtyre dëshmive, deputetët e panelit intervistues - të përbërë nga Lëvizja Vetëvendosje dhe partitë tjera në pushtet- nuk është dashur që të ftonin Bujarin fare në intervistë, ndërsa kanë bërë përgjegjës deputetë konkretë.

“Përgjegjësia për të kontrolluar dosjen i takon deputetëve të panelit intervistues. Për këtë dështim, ne mbajmë përgjegjës këta deputetë: Fatmir Humolli, Shqipe Mehmeti Selimi, Mefail Bajqinovci, Enver Dugolli dhe Arbër Rexhaj nga Lëvizja Vetëvendosje, Erxhan Galushi dhe Lëvizja Përparimtare e Romëve të Kosovës dhe Slavko Simić nga Lista Serbe”.

Tutje sqarojnë se Ligji për Mbrojtjen e të Dhënave Personale kërkon që seancës plenare t’i paraqiten tre kandidatë, e se “pavlefshmëria e aplikimit të Bujarit lë në garë vetëm dy kandidatë, në kundërshtim me ligjin në fjalë”.

Ndërkaq, këtë proces e kanë vlerësuar si me më së shumti parregullsi, duke filluar nga përbërja e panelit në kundërshtim me praktikën parlamentare, jotransparencë gjatë vlerësimit të kandidatëve dhe vlerësimi i lartë i kandidatit që nuk ka performuar më së miri në intervistë.

Kërkesa është bërë nga Lëvizja FOL, GLPS, KDI, KCSF, Çohu, D4D, GAP dhe aktivistes Flutura Kusarit.

KOHA pati raportuar për kandidimin e Enver Bujarit në pozitën e Komisionerit për Informim dhe Privatësi dhe pati siguruar CV-të ku ai tri herë që ka konkurruar, ka dorëzuar CV të ndryshme.