Basha rizgjidhet kryetar i Partisë Demokratike në Shqipëri
14:47
Basha rizgjidhet kryetar i Partisë Demokratike në Shqipëri
Lulzim Basha është rizgjedhur kryetar i Partisë Demokratike.
Kryetari i Komisionit Zgjedhor në PD, Jemin Gjana, zyrtarizoi rezultatin e votimeve të një dite më parë.
“Bazuar në të dhënat zyrtare rezulton se nga 75.067 anëtarë kanë votuar 41.097 anëtarë. Vota të pavlefshme 413; vota të vlefshme 40.684. Kadilli 781 vota, Edith Harxhi 901 vota, Shehaj 6.038, ndërsa Lulzim Basha ka marrë 32.882 vota”, tha ai.
09:24
Sot shpallet fituesi i garës për kryetar të PD-së
Sot do të shpallen rezultatet e zgjedhjeve të djeshme për kryetar partie në Partinë Demokratike të Shqipërisë.
Sipas rezultateve paraprake, Lulzim Basha do të sigurojë mandatin e tretë si kryetar i partisë së dytë, më të madhe në vend.
Të dhënat e deritanishme bëjnë të ditur se Basha ka fituar 81 për qind të votave.
Të drejtën e votës e kanë shfrytëzuar 41,095 anëtarë të partisë, ose 54.7 për qind.
Nga 40,674 vota të vlefshme, 32,882 vota kanë qenë për kryetarin aktual të PD-së, Lulzim Basha, i ndjekur nga Agron Shehaj me 6,038 vota. Kandidati tjetër, Edith Harxhi ka qenë i treti në listë me 991 vota, ndërsa Fatbardh Kadilli me 763 vota./KSP
