LDK-ja paralajmëron “risi” në kandidaturat për zgjedhjet lokale: Përparim Rama është apolitik

Kryetari i Lidhjes Demokratike të Kosovës, Lumir Abdixhiku, ka paralajmëruar kandidatura risi në zgjedhjet lokale të vjeshtës, ndërsa ka thënë se kandidati i partie për të parin e Prishtinës, Përparim Rama, është apolitik.

“Ai është pjesë e LDK-së në këtë garë. Është pjesë e jona dhe jam krenar për këtë punë, por duhet ta kuptoni që Përparim Ramën s’e kemi sjellë këtu e as s’ka ardhë që të merret me dialog. Ai s’merret me politikë prandaj është apolitik. Përparim Rama merret me kryeqytet. S’do ta dëgjoni të flasë për dialog, për liberalizim e konfliktet në Lindjen e Mesme. Do ta dëgjoni si ta rregullojë transportin në Prishtinë, parkingjet, hapësirat publike, lagjet e hapësirat gjelbëruese. S’ka mu marrë fare me politikë. Është njeri i kryeqytetit prandaj është zgjidhja më e mirë”, ka thënë ai në një debat të organizuar nga Lëvizja FOL.