3 perditesime
10:21

Përplasje mes Bislimit e Kastratit, PDK-ja e lëshon mbledhjen

Në Komisionin për Integrim Evropian janë përplasur verbalisht deputeti i PDK-së, Ardian Kastrati dhe zëvendëskryeministri Besnik Bislimi.

Kastrati e ka akuzuar Lëvizjen Vetëvendosje për tradhti të shumëfishtë ndaj vendit.

“E dimë se nga lideri juaj suprem kanë ndodhur disa akte të tradhtisë kombëtare. Së pari me Rambujenë, me pakon Ahtiaasri ku vdiqën dy vetë, pastaj me Bashkimin Kombëtar, me reciprocitetin dhe akti i pestë po vjen këto ditë. Ju si duket nga ajo që unë kam informata mezi po prisni të fusni një parti në zgjerimin e koalicionit për të marrë vulën e përgjegjësisë në ato ofertat që po u vijnë juve në tavolinë për dialogun ose të dërgoni vendin në zgjedhje. Ky është akt i tradhtisë i radhës i liderit tuaj suprem. Çka keni me bo me negociatat me Serbinë cila ka me qenë qasja juaj me BE-në dhe SHBA-në? Çfarë do të bëni me ofertat që i keni në tavolinë për dialogun çka do tu bëni atyre. Hajde tash, nisja shpjegoje”, ka thënë Kastrati.

Bislimi i ka thënë Kastratit që nuk dinë asgjë, duke ja përmendur edhe largimin nga pozita e referentit në universitet.

“Ti fjalimin e nise me ‘e dimë’, ti nuk mundesh me ditë se sa e çka dimë ne, por nga ajo që e the u kuptua se ti nuk din asgjë. Dhe, je pikërisht ai Ardiani që e kemi larguar nga puna e referentit para 10 vjetëve, për këtë arsye, pra e ke ruajtur atë konsistencë”, ka thënë ai.

Kastrati tutje i është përgjigjur duke i thënë se në pozitën që Bislimi është “ka mbërritur si parashutist”.

“Administrata jepja një paracetamol ose çka prijnë këta të Vetëvendosjes”, ka thënë ai.

PDK-ja e ka lëshuar mbledhjen.

10:03

Bislimi thotë se pos Holandës e Francës, edhe Belgjika është skeptike për liberalizimin e vizave

Zëvendëskryeministri Besnik Bislimi ka folur edhe për liberalizimin e vizave. Ai ka thënë se jozyrtarisht edhe Belgjika ka shprehur brengat e saj lidhur me liberalizimin e vizave.

Ai tutje ka thënë se liberalizmi nuk ka të bëjë asgjë me vendet mosnjohëse sepse sipas tij, shtetet të cilat janë ende skeptike janë ato që e kanë njohur Kosovën por kanë problem me faktin që avancimi i vendit kundër korrupsionit nuk ka qenë i duhur.

“Pra, adresimi i kësaj nuk ka të bëjë me faktin që disa shtete janë mosnjohëse. Problemi më i madh ka të bëjë me brengat që ka Ministria e Punëve të Brendshme e Francës dhe ministri i Punëve të Brendshme, Xhelal Sveçla ka nisur kontaktet me MPB-në në Francë për të dëshmuar që ka seriozitet në luftën kundër korrupsionit. Një nga vendet që është thënë se ka vërejtje është edhe Holanda, po ashtu Ministria e Punëve të Jashtme është në kontakt me ta që t’i bind se Kosova ka realizuar obligimet e marra. Jozyrtarisht na është thënë se ka brenga edhe nga Belgjika. Ndonëse nga kryeministri i Belgjikës zyrtarisht na është deklaruar se do ta përkrahin Kosovën në liberalizimin e vizave”, ka thënë ai.

09:55

Bislimi lavdëron veten, thotë se i tejkaloi pritjet për raportim rreth dialogut

Zëvendëskryeministri Besnik Bislimi, drejtuar deputetëve në Komisionin për Integrimeve Evropiane, ka thënë se nuk po e kupton akuzën e tyre për mostransparencë në dialog.

Drejtuar deputetes së PDK-së, Blerta Deliu, ajo ka thënë se janë informuar nga përfaqësuesit e tyre të mëhershëm për hapat në dialog.

“Ende pa fillu procesi i dialogimit të mirëfilltë unë i kam përmbushur pritjet për raportim, madje më shumë se që keni pritur ju. Kam bërë informim prej shtatë faqesh ende pa nisur dialogu, që ka qenë më shumë se i gjithë raportimi i përfaqësuesve të juaj për dialogun. Më pyetet nëse e kam ngritur dorën për të votuar për nipin tim si mbikëqyrës të Agjencisë për Akreditim. A është në rregull që nipi juaj (deputeti i LVV-së) Driton Hyseni është ulur afër juve në Komision”, ka pyetur Bislimi.

Blerta Deliu ka thënë se “Nuk keni nevojë me shpërfaqë arrogancë zëvendëskryeministër, këtu jeni para deputetëve të Kuvendit të Kosovës”.

09:38

Zëvendëskryeministri Bislimi raporton në Komision, numëron sfidat e dështimet e paraardhësve

(Ekonomia Online)- Në Komisionin për Integrime Evropiane po raporton Besnik Bislimi, zëvendëskryeministër i parë për Integrim Evropian, Zhvillim dhe Dialog, njofton Ekonomia Online.

Ai fillimisht ka prezantuar punë që kanë bërë që nga marrja e mandatit, duke numëruar një varg sfidash.

Madje ai tha se shumë punë e prioritete të institucioneve nuk janë realizuar, duke sqaruar se nga 22 prioritetet të ERA 1 janë realizuar vetëm 10 prej tyre.

“Fushat që i mbulojë unë përveç integrimeve kanë brenda edhe zhvillimin ekonomik dhe dialogun. Ne mbikëqyrmi nëse programi ekonomik i ministrive përmbushet. Fusha e integrimeve evropiane kërkon bashkëpunim të ngushtë me të gjitha linjat përfshirë Kuvendin, agjencitë e pavarura. Në fillim ne kemi shikuar këshillin ndërministror, këshillin punues dhe grupet punuese sektoriale që janë 6 sosh. Këto këshille janë mbushur me persona. Kemi angazhuar punimet e 9 komiteteve. Gjatë draftimit prioriteteve kemi pasur 22 prioritete në përfshira në ERA 1 të ndara në 3 shtylla. Prej tyre janë detajuar në 123 veprime që është dashur të merren, 22 prioritete janë realizuar më pak se 50 për qind pra 10 nga 22”, tha Bislimi.