2 perditesime
10:05

“Dokumentet për vaksinat” përplasin ministrin Vitia me ish-ministrin Zemaj

Ministri i Shëndetësisë, Arben Vitia, dhe ish ministri Armend Zemaj janë përplasur lidhur me çështjen e pranim-dorëzimit të dokumenteve për negocimin e sigurimit të vaksinave anti-Covid.

Vitia ka thënë se në asnjë dokument, nga dosjet sa i kanë pranuar, nuk ka pasur dosje për vaksina. Këtë e ka mohuar Zemaj duke shtuar se gjatë dorëzimit të detyrës i ka dorëzuar edhe dosjen me dokumente për negociatat me Pfizer.

“Me keqardhje mund të them se në asnjë moment nuk është përmendur dosja e Pfizerit, keni thënë se këto janë dokumentet. Ndoshta edhe ju keni qenë i emocionuar që po dilni nga zyra. Unë kam kërkuar nga kabineti që disa herë ta bëjnë kontrollin e këtyre dokumenteve. Asnjë dokument për vaksina nuk e kemi gjetur lidhur me negociatat”, ka thënë ai.

Vitia ka thënë se masat nuk kanë qenë politike, duke shtuar se në kohën kur janë vendosur ka qenë numër shumë i madh i rasteve.

Ai ka thënë se këto masa është dashur të vendosen më herët.

09:52

Zemaj: Vitia po flet të pavërteta për ta mbuluar neglizhencën ndaj procesit të vaksinimit

Deputeti i LDK-së, Armend Zemaj, ka thënë se të gjitha dosjet për vaksinat, përfshirë negociatat dhe kërkesat te institucionet ndërkombëtare ia ka dorëzuar Vitisë me të marrë mandatin. Zemaj ka shtuar se Vitia po flet të pavërteta për ta mbuluar neglizhencën ndaj procesit të vaksinimit. Kjo pasi ministri i Shëndetësisë ka thënë se nuk kanë pranuar dokumente sa i përket sigurimit të vaksinave.

Ai ka thënë se ka qenë dhe është i gatshëm ta informojë dhe të bashkëpunojë lidhur me dokumente gjatë kohës sa ai ka drejtuar Ministrinë e Shëndetësisë.

“Sa i përket procesit të vaksinimit, ai nuk mbikëqyret nga ana juaj, kemi parë proces me shumë të meta. Shpresoj që kjo të ndryshohet. Nuk po shohim informim për marrjen e vaksinave. Sa i përket masave, unë kam thënë se kanë qenë të nevojshme por mënyra se si janë marrë ka qenë politike. Sot kemi numër më të ulët të të infektuarve. Mangësi buxhetore në institucionet e shëndetësisë nuk janë të reja, kanë qenë gjithmonë. Pjesa e parë buxhetore i plotëson të gjitha nevojat për furnizimin me barna”, ka thënë ai.

Ai ka deklaruar se ministri i Shëndetësisë, Arben Vitia, nuk ka program politik për sektorin e shëndetësisë.

Zemaj ka përmendur edhe mungesën e insulinës, duke shtuar se ka pranuar ankesa nga qytetarët.

09:28

Vitia: Deri në fund të vitit do t’i kemi rreth 2 milionë vaksina anti-COVID

Ministri i Shëndetësisë, Arben Vitia, ka deklaruar se deri në fund të vitit pritet që Kosova t’i ketë rreth 2 milionë doza të vaksinës anti-COVID.

Duke raportuar para Komisionit rreth menaxhimit të pandemisë dhe procesit të vaksinimit, Vitia ka thënë se procesi i sigurimit të vaksinave do vazhdojë edhe më tutje.

“Deri në fund të këtij viti do kemi diku rreth 2 milionë doza të vaksinës dhe kjo do të vazhdojë. Deri më tani në Kosovë kanë ardhur 178 mijë doza. Edhe nga Pfizeri janë siguruar mbi 1 milionë e 200 mijë vaksina”, ka thënë ai.

Ministri Vitia ka shtuar se plani i vaksinimit në masë synohet të nis nga 15 qershori, ku sipas tij, vaksinimi do intensifikohet.

“Së fundmi kanë ardhur mbi 100 mijë të kompanisë Pfizer, numri i dozave të siguruara është 163.020 përmes skemës. Kosova ka kapacitet të zinxhirit të ftohtë. Procesi i vaksinimit po vazhdon ga ekipet e trajnuara. Do bëjmë rritjen e stafit në procesin e vaksinimit. Nga 89 ekipe dhe 178 infermierë, do bëhen 190 ekipe shtesë me 400 infermierë”, ka thënë tutje.