2 perditesime
10:17

Gërvalla: Nuk kam qenë e as nuk jam dëshmitare e Speciales

Kryediplomatja e Kosovës, Donika Gërvalla është pyetur sot nga gazetarët nëse është dëshmitare e Gjykatës Speciale.

Shkurtimisht, Gërvalla ka thënë se nuk do që të keqpërdorë vizitën e homologut të saj kroat për të folur për këtë çështje, megjithatë, e ka mohuar një gjë të tillë.

“Për të mos e keqpërdorur vizitën e homologut, për të mos shpenzuar kohën e tij, një përgjigje shumë e shkurtër. Jo, as nuk kam qenë as nuk jam. Mendoj që është përgjigja e mjaftueshme”, ka thënë Gërvalla./EO

10:08

Ministri i Jashtëm kroat: Jemi kundër ndryshimit të kufijve

Ministrja e Punëve të Jashtme dhe Diasporës e Kosovës, Donika Gërvalla ka pritur në takim homologun e saj kroat, Gordan Grliq Radman, raporton Ekonomia Online.

Radman pas takimit tha se shteti që përfaqëson është kundër çdo ndryshimi të kufijve.

Ai ka garantuar mbështetje për Kosovën sa i përket heqjes së vizave.

“E përkrahim dialogun bilateral mes Kosovës dhe Serbisë dhe shpresojmë që të vijnë drejtë një zgjidhje. Kroacia është kundër çdo ndryshimi të kufijve në Lindje të Evropës. Shpresojmë që bisedimet të rifillojnë në qershor. Të punojmë që ato vende që nuk e kanë njohur pavarësinë e Kosovës ta bëjnë atë. Republika e Kroacisë i jep përkrahjen e plotë të liberalizimit të vizave”, shtoi ai. “Shpreh kënaqësi për këtë vizitë. Kroacia dhe Kosova janë tradicionalisht dy vende miqësore që kanë marrëdhënie shume të mira. Javën e kaluar ministri i Mbrojtjes e ka vizituar Kroacinë kurse unë sot kam nderin të jem me kolegë këtu. Nuk duhet të harrojmë faktin që Kroacia ka qenë ndër shtete e para që ka pranuar pavarësinë e Republikës së Kosovës. Ne kemi dhënë përkrahje të madhe që Kosova të kryqet në organizata rajonale dhe ndërkombëtare. Pata kënaqësi që të njoftoj ministren për ndarjen e 10 mijë dozave të vaksinave si preventivë nga pandemia Covid-19 që ka lënë në masë të madhe pasoja". 

Radman sot do të takohet edhe me presidenten e Kosovës, Vjosa Osmani dhe kryeministri Albin Kurti.


Radman: Kemi marrë vendim për ngritjen e një kampi ushtarak në Kosovë

Ministri i Jashtëm i Kroacisë, Gordan Grliq Radman, gjatë vizitës sot ka thënë se Kroacia ka marrë vendim për të ngritur një kamp ushtarak në Kosovë, që sipas tij do të ndikojë në stabilitet të rajonit.

Radman i tha gjatë konferencës së përbashkët me ministren e Jashtme të Kosovës, Donika Gërvalla – Schwarz.

“Kemi marr vendim për ngritjen e kampit ushtarak në Kosovë që do të ndikojë në stabilitet të rajonit”, tha Gërvalla.

09:12

Nis takimi i ministres Gërvalla me homologun e saj kroat Radman

Ka filluar takimi i ministres së Punëve të Jashtme dhe Diasporës, Donika Gërvalla me homologun e saj kroat, Gordan Grliq Radman.

Takimi i tyre pritet të zgjasë një orë, kur edhe pritet të ketë konferencë për media.

Ministri i Punëve të Jashtme të Kroacisë, Gordan Grliq Radman po qëndron në vizitë zyrtare në Kosovë, e që do të pritet në takim edhe nga Presidentja e Kosovës, Vjosa Osmani dhe kryeministri i vendit, Albin Kurti.