3 perditesime
21:32

Buxhovi: Çdo vrasje duhet ta marrë përgjigjen e vet

Historiani dhe shkrimtari Jusuf Buxhovi ka thënë se çdo vrasje që ka ndodhur pas luftës në Kosovë duhet ta marrë përgjigjen, dhe kushdo qoftë ai që ka kryer një akt të tillë ta marrë përgjegjësinë.

Ai në Deskun e KTV-së ka thënë se ka pasur nga partitë si krah i luftës të cilat kanë shfrytëzuar meritat e luftës për përfitime më pas.

“LDK-ja ka dalë me një program të qartë atëherë, por ka qenë reaksion ndaj sjelljes së disa grupeve politike që në njëfarë mënyrë e uzurpuan pushtetin. Partitë që dolën nga lufta, që e kanë shfrytëzuar krahun që e quajmë krahun e luftës, kanë shfrytëzuar meritat e luftës për përfitimin në paqe dhe aty ke i pasur edhe kriminalitet dhe vrasje që pasojat i vuajmë edhe sot”, ka thënë Buxhovi.

Buxhovi ka shtuar se drejtësia duhet ta thotë fjalën e vet, duke shtuar se vrasjet e pasluftës janë bërë në rrethana ku forca të caktuara kanë pasur pushtet.

“Nuk them se këto krime e vrasje janë bërë prej atij apo këtij, por janë bërë në ato rrethana të caktuara kur forca të caktuara kanë pasur pushtet, ka qenë SHIK-u e të tjerë. Drejtësia duhet ta thotë fjalën e vetë. Nëse dikush ka përgjegjësi, lidhet me çfarëdo vrasje, le të ketë qenë edhe hero, ai duhet të japë përgjegjësi sepse janë vra mbi 100 aktivistë të LDK-së, 109 janë të UÇK-së që pak kush ua ka kushtuar vëmendjen, ka qytetarë e pakica, ku çdo vrasje duhet ta marrë përgjigjen e vetë”, ka përfunduar Buxhovi.

21:05

Buxhovi: LDK-ja nuk kërkoi pavarësi kur u themelua

Jusuf Buxhovi, si një prej themeluesve të LDK-së, thotë se qëllimi i kësaj partie në fillim ishin të drejtat e barabarta për shqiptarët në ish-Jugosllavi.

Ai, në një intervistë në Deskun e KOHËS, tha se vetëm pas shpalljes së shkatërrimi të Jugosllavisë, më 5 gusht, LDK-ja nisi të punoi për pavarësi.

“Nga viti 1989 deri më 1991, kur u shpall shpërbërja e Jugosllavisë, përnjëherë ka ndryshuar koncepti i partive politike që i ka udhëhequr LDK-ja, dhe nga aty e tutje është kërkuar pavarësia. Paralelisht me këtë, lëvizjet ilegale që kanë qenë shumë të ngjyrosura ideologjikisht kanë vazhduar veprimtarinë e tyre. Disa prej tyre kanë qenë pjesëmarrëse në LDK, si LPK, por ka dal më 1993. Të burgosurit politikë kanë qenë të inkuadruar në LDK dhe kanë qenë shumë të dalluar, disa kanë qenë lojalë në konceptet e shtetndërtimit. Kanë qenë dy linja, ajo që ka kërkuar shtet të pavarur dhe ajo që ka kërkuar bashkim kombëtar”, ka thënë historian Buxhovi.

Buxhovi ka thënë se qëndrimi i ish-presidentit Ibrahim Rugova, ka qenë që fillimisht të luftohet për barazi e të shkohet sa më larg me atë opsion. Porse në momentin kur ka rënë Jugosllavia, atëherë të gjithë e dinin se duhet luftuar për pavarësi.

“Rugova ka pasur qëndrim që e kishim gjithë ne, që LDK-ja fillimisht të luftojë për barazi, të arrijmë të shkojmë sa më larg me atë opsion. Atë moment kur ra Jugosllavia gjithë e kanë ditur se duhet të luftohet për pavarësi, se na ka obligu dhe dokumentet edhe 2 Korriku edhe 7 Shtatori, e tjera e tjera. Rugova ka punuar në atë drejtim. Edhe po të donte Rugova diçka tjetër nuk do të kishte mundësi, sepse ishte një program, një koncept, e gjithë ato dokumente kanë shkuar në atë drejtim”, ka thënë Buxhovi.

Buxhovi ka thënë se Rugova gjithmonë ka qenë i matur në prononcimet e tij.

“Nëse i shihni edhe prononcimet e Rugovës kanë qenë shumë të matura në atë drejtim, sepse çfarëdo hapje të kësaj teme në rrethanat kur ne ishim në një situatë me qenë apo mos me qenë, kur na kërcënohej një gjenocid një luftë, do të ishte avanturë e rrezikshme e do të prishte krejt çështjen. E dini se Rugova krejt kohën ka pasur një slogan që thotë shteti i Kosovës i hapur ndaj Shqipërisë ndaj Serbisë, që mund ta përkthejmë në këto relacione të sotme politike”, ka thënë Buxhovi.

20:59

Buxhovi: Rugovën e kanë mitizuar ata që më së shumti e kanë keqpërdorur atë dhe LDK-në

Historiani dhe njëri prej themeluesve të LDK-së, Jusuf Buxhovi, ka thënë se mitizimi i Ibrahim Rugovës është keqpërdorim i figurës dhe angazhimit të tij.

Ai në një intervistë në Deskun e KTV-së, ka thënë se në fillim të krijimit të LDK-së, qëllimi i partisë, sikur i gjithë të tjerëve, sipas tij, ka qenë lufta për barazi, e më pas, pas shkatërrimit të Jugosllavisë, lufta për pavarësi.

“Mitin për Rugovën e kanë krijuar at që e kanë keqpërdorur më së shumti LDK-në dhe Rugovën”, ka thënë Buxhovi.

20:49

Buxhovi: Kemi sjellje të papërgjegjshme të klasës politike në Kosovë

Historiani dhe shkrimtari Jusuf Buxhovi ka thënë se prej shpalljes së pavarësisë por edhe përtej atij viti nga shpallja, “klasa politike ka qenë më shumë e prirë që me veprimet e veta t’i plotësoj ambiciet e veta”.

Në Deskun e KTV-së, Buxhovi ka folur për historinë e viteve të fundit të Kosovës, ku në dekadëshin e fundit flitet për dialogun me Serbinë dhe ku kërkohen kompromise. Ai ka shtuar se veçmas nga viti 2008 klasa politike në Kosovë ka pasur sjellje të papërgjegjshme në shumë segmente.

“Ne kemi raporte të zhdrejta me shtetin, shpesh edhe antihistorike qysh na u kanë paraqitë më 13-14. Ndoshta ato që janë shfaqur nga viti 2000, veçmas në 2010 kur GJND ta pranoi sovranitetin shtetëror, ne kemi një sjellje të papërgjegjshme të pjesës më të madhe të klasës politike në Kosovë në shumë segmente që e kanë rrezikuar shtetin e Kosovës. Një historian sjell në dilemë se pse këtu dikush nuk e ka dashur shtetin apo pushtetin por e shikon si mallkim”, ka thënë ai.

Ai ka shtuar se janë dy çështje që sipas tij kanë çuar në sjellje të papërgjegjshme të klasës politike kosovare.

“Këtu kanë ekzistuar dy koncepte për dhe rreth shtetin prej viteve 70-80-90. Ka qenë koncept i barazisë, koncept që Kosova të jetë e barabartë me njësitë e tjetra në kohën kur ka ekzistuar Jugosllavia. Pas Titos është ditë që nuk do të ketë Jugosllavi, një kohë kalimtare si pas xhonturqëve që e dinim se përpjekjet e shqiptarëve kanë qenë bashkimi i katër vilajeteve. Të njëjtën e kemi edhe këtu, të shkohet që ajo pozitë të avancohet më shumë, meqenëse 74-shi e la situatën ideale, në të ardhmen të jepet një deponim i tillë. Por, kanë ekzistuar edhe lëvizje ilegale, grupe të ndryshme ilegale që kanë planifikuar që Kosova t’i bashkohet Shqipërisë por në kuadër të një republike komuniste”, ka shtuar ai.