5 perditesime
18:29

Nuk miratohet rezoluta e propozuar nga PDK-ja për pandeminë

Kuvendi i Kosovës nuk e ka miratuar rezolutën e propozuar nga Partia Demokratike e Kosovës lidhur me situatën me pandeminë COVID-19.

Për ka marrë vetëm 20 vota nga deputetët e pranishëm në seancë, ndërsa kundër rezolutës votuan 54 deputetë.

Deputeti i PDK-së, Uran Ismaili, ka paraqitur rezolutën para deputetëve. Sipas rezolutës, qeveria do të obligohej të merrte veprime e vendime për sigurimin e vaksinës për COVID-19 dhe medikamenteve shëndetësorë për menaxhimin e situatës pandemike; që Qeveria në bashkëpunim me IKSHPK-në të miratonte planin për vaksinim të qytetarëve dhe i njëjti të bëhej publik e transparent; do të obligohej Qeveria për zgjerimin e kapaciteteve logjistike e krijimin e databazave e aplikacioneve për qëllim të vaksinimit efektiv të qytetarëve; do të obligohej Qeveria ta zbatoj planin për rimëkëmbje ekonomike për stimulimin e profesionistëve shëndetësorë dhe stafi mbështetës; që përmes legjislacionit të angazhohet t’i dalë në ndihmë financiare grupeve të caktuara shoqërore që rrezikohen, etj.

Kuvendi mbylli punimet pas votimit.

18:00

Krasniqi-Vitisë: Ti ministër po duket se je i vetmuar se s’ke kryeministër

Deputeti i PDK-së Memli Krasniqi, i është drejtuar ministrit të Shëndetësisë, Arben Vitia duke i thënë se ka mbet i vetëm pa përkrahjen kryeministrit. Ai në debatin për situatën me pandeminë, ka thënë se duhet të merret shembull kryeministri i Shqipërisë Edi Rama, duke thënë se ai për Kurtin është kryeministër i kryeministrit.

“Ti ministër po duket se je i vetmuar se s’ke kryeministër. Nuk është normale me udhëheq këtë proces një sekretar i ministrisë. Nëse e merr shembull Shqipërinë që është kryeministri i kryeministrit tonë. Turpi i debatit ka qenë kjo kur thoni kemi vdekje një shifrore thu që është për lavd kjo punë. Nuk kemi ma pak kemi njëjtë dhe jemi shumë keq. Trefish ma pak teste dhe normal që bjen numri i infeksioneve. Sinqerisht në emër të PDK-së debati ka qenë jo qëllime kritike, por a ka ndihmë të mundshme”, ka thënë Kransiqi.

Ai ka kërkuar nga Vitia që të kryej përgjegjësitë që ka në sigurimin e vaksinës.

“Është betejë e jotja edhe e qeverisë sepse e keni pushtetin dhe ju jeni duke u arsyetuar. Koha është e punës. Pse krahasohesh tregon që jeni duke bërë punë të mirë. Ama konfidencialiteti fle për disa çështje ma vonë që munden mu publiku. Tema është te vaksinimi njerëzit janë të pa shqetësuar. Ama të jeni të bindur që qytetarët nuk janë duke parë angazhim dhe është shqetësim. Ekonomia jonë është para kolapsit. Se cili këtu është munduar të japë sugjerim por beteja është e juaja. Është dashtë ti me qenë në krye të sigurimit të vaksinës. Dhe besoj që ka me ardh numër më i madh sepse na keni lodh duke u kritikuar mes veti. Po fol që deri ne fund të vitit ki mi vaksinu 60% të njerëzve dhe nuk është fer nëse i lë në gjysmë dhe nëse ke marrë përgjegjësi qoje deri në fund”, tha Krasniqi.

Ministri i Shëndetësisë, Arben Vitia iu përgjigj Krasniqit duke thënë se vaksinat vijnë në muajin maj.

“Në krye të betejës natyrisht që jam unë dhe kryeministri Kurti dhe presidentja por përgjegjësitë kryesore i kam unë dhe flas me përgjegjësi nga maji ky proces nuk do të ndalet por do të vijnë vaksinat. Kjo zëshmëria juaj dhe zelli juaj është për t’u befasuar. Janë 30 ditë po të kishin qenë të prodhuara për 30 ditë ka qenë e pamundshme të vijnë deri tani. Dhe ju garantojë qytetarëve që vaksinat të sigurohen me kohë. Të gjitha propozimet që keni dhënë do t’i dëgjojmë. Absolutisht të gjitha që i kam deklaruar do t’i qëndrojë deri në fund”.

Ndërsa, Krasniqi e ka pyetur Vitinë se me cilën nga kompanitë e vaksinave do të furnizohet Kosova.

“Nuk jemi më të zëshëm po është normale të iu duket tani të jeni të zëshëm. Nëse duke na thënë që ke fillua prej fillimit është gabim përkundër ndryshimeve që keni bërë. Ti po fol veç për Pfizer. A ka mundësi me marr vaksina prej tyre”, ka pyetur Krasniqi.

Ndërsa, Vitia tha se janë në negociata më të gjitha kompanitë.

Me të gjitha kompanitë jemi në negocim. Ato tjerat nuk janë në gjendje të na sjellin vaksinat si Pfizer sepse nuk janë kontaktuar me kohë. Do të marrim dhe nga ato vaksina por jo aq shpejt”.

17:10

Ish-ministri dhe ministri i Shëndetësisë përplasen për vaksinat

Ish-ministri i Shëndetësisë, tash deputet i LDK-së, Armend Zemaj e ka pyetur ministrin aktual të Shëndetësisë, Arben Vitia, se cila është dinamika e shtuar në procesin e sigurimit të vaksinave anti-Covid në Kosovë.

Zemaj më herët ka thënë se prej se ka marrë postin e ministrit po punohet me rritëm krejt tjetër për sigurimin e vaksinave.

“Ministra Vitia e ka përmendur një fakt. Është shtuar dinamika që nuk ka qenë e duhur. Unë e pyes z. Vitia se cila ka qenë dinamika e duhur dhe cila nuk ka qenë dinamika e duhur lidhur me këto tri procese të sigurimit të vaksinës Covid, ajo me Komisionin Evropian, ajo me Covax. Po ashtu më 30 mars kam marr konfirmimin tjetër nga Covax që është përcjell te ju për t’ju informuar për ardhjen e kontingjentit të dytë të vaksinave. Edhe kontrata me Pfizerin është përcjell te ju më 31 mars. Cila është dinamika e duhur që e keni shtuar z. Vitia nga ajo ditë e deri më sot”, ka thënë Zemaj.

E Vitia deklaroi se duhet pritur edhe pak kohë për të parë se cilat janë rezultatet e dinamikës së shtuar në këtë proces.

“E para është një keqinformim. Nuk është kontrata finale. E dini edhe ju. Është një parakontratë. Për pjesë të tjera të shtimit të kësaj dinamike, siç thashë edhe dje, të presim edhe pak kohë që të shohim se çfarë dinamike është shtuar dhe se çfarë do të vjen në fund”, ka thënë Vitia.


Lekaj-Kurtit: Zgjedhjet në Shqipëri i humbe, ka ardhur koha të vaksinohet populli

Deputeti i Aleancës për Ardhmërinë e Kosovës (AAK), Pal Lekaj, ka kritikuar Qeverinë Kurti 2 për mungesën e planit qeverisës për tejkalim të krizës ekonomike në Kosovë.

Ai në seancën e sotme të Kuvendit ku po debatohet rreth gjendjes me pandeminë, tha se fatmirësisht zgjedhjet në Shqipëri kanë përfunduar dhe se tani presin që kryeministri Albin Kurti të interesohet për gjendjen e rënduar nga COVID-19 në Kosovë.

“Zgjedhjet në Shqipëri i humbe, analizat i ke bërë, humbjet financiare i shkaktove. Ka ardhur koha të vaksinohet populli pasi që njerëzit dhe ekonomia e këtij vendi po vdes. Kryeministër, ke filluar mbrapshtë duke dëmtuar shtresën më të ndjeshme të Kosovës, ndalesa e shtesave për pensionistët ishte vendimi më i dëmshëm që ka mundur t’i bëni pensionistëve të Kosovës”, tha Lekaj.

Lekaj tha se kërkojnë që të revokohet vendimi për uljen e shtesave të pensionistëve.


Ismaili kërkon nga Qeveria plan të vaksinimit

Ish-ministri i Shëndetësisë, Uran Ismaili ka kërkuar një plan vaksinimi nga Qeveria Kurti. “Po na e dimë që po vjen vaksina bash kurgjo s’po jepni.. Debatin për shëndetësi se keni për qytetarë por për njëri-tjetrin. Jeni duke bërë hajgare. Marre për besë marre. Çka keni bë me vaksinë, sa kanë mu vaksinu ku është plani?” ka thënë ai. Ndërsa ministri aktual, Arben Vitia ka thënë se plani është publik dhe ka garantuar për sigurimin e vaksinës. “Ministri Vitia garanton qytetarët se do të ndodhë shumë shpejt sigurimi i vaksinës. Plani i vaksinimit është publik dhe do të vazhdojë e të bëhet pa asnjë problem. Kur fillon ardhja e vaksinave nuk do të ndalet”, ka thënë ai./EO

 

16:39

Vitia: Edhe po të ishte dikush supermen nuk do të mund të vaksinonte për 30 ditë 15 për qind të popullatës

Ministri i Shëndetësisë, Arben Vitia, ka insistuar se është i gatshëm të marrë përgjegjësi nëse vërtetohet sa ka refuzuar të nënshkruajë udhëzimin për blerjen e vaksinës anti-COVID.

Ai në seancën e Kuvendit të Kosovës ku po diskutohet për pandeminë, ka reaguar ndaj deputetit të AAK-së, Bekë Berisha, lidhur me vaksinimin e popullatës.

Berisha ka thënë se është tragjedi që nuk janë vaksinuar në Kosovë as 1 për qind e popullatës.

“Unë kam thënë se do të përgjegjësi ligjore e morale. Nëse kam refuzuar të nënshkruar diçka, unë do të jap përgjegjësi morale. Në anën tjetër zoti Berisha të thuash se është dashur të vaksinohen 15 për qind e popullatës kur ‘skemi gjet asnjë vaksinë, po edhe të kishte qenë dikush supermen ‘skish mundur me vaksinuar për 30 ditë 15 për qind të popullatës, është jashtë normalës”, ka thënë Vitia.

Në anën tjetër, deputeti Bekë Berisha e kritikoi ministrin Vitia për vendosjen e orës policore.

Vitia u kundërpërgjigj duke i thënë se të gjitha masat që merren diskutohen me të gjithë akterët

“Të gjitha masat që merren me mistrinë diskutohen me shumë akterë. Kërkesa për masa rigoroze janë bërë në vitin 2020. Këto masa i kemi analizuar. Sa i përket efektshmërisë në javën e kaluar janë raste më pak fatale. Sistemi shëndetësor ka marrë frymë lirisht sesa javën e kaluar”, tha Vitia.

Ministri i Shëndetësisë ka folur edhe vaksinën AstraZeneca për të cilën ka thënë se është sigurt dhe do të vazhdojnë ta marrin.

Vitia ka thënë se nga 24 mijë vaksinat e para nuk ka pasur efekte serioze. Ai ka folur edhe situatën për mungesën e barnave të cilën e ngriti deputeti i PDK-së, Ardian Kastrati.

“Bashkëpunimi me Odën e Farmacistëve është i jashtëzakonshëm dhe na ka ndihmuar të bëjmë ndryshime në kornizë ligjore. Zotëri Kastrati jam shumë koshient që nuk ka barna mjaftueshëm dhe kam potencuar se bashkë me bankën botërore për këto probleme. Për 30 ditë me ministri të Financave dhe miqtë tanë jemi në rrugë të mirë ta anashkalojmë këtë problematikë. Unë garantojë qytetarët se vaksina AsrtaZeneca është e sigurt dhe çdo dyshim i ngritur nuk është mirë të ngritët sepse asnjë studim nuk thotë që duhet të largohet. Ne do ta marrim sepse nuk kemi efekt serioz për 24 mijë doza që janë marrë”, tha Vitia.

15:23

Seanca nis me një minutë heshtje

Vazhdimi i seancës së djeshme për debatin parlamentar për menaxhimin e pandemisë ka filluar me një minutë heshtje për nder të ditës kombëtare për të pagjeturit dhe 22 vjetorin e masakrës së Mejës.

Në rend dite debati për pandeminë i cili ka nisur të hënën.

12:11

Deputetët sot vazhdojnë diskutimin rreth menaxhimit të pandemisë

Deputetët e Kuvendit të Kosovës sot do vazhdojnë diskutimin për menaxhimin e pandemisë së koronavirusiut. Seanca pritet të vazhdojë në orën 15:00, që kishte nisur të hënën, ku deputetë të opozitës kritikuan ashpër ministrin e Shëndetësisë për dështim të menaxhimit të pandemisë dhe mossigurim të vaksinave anti-COVID.