Osmani, Konjufca e Kurti nderojnë dëshmorët e Prishtinës

Presidentja e Republikës së Kosovës, Vjosa Osmani, kryetari i Kuvendit të Kosovës, Glauk Konjufca, dhe kryeministri Albin Kurti kanë bërë sot homazhe në varrezat e dëshmorëve në Velani.

Presidentja Osmani ka thënë me këtë rast se udhërrëfyesi më i ndritshëm për gjenerata e reja në Kosovë është rruga që ka ndërtuar secili dëshmor që ka rënë për atdhe.

“Është dita e dëshmorëve të Prishtinës, është një prej ditëve kur të gjithë bëhemi bashkë për ta nderuar sakrificën sublime që dëshmorët e këtij rajoni e bënë që ne sot ta gëzojmë lirinë. Është dita kur duhet tu flasim gjeneratave të reja për trimërinë e dëshmorëve të Kosovës që ranë duke e mbrojtur Kosovën, duke treguar se sakrifica për liri, për atdhe është dashuria më sublime që mund ta ketë një njeri. Udhërrëfyesi më i ndritshëm është rruga që ka ndërtuar secili dëshmor që ka rënë për atdhe”, ka thënë Osmani.

Kryeparlamentari Glauk Konjufca, është shprehur me këtë rast se pa rënien e dëshmorëve, nuk do të ishte e mundshme liria e popullit të Kosovës.

“Sa të ketë gjallë komb shqiptar, ata do të nderohen gjithmonë. Pjesa më e lavdishme e historisë së kombit tonë është lufta e UÇK-së, rënia e dëshmorëve dhe martirëve në luftën e fundit”, ka thënë Konjufca.

Ndërkaq, kryeministri Albin Kurti, ka deklaruar se dëshmorët e Prishtinës ranë heroikisht që të ngritët kauza e popullit të Kosovës për liri e pavarësi.

“Bëmë nderime te varret e dëshmorëve të kryeqytetit të cilët luftuan për liri dhe ranë heroikisht që të ngritët kauza jonë dhe më pas të vijnë çlirimi, liria e pavarësia. Sa herë vijmë këtu ia përkujtojmë vetës çmimin e madh që ka paguar populli ynë me gjakun e vet për lirinë e pavarësinë që kemi sot”, ka thënë Kurti.

Hoxhaj: Me krenari kujtojmë heronjtë e Prishtinës me fshatrat përreth

Ushtruesi i detyrës së kryetarit të PDK-së, Enver Hoxhaj, nëpërmjet një postimi në Facebook ka kujtuar dëshmorët e komunës së Prishtinës dhe fshatrave përreth.

“Sot, me nderim dhe krenari kujtojmë heronjtë e Prishtinës me fshatrat përreth, të cilët në luftën e Kosovës ranë për t'u bërë dritë e pashuar mbi lirinë tonë. Në Ditën e Dëshmorëve të komunës së Prishtinës, çdo vit e për çdo ditë, mendjet dhe zemrat tona janë pranë familjarëve të tyre. Ideali i tyre, sikur i të gjithë heronjve të Republikës sonë të re nëpër të gjitha qytetet, mbetet kauza jonë përpara – për një shtet demokratik, të zhvilluar e të lirë. Lavdi heronjve tanë!” – ka shkruar Hoxhaj.

Kryetari i AAK-së, Ramush Haradinaj, ka thënë se duhet ruajtur liria si vlera më e shenjtë dhe të përulemi me admirim para të rënëve të luftës.

Haradinaj nëpërmjet një postimi në Facebook në Ditën e Dëshorëve të komunës së Prishtinës, ka kujtuar të rënët në masakrën e Makocit dhe në Betejën e Marecit.

“Në Ditën e Dëshmorëve të komunës së Prishtinës, kujtojmë trimërinë, vendosmërinë e guximin e luftëtarëve të Brigadës 153 Hyzri Talla, gueriljes BIA, të gjithë Dëshmorët e Martirët e Lirisë. Në këtë ditë, kujtojmë të rënët në masakrën e Makocit dhe Betejën e Marecit. Fal heroizmit të luftëtarëve dhe sakrificës së martirëve, të cilët gjithmonë do të jenë frymëzim dhe udhërrëfyes në ndërtimin e të sotmes dhe të ardhmes sonë, ne realizuam misionin tonë historik. Ta ruajmë këtë liri si vlerën më të shenjtë dhe të përulemi me admirim para të rënëve”, ka shkruar Haradinaj.

© KOHA. Të gjitha të drejtat janë të rezervuara.