Rezultati përfundimtar i zgjedhjeve të 14 shkurtit e ka nxjerrë kryediplomaten e deritashme, Meliza Haradinaj, fituese të garës për deputete. Por rinumërimi i votave, i urdhëruar nga PZAP-ja, tregoi për fabrikim të këtij rezultati.
Premium
Rezultati përfundimtar i zgjedhjeve të 14 shkurtit e ka nxjerrë kryediplomaten e deritashme, Meliza Haradinaj, fituese të garës për deputete. Por rinumërimi i votave, i urdhëruar nga PZAP-ja, tregoi për fabrikim të këtij rezultati.
Rënia nga lista e deputetëve të AAK-së ka ndodhur pas rinumërimit të votave me kusht, atyre me postë, si dhe të shtatë kutive të rinumëruara më parë në QNR, rezultatet e të cilave ishin manipuluar paraprakisht.
E pakënaqur me vendimin për rinumërim, Haradinaj ka dhënë dorëheqje të martën nga pozita e ministres së Jashtme e edhe nga strukturat e AAK-së.
Numërimi i korrektuar e futi në listën e deputetëve kandidaten Albana Bytyqi, kanë thënë burimet e KOHËS, por të cilat nuk janë konfirmuar në KQZ.
“Rezultatet do të publikohen sapo ato të jenë të gatshme, pasi të përfundojnë të gjitha procedurat që parashihen në QNR, sepse ato të dhëna të cilat merren pas plotësimit të formularëve të rinj duhet kohë derisa të hyjnë sërish në sistem”, ka thënë Valmir Elezi, zëdhënës i KQZ-së.
Pas publikimit të rezultatit përfundimtar, deputetë të AAK-së, PDK-së e edhe të LDK-së u ankuan për vjedhje të brendshme, shumë nga të cilat ankesa u miratuan pjesërisht.
Ndërkaq ankesat më të mëdha u bënë nga komunitetet, nën pretendimin se Lista Serbe e deformoi votën e serbëve dhe e çoi tek parti satelite të saj. PZAP-ja u dha pjesërisht të drejtë.
Prandaj në Gjykatën Supreme gjatë ditës janë apeluar disa nga vendimet e PZAP-së, e veçmas ato që kanë të bëjnë me votën e komuniteteve.
“Këtu është një moment kur shteti i Kosovës duhet me na ‘protektu’ neve komuniteteve. Unë mendoj se ne krejt jemi t’u aplikuar për vende të garantuara me Kushtetutë, dhe në bazë të kësaj ne jemi thirrur në emër të Kushtetutës dhe ligjeve të Kosovës për t’i mbrojtë të drejtat tona”, ka thënë Duda Balje, nga Unioni Socialdemokrat.
“Unë pres që Gjykata Supreme me pru vendimin meritor dhe me kanë i njëjti standard, sepse e njëjta gjë ka ndodhë edhe në Kllokot, edhe në komunat tjera, në Leposaviq, në Graçanicë e edhe në komunat veriore”, ka thënë Veton Berisha, nga Partia Liberale Egjiptiane.
Argumente të kundërta me këta ka përmendur Adriana Hoxhiqi, e cila konsiderohet të mos ketë fituar me vota të komunitetit që i takon, por nga mbështetja e Listës Serbe.
“Vendimi i djeshëm i PZAP-së është skandaloz, është i papranueshëm, sepse i shkel të drejtat themelore të qytetarëve të Kosovës që ta shfrytëzojnë votën e tyre dhe të votojnë sipas vullnetit”, ka thënë Adriana Hoxhiq e Unionit të Bashkuar.
Zgjedhjet e 14 shkurtit janë vlerësuar përgjithësisht të rregullta, në ditën kur ato janë organizuar. Por më vonë shumë kandidatë janë ankuar për deformim rezultati nga komisionerë që u përkasin partive të tyre.
