Gazeta serbe “Veçernje Novosti” shkruan se institucionet më të larta të Serbisë janë në pritje, siç është thënë të pjesës së dytë të letrës uruese për Ditën Shtetërore, që u festua më 15 shkurt.
Sipas mediave serbe do të jetë një “Non-paper”, letër jozyrtare ku shprehet qëndrimi për një çështje të caktuar, e në atë për Serbinë do të jetë qëndrimi i SHBA-së dhe BE-së se duhet të njihet pavarësia e Kosovës.
“Veçerenje Novosti” shkruan se zyrtarët në Serbi janë të njohur me këtë dokument joformal dhe se vizita e emisarit special të BE-së për dialogun, në Beograd, është paralajmërim për këtë.
Presidenti i SHBA-së, Joe Biden, i kishte nisur presidentit të Serbisë, Aleksandar Vuçiq, letër për Ditën Shtetërore, në të cilën kishte shprehur besimin se do të punohet në atë drejtim që të njihet pavarësia e Kosovës. Për këtë, mediat serbe letrën joformale, e kanë quajtur “pjesa e dytë e urimit”.
Kohëve të fundit, Vuçiq në disa raste ka thënë se do të shtohet presioni ndaj Serbisë për të njohur pavarësinë e Kosovës. Kjo është parë si përgatitje e opinionit në këtë vend.
© KOHA. Të gjitha të drejtat janë të rezervuara.
