5 perditesime
11:29

Voton Limaj: Shpresoj që zgjedhjet të prodhojnë stabilitet

Kryetari i Nismës Socialdemokrate, Fatmir Limaj, minuta më parë ka dhënë votën e tij.

Para mediave tha se shpreson se do të ketë një qeveri stabile.

“Është moment i rëndësishëm. Shpresoj se këto zgjedhje të prodhojnë stabilitet dhe siguri. Këto vijnë nëse vazhdojmë të jemi krenar për të kaluarën që më pas të jemi në shërbim të së ardhmes”, tha ai.

10:15

Voton Vjosa Osmani, thotë se qytetarët sot përcaktojnë fatin e tyre

Ushtruesja e detyrës së presidentes së Kosovës, Vjosa Osmani ka votuar para pak çastesh në Fakultetin Teknik në Prishtinë.

Osmani e cila ishte e shoqëruar nga bashkëshorti dhe dy vajzat e saj tha pas votimit se sot është një ditë e bardhë për Kosovën dhe ftoi të gjithë qytetarët që vendosin për fatin e tyre duke shfrytëzuar të drejtën që të votojnë.

“Sot është një ditë e bardhë për Kosovën është një ditë kur të gjithë qytetarët tanë pa dallim nëpërmjet vullnetit tyre të lirë do ta përcaktojnë të ardhmen e tyre, fatin e vendit por edhe fatin individual. Masivisht të marrin pjesë në zgjedhje. Një ftesë e veçantë për të gjitha gratë e Kosovës që të marrin pjesë në këtë proces sepse barazia fillon tek kutitë e votimit”, ka thënë Osmani.

Ajo ka falënderuar edhe diasporën për pjesëmarrje masive në votim e po ashtu vëzhguesit e mediat.

 

09:51

Voton Kurti: Kosova sot i kthehet popullit

Lideri i Lëvizjes Vetëvendosje i është drejtuar kutisë së votimit të dielën.

Në fakultetin Ekonomik në Prishtinë, ai ka shfrytëzuar të drejtën e tij për të votuar.

Kurti para gazetarëve ka thënë se qytetarët kanë nevojë për drejtësi e institucionet për legjitimitet.

“Sot është ditë e bardhë, e ndritshme ashtu siç do jetë e ardhmja jonë. Qytetarët kanë nevojë për demokraci, institucione për legjitimitet. Sot kjo nevojë është edhe e drejt që paraqet mundësi që duhet shfrytëzuar dhe përdorur. Kosova si shtet i pavarur këtë të diel i kthehet popullit. Me dashuri për vendin, duhet të votojmë”, tha ai.

Image
09:45

Voton Hoti, fton qytetarët ta ushtrojnë të drejtën e votës

Ka votuar kandidati i LDK-së për kryeministër Avdullah Hoti. Kryeministri në detyrë i Kosovës, Hoti, ka votuar në Fakultetin e Filologjisë në Prishtinë, në përcjellje të bashkëshortes.

“Serveti e unë kryem obligimin tonë. Ftoj gjithë qytetarët me të drejtë vote ta shfrytëzojnë të drejtën e tyre për të votuar. Sot është dita e tyre, ata sot thonë fjalën e tyre. Dëshiroj që të falënderoj gjithë stafin, duke filluar nga zyrtarët e KQZ-së, vëzhguesit, komisionerët, monitoruesit ndërkombëtar e vendor. Pres të kemi proces të rregullt zgjedhor, sipas standardeve më të mira evropiane, ku qytetarët e thonë fjalën e tyre lirshëm”, tha Hoti.

Image


Voton edhe Isa Mustafa 

Kryetari i Lidhjes Demokratike të Kosovës, Isa Mustafa, ka hedhur votën e tij para pak minutash.

Mustafa para gazetarëve ka ftuar qytetarët të votojnë.

“Ftoj të gjithë qytetarët edhe pse ditë jo e përshtatshme për votim për shkak të motit, të dalin të votojnë. Shpresoj që të gjithë qytetarët do votojnë për demokratizimin e mëtutjeshëm të vendit, zhvillim ekonomik, prosperitet dhe përforcim të shtetit të Kosovës”, tha ai.

09:41

Voton Haradinaj: Votoni të gjithë, t’i japim legjitimitet institucioneve

Prijësi i Listës së AAK-së, Ramush Haradinaj ka votuar sot në qendrën e Votimit në shkollën e mesme të Mjekësisë “Ali Sokoli”.

Pas votimit Haradinaj ka kërkuar nga qytetarët që të shfrytëzojnë të drejtën e votës në mënyrë që t’i jepet legjitimiteti institucioneve të Kosovës.

“Ushtruam të drejtën tonë për të votuar, i lus të gjithë qytetarët që kanë të drejtë vote, të votojnë, këto zgjedhje janë me rëndësi që t’i japim legjitimitet institucioneve të Kosovës, na presin shumë sfida si përballja me Serbinë, situata me pandeminë dhe forcimi i brendshëm i vendit”, ka thënë Haradinaj.

Ai ishte i shoqëruar nga bashkëshortja e tij Anita Haradinaj.

 

09:14

Voton Enver Hoxhaj, thyen heshtjen zgjedhore me deklaratën e tij para mediave

Prijësi i Listës së PDK-së, njëherësh kandidati për kryeministër nga kjo parti Enver Hoxhaj ka votuar para pak çastesh në qendrën e votimit në Fakultetin Filologjik të Universiteti të Prishtinës.

Hoxhaj ishte i shoqëruar nga bashkëshortja e tij, Remzije Shahini – Hoxhaj. Pas votimit, ai tha se sot është dita kur flasin qytetarët dhe jo politikanët.

Hoxhaj ka thyer heshtjen zgjedhore me vazhdimin e deklaratës së tij para mediave.

Image