Kurti: Prizrenin me Tetovën do ta lidhim përmes tunelit

Prishtinë, 10 shkurt (KosovaPress) - Lideri i Lëvizjes Vetëvendosje, Albin Kurti, ka premtuarës do të fillojë përgatitjen e projektit që lidhë Prizrenin me Tetovën përmes tunelit.

Kurti e ka thënë këtë gjatë tubimit në Prizren, qytet për të cilin ka premtuar buxhet më të madh nga qeveria e ardhshme e Kosovës që do të dalë nga zgjedhjet e 14 shkurtit.

Kandidati për kryeministër të vendit Albin Kurti dhe ushtruesja e detyrës së postit të presidentes, Vjosa Osmani, e cila në këto zgjedhje garon si pjesë e listës së Lëvizjes Vetëvendosje, kanë takuar sot qytetarët e Prizrenit, në ecjen përgjatë qytetit.

Përveç aktivistëve, ata morën përkrahje edhe nga kryetari i Aleancës për Shqiptarët në Maqedoninë e Veriut, Zijadin Sela dhe ai i Alternatives, Afrim Gashi, të cilët morën pjesë në aktivitetin e sotëm zgjedhor në Prizren.

Diskutuan për nevojën që shqiptarët në të dyja anët e kufirit të mund të kenë zhvillim të përbashkët të vlerave kombëtare.

Përmes politikanëve shqiptarë nga Maqedonia e Veriut, Kurti u bëri thirrje shqiptarëve atje, të cilët kanë shtetësi të Kosovës, më 14 shkurt të vinë në Kosovë për të votuar.

“Do të fillojmë përgatitjen e projektit që lidh Prizrenin me Tetovën me tunel, sepse siç thuhet Prizreni dhe Tetova lart në qiell kanë qenë një qytet, por kur kanë rënë në tokë malet e Sharrit i kanë bërë dy e tash ne duhet t’i lidhim ato. Dhe tjetra, nga këto keqqeverisjet e viteve të fundit Prizreni është diskriminuar më së shumti nga të gjitha komunat e Kosovës sa i përket buxhetit, buxheti më i paktë për kokë banori i është ndarë pikërisht Prizrenit dhe kjo do të ndryshojë menjëherë me qeverisjen tonë të re”, tha Kurti.

Ndërsa Vjosa Osmani tha se më 14 shkurt duhet të ndodhë referendumi ku qytetarët përmes votës do të përcaktojnë të ardhmen e fëmijëve të tyre.

“Referendumi duhet patjetër që të ndodh, në mënyrë që ai të ndodhë, të kemi masovitet në pjesëmarrje dhe përkrahje të madhe për ndryshimin, na duhet secili qytetar të dalë në votim, sepse nëpërmjet votës së tyre e përcaktojnë të ardhmen e fëmijëve të tyre dhe të brezave që vinë”, tha Osmani.

Edhe në tubimin në Prizren, Albin Kurti tha se “pranvera po vjen me nxitim dhe nuk po e pret as 14 shkurtin”.

Prishtinë, 10 shkurt (KosovaPress) - Në 14-vjetorin e vdekjes së dy aktivistëve të Lëvizjes Vetëvendosje, Arben Xheladini dhe Mon Balaj, familjarë e aktivistë, së bashku me kreun e VV-së, Albin Kurti kanë bërë homazhe tek pllaka përkujtimore në sheshin “Nënë Tereza”, në Prishtinë.

Kurti nga aty tha se drejtësia e vonuar për Balajn dhe Xheladinin është drejtësi e mohuar edhe pas 14 viteve.

“Para 14 viteve në këtë shesh janë shkrepur 232 plumba gome mbi trupat e protestuesve paqësor dhe të paarmatosur, teksa po tërhiqeshin nga gazi lotsjellës. 8 sekonda pas gazit lotsjellës janë shkrepur nga policia e UNMIK-ut nga njësitit rumun dhe jo vetëm mbi demonstruesit të cilët po kërkonin pavarësi të plotë për Kosovën, por kritikonin e po kundërshtonin pakon e Ahtisarit me padrejtësitë e saj që e gjymtonin sovrantetin përbrenda dhe ia vështirësonin ecjen përpara vendit tonë dhe popullit tonë. Arben Xheladini dhe Mon Balaj janë dëshmorë të vullnetit të popullit për liri. Drejtësia e vonuar për ta është së pari drejtësi e mohuar qysh në start, meqenëse njësiti rumun i UNMIK-ut i policisë së UNMIK-ut u pati lejuar që të lëshojnë Kosovën bashkë me qiftet e tyre ndërkohë që paraprakisht u patën intervistuar vetëm si dëshmitar e jo të dyshimtë. Raporti që është bërë më pastaj nga vetë UNMIK-u ka treguar se brenda njësitit të policisë së UNMIK-ut prej 11 vetave sigurisht që 2 prej tyre janë vrasësit”, deklaroi Kurti.

Të pranishëm në këtë aktivitet përkujtimor ishin të pranishëm edhe kandidatë të shumtë për deputet nga Lëvizja Vetëvendosje si Glauk Konjufca, Fitore Pacolli, Fatmire Kollçaku, Arbëri Nagavci etj.

Gjatë ditës së sotme kreu i LVV-së, Albin Kurti i shoqëruar nga bashkëshortja e tij kanë bërë homazhe edhe tek varrezat e Mon Balaj dhe Arben Xheladinit.

Dy aktivistët e Lëvizjes Vetëvendosje, Arben Xheladini dhe Mon Balaj, derisa protestonin kundër negociatave të Kosovës me Serbinë dhe Pakos së Ahtisaarit, , u vranë më 10 shkurt 2007 nga Policia rumune e UNMIK-ut, 14 vjet më parë.

Përveç vrasjes së dy aktivistëve të VV-së, kishte edhe shumë të plagosur. Ndërkohë, lotsjellësi që është përdorur nuk ishte parë asnjëherë më herët, por as deri më sot. Madje, erërat e lotsjellësit nuk u hoqën pesë ditë nëpër sheshet e Prishtinës

Prishtinë, 10 shkurt (Ekonomia Online) – Kandidati për kryeministër nga radhët e Vetëvendosjes, Albin Kurti, nuk ka dhënë përgjigje lidhur me atë se cilët janë aleatët e tij për Republikën e Tretë, për të cilën kryetari i LDK-së, Isa Mustafa, kishte kërkuar sqarim nëpërmjet një postimi në Facebook.

Kurti i pyetur për këtë deklaratë tha se s’po ka kohë të merret me deklaratat e të tjerëve, por që sipas tij ata duhet t’i sqarojnë vet deklaratat e tyre.

“Republika e Kosovës është para një referendumi gjithëpopullor ku numri 127 është dalje nga kriza e shumëfishtë. Nuk mund të jap shpjegime për deklaratat e të tjerëve, ata duhet t’i japin vet”, tha Kurti, pas homazheve tek vendi ku janë vrarë aktivistët e VV-së, Mon Balaj e Arben Xheladini 14 vjet më parë në një protestë të organizuar kundër Pakos së Ahtisarit, raporton Ekonomia Online.

Kreu i LDK-së Isa Mustafa përmes një postimi në Facebook, ka thënë se Kosova ka shpallur pavarësinë së bashku me ShBA-në dhe partnerët evropian, ndërsa ka kërkuar nga Kurti të sqaroj se kush janë parterët e tij për Republikën e Tretë.

“Një shtet e bëmë me SHBA-të dhe me partnerët tanë evropian, të zotuar për demokracinë perëndimore. Ndërkaq, VV duhet ta qartësojë se kush janë partnerët e saj për Republikën e Tretë. Ndryshe, në qoftë se votohet vetëm me emocione, rrezikojmë të vejmë shallat e kuqe rreth qafe, të marrëshojmë si në Revolucionin Kulturor Kinez e të mbesim pa asnjë republikë”, ka shkruar Mustafa.

Vet përfaqësuesi ligjor i LVV-së, Blerim Sallahu, dje nëpërmjet një postimi në Facebook kishte thënë se pas zgjedhjeve duhet të fillohet të ndërtohet Republika e Tretë.

​Kryetari i Lëvizjes Vetëvendosje, Albin Kurti, ka thënë se nëse vjen në pushtet, “do ta nxjerrë Kosovën nga pazaret me Serbinë”. Ai është zotuar se do t’ia kërkojë borxhin Serbisë në çdo takim me ndërkombëtarët.

“Ne jemi të vendosur që ta nxjerrim Kosovën edhe nga korrupsioni i pushteteve të pasluftës, por edhe nga pazaret me Serbinë, e cila i ka shumë borxh popullit të Kosovës edhe gjatë okupimit, edhe gjatë luftës. Serbia ka kryer krime të luftës, krime kundër njerëzimit dhe gjenocid, andaj ne do të përfaqësojmë me dinjitet Kosovën dhe në çdo takim ndërkombëtar apo të ndërmjetësuar nga ndërkombëtarët do t'ia kërkojmë borxhin Serbisë”, ka thënë Kurti për KP, pas homazheve që bëri tek varri i aktivistit Arben Xheladini, në 14-vjetorin e demonstratës, ku pos Xheladinit, i vrarë mbeti edhe Mon Balaj.

Kurti është kandidat i Lëvizjes Vetëvendosje për kryeministër. Ai në zgjedhjet e 14 shkurtit megjithatë s’do të jetë pjesë e listës së kandidatëve për deputetë në zgjedhjet për parlamentin, për shkak të dënimit për vepër penale në tri vitet e fundit.