Arbëri

IKSHPK: Cilësia e ujit të pijshëm është brenda standardeve të parapara, të mos përdoren bunarët si zgjidhje alternative

Instituti Kombëtar i Shëndetësisë Publike të Kosovës përmes një komunikate ka siguruar qytetarët e vendit se cilësia e ujit të pijshëm është brenda standardeve të parapara, pavarësisht shqetësimeve të fundit të ngritura nga reshjet e dendura të shiut.

IKSHPK bën me dije se ka sforcuar monitorimin e cilësisë së ujit për pije gjatë kësaj periudhe të vështirë, duke dhënë edhe arsye pse po ndodhin restrikcionet nëpër vende të ndryshme të Kosovës.

‘’Vlera e shtuar e turbullirës ndikon në procesin e ngadalësimit të trajtimit të ujit dhe rrjedhimisht zvogëlimin e kapacitetit prodhues (zvogëlim i sasisë së ujit të përpunuar), andaj kompanitë për arsye të pamundësisë së prodhimit me kapacitet të plotë janë të detyruar të aplikojnë restrikcione me orar të caktuar’’, thuhet ndër të tjera në komunikatën e IKSHPK-së.

Në këtë situatë qytetarët duke dashur që të kenë furnizim 24 orë me ujë detyrohen të gjejnë alternativa për furnizim nga burimet tjera të ujit. Dhe sipas IKSHPK, bunarët/puset janë të pambrojtura, të pamenaxhuara dhe me rrezik të lartë për kontaminim.

Andaj qytetarëve iu apelohet të kenë kujdes në shfrytëzimin racional të ujit dhe kursimin e tij si dhe në maksimum të kenë kujdes me shfrytëzimin dhe futjen e ujit në rrjet nga bunarët/puset, për arsye se cilësia e ujit në këto resurse është jo e sigurtë e posaçërisht për shkak të turbullirave.