Mbrojtja kërkon lirimin e përkohshëm të Thaçit, kundërshton krahasimin e tij me Karaxhiqin

Mbrojtja e ish-presidentit të Kosovës, Hashim Thaçi, ka kërkuar lirimin e përkohshëm të tij, me kushtet që i cakton gjykatësi i procedurës paraprake.

Avokati mbrojtës i Thaçit, David Hooper, është përgjigjur ndaj parashtresave të prokurorit Jack Smith.

Hooper ka thënë se është fatkeqësi që në parashtresat e Zyrës së Prokurorit të Specializuar po bëhen krahasime me figura të njohura ndërkombëtare që kanë përdorur resurset për t’i ikur drejtësisë, në mesin e tyre edhe ish-presidenti i Republikës Srpskas, Radovan Karaxhiq.

“Është fatkeqësi që në parashtresën e Zyrës së Prokurorit të Specializuar po bëhen krahasime me figurat e njohura ndërkombëtare që kanë përdorur resurse për t’i ikur drejtësisë. Ndryshe nga presidentët Habre, Karaxhiq e Taylor, që me të mësuar se ka aktakuzë të konfirmuar ndaj tyre kishin ikur, z. Thaçi ka dhënë dorëheqje nga posti i presidentit të Kosovës dhe është lidhur me avokatët e tij dhe Zyrën e Prokurorit të Specializuar për t’u dorëzuar, dhe është dorëzuar”, thuhet ndër të tjera në përgjigjen e Hooperit.

Ai ndër të tjera ka cekur edhe se si Thaçi ka mbrojtur të drejtat e minoriteteve në Kosovë, ka cekur nderimet që ka bërë Thaçi për viktimat serbe në Kosovë, vizitat në varrezat e serbëve në Gjilan. E po ashtu edhe për postimin e tij në Facebook, që ka kundërshtuar protestat para Kishës ortodokse serbe në Prishtinë dhe dhunën e manifestuar më 17 shtator të vitit 2016.

Edhe Arbëri 1 j. më parë Thaçi ofron 50 mijë euro dorëzani për lirim me kusht

Është thënë se Thaçi kishte dalë në mbrojtje, duke thënë se nuk duhet toleruar dhunën ndaj këtyre objekteve, veçanërisht kur u takojnë komuniteteve fetare.

E nga Hooper është thënë se shkaku i këtij postimi Thaçi ishte kritikuar ashpër në seancë në Kuvend të Kosovës më 29 shtator të vitit 2016, e ndër të tjera ka përmendur një kritikë nga Glauk Konjufca i VV-së.