2 perditesime
18:05

VV-ja thotë se PZAP-ja veproi në një vijë me Dakën

Lëvizja Vetëvendosje ka thënë se PZAP-ja ka vepruar sot në një vijë me tre anëtarët e KQZ-së, kryetaren Valdete Daka, dhe përfaqësuesit e LDK-së dhe PDK-së në KQZ, duke moscertifikuar pesë kandidatët e VV-së, përfshirë bartësine listës Albin Kurti.

“Sot Paneli për Ankesa dhe Parashtresa nxori një vendim absurd, duke ia ndaluar kandidimin, kryetarit të Lëvizjes VETËVENDOSJE!, bartësit të listës, Albin Kurti, si dhe kandidatëve tanë, Albulena Haxhiu, Liburn Aliu, Labinotë Demi-Murtezi dhe Bajram Mavriqi. PZAP veproi në një vijë me tre anëtarët e KQZ-së, Valdete Dakën, dhe përfaqësuesit e LDK-së e PDK-së, duke sajuar argumente të paqena juridike dhe kushtetuese vetëm sa për të prodhuar këtë pengesë që është në fakt një padrejtësi e shumëfishtë. Të konfirmosh, siç ka bërë PZAP, nën direktivën arbitrare të kryesueses së KQZ-së, përjashtimin nga lista zgjedhore të të kandiduarve, do të thotë që të gjykosh për të dytën herë atë që Gjykata tashmë e ka përmbyllur pa pasoja juridike. Pra, praktikisht PZAP po jep dënim me masë më të rëndë se sa parashihet me ligj. E kjo as është detyrë e PZAP-së, e as është e imagjinueshme në një shtet të së drejtës dhe demokratik. Kështu si ky vendim sot duket vetëm inkuizicioni. Inkuizicion politik e juridik”, thuhet nga Vetëvendosja.

Por, nga VV-ja thonë se nuk mund të ndalet kandidimi i Kurtit dhe të tjerëve.

“Kjo padrejtësi e dalë haptazi bashkë me aktorët që e bartin atë ndër vite në Kosovë, është kufizim i të drejtave në atë shkallë që synon eliminimin politik. Këto vendime, pra, ai i disa anëtarëve të KQZ dhe ky sot i PZAP-së, janë shpërfaqje e një konjukture që i rri mbi krye institucioneve duke ua zënë frymën demokratike. Por jo edhe për shumë gjatë. Kandidimi i Albin Kurtit dhe i kandidatëve të tjerë nuk do të mund të ndalet, sepse kështu e thotë e drejta, dhe lista e VETËVENDOSJE!-s do të paraqitet e plotë e fitimtare në zgjedhjet e 14 shkurtit sepse kështu po e kërkon populli”, thuhet nga VV-ja.

16:55

Vetëvendosje do të ankohet në Supreme kundër vendimit të PZAP-së

Zyrtari ligjor i Lëvizjes Vetëvendosje, Blerim Sallahu, ka thënë se do të bëhet ankesë në Gjykatën Supreme kundër vendimit të PZAP-së për të moscertifikuar pesë kandidatë të VV-së, përfshirë edhe bartësin e listës Albin Kurti.

Sallahu e ka quajtur anti-kushtetues vendimin e PZAP-së.

“Brenda afatit ligjor do të bëjmë ankesë në Gjykatën Supreme kundër vendimit antikushtetues të PZAP-së. Nuk do të ndalemi!” – ka shkruar Sallahu.

 

16:42

Zëdhënësi i VV-së: Fitorja do të jetë madhështore

Zëdhënësi i Vetëvendosjes, Përparim Kryeziu, ka thënë se fitorja e kësaj partie do të jetë madhështore.

Ai ka reaguar në Facebook pas vendimit të PZAP-së për moscertifikimin e kandidatëve që kanë probleme me ligjin.

“Një sistem i tërë përballë të drejtës së pashmangshme. Prandaj fitorja do të jetë madhështore”, ka shkruar Kryeziu në Facebook.

Ka reaguar edhe zëdhënësi tjetër i VV-së, Arlind Manxhuka.

“LV-ja do të jetë me Albin Kurtin në zgjedhje e me Albin Kurtin kryeministër. Regjimi i vjetër e fake news-t nuk mund ta hutojnë askënd. #KREJTdheDREJT”, ka shkruar Manxhuka.