2 perditesime
23:23

Reshitaj: Lista e AAK-së ka kandidatë të profileve të ndryshme

Ish-deputetja e AAK-së, Albena Reshitaj, ka deklaruar se partia e saj ka në listë kandidatë të moshave dhe profileve të ndryshme. Sipas saj, lista e AAK-së në zgjedhjet parlamentare është e veçantë sepse dallon nga listat e tjera, me kandidatë të rinj dhe të panjohur në skenën politike.

“Është e rëndësishme që kemi kandidatë potencialë për të qenë deputetë në Parlamentin e Kosovës nga doktor shkencash, specialistë të fushave të ndryshme, ekonomisë, juristë, sociologë, psikologë dhe politikologë. Ajo më e veçanta e listës sonë që dallon të tjerat është një përqindje shumë e madhe e kandidatëve të rinj, të panjohur për skenën momentale politike mirëpo jo të rinj në aspektin e panjohurive”, ka deklaruar Reshitaj.

Ajo ka potencuar se partitë e tjera duhet të marrin shembull nga partia e saj për këtë reformë politike.

Lidhur me deputetët që janë të përfshirë aktakuza, Reshitaj ka deklaruar se duhet pritur vendimin e Gjykatave.

“Duke i njohur si individë dhe me aktakuzat që janë, unë si qytetare e kisha pritur vendimin e Gjykatës sepse nuk është mirë të linçohen apo të vihet gisht ndaj njerëzve”, ka deklaruar tutje ajo.

“Konsideroj se derisa nuk ka një vendim të prerë, këto mund të qëndrojnë në aktakuza”.

 

23:14

Reshitaj mburret pse skandalet në MPJ dolën në kohën e ministres Haradinaj-Stublla

Ish-deputetja e AAK-së, Albena Reshitaj, ka shprehur mburrje për “guximin” që ministrja në detyrë e Punëve të Jashtme, Meliza Haradinaj-Stublla, ka treguar në kohën e menaxhimit të saj me MPJ-në, me “nxjerrjen në shesh të skandaleve në diplomaci”.

Edhe pse puna në diplomaci viteve të fundit është përcjellë me shumë skandale të punësimeve, Reshitaj ka arritur të gjejë “një të mirë”.

“Të gjitha këto shpërfaqje të gabimeve të cilat janë paraqitur në media, s’kanë qenë gjëra të cilat kanë filluar apo ishin pjesë e veprimit të punës që ka bërë minstjra Haradinaj-Stublla. Ka qenë një momentum i cili ka shpërfaqur një situatë jo të mirë, dhe punë me shumë gabime, shumë vite me radhë, në këtë dikaster”, ka thënë ajo në Interaktiv të KTV-së. “E vetmja gjë e mirë e gjithë kësaj të keqe ka qenë guximi i kësaj ministreje, partisë nga ku ajo vjen, që të dalin në shesh. Pse janë fshehur kaq shumë vite?”

E pyetur për të komentuar se përse ishin mediumet ato që nxorën skandalet në shesh dhe jo partia, Reshitaj ka pyetur se “përse s’janë zbuluar qe 20 vjet?”

“Duhet të bëhet një analizë e mirë, pse s’janë zbuluar deri tani”, ka shtuar më tej ajo.

Ndër skandalet më të mëdha në vitet e fundit ishte punësimi i djalit të deputetit Haxhi Shala, në pozitën e konsullit në Pragë. Për këtë KOHA raportoi e para.

23:06

Reshitaj: AAK-ja ka një program të mirë për sistemin ekonomik

Ish-deputetja e Aleancës për Ardhmërinë e Kosovës, Albena Reshitaj, ka deklaruar se partia e saj ka program të mirëfilltë për qeverisjen e ardhshme. Ajo ka thënë se AAK-ja u ofron qytetarëve të vendit program të mirë ekonomik, duke i analizuar situatat, gabimet dhe pasojat e sistemit ekonomik.

"Duhet ta përmendim se në bazë të kësaj analize, Kosovës i nevojiten mbi 1 miliard euro për rimëkëmbjen ekonomik. Kosova ka vuajtur nga një keqmenaxhim dhe mosnjohje adekuate, nga njerëz të vendosur në pozita të rëndësishme”, ka deklaruar Reshitaj.

Ajo tutje ka thënë se ministri në detyrë i Drejtësisë, Selim Selimi, i cili i takon AAK-së, ka bërë punë të mëdha në sigurinë dhe sistemin e ligjit.

“Një respektim apo implementim i ligjeve do të ishte sukses i madh përpara për respektimin e ligjit. Ne kemi qenë një anomali e qeverive në të kaluarën. Në pjesën e AAK-së, sistemi për herë të parë ka bërë ndryshime thelbësore. Janë parë ndryshimet që janë bërë brenda drejtësisë”, ka theksuar ajo.

Reshitaj tutje ka potencuar se programet e partive politike në këto zgjedhje duhet të fokusohen në fushën e shëndetësisë për shkak të pandemisë së koronavirusit.