1 perditesime
17:07

Haradinaj thotë se Evropa po çon në bashkim kombëtar të shqiptarëve

Kandidati për president nga Aleanca për Ardhmërinë e Kosovës, Ramush Haradinaj, ka lënë përgjegjës Bashkimin Evropian se po krijon rrugë për bashkimin kombëtar të shqiptarëve.

Në prezantim të programit në parafushatë, Haradinaj ka thënë se nëse Bashkimi Evropian vazhdon ta lë “të varur” Kosovën, do të hapet rruga për referendum për bashkim me Shqipërinë”.

“Kam një pyetje të hapur për të gjithë ju. Çka ndodh pas katër ose pesë viteve nëse nuk ka progres në Kosovë, dhe duhet ta kuptoni saktë pse po e bëj këtë pyetje. Nëse Kosova nuk është në dyert e NATO-s, e nëse Kosova nuk ka liberalizim të vizave nga BE-ja, nuk ka njohje nga pesëshja e BE-së dhe na mbajnë të varur si na kanë mbajtur deri tash, e nëse nuk jemi në dyert e OKB-së çka ma andej? A do ta pranojmë atë që janë munduar me më bindë mua se Kosova është e lodhtë, e dobët, nuk mundet të ketë Ushtrinë, pavarësimin energjetik, ligjin për Trepçën, se duhet të ulemi ne dialog me u nda me Serbinë në mënyrë që çka të jetë për të fituar pavarësinë. A duhet ta pranojë këtë epilog njëherë në Kosovë, dhe kush mund ta pranojë këtë epilog, dhe nëse jo, atëherë çka..? A duhet të pranojmë se jemi në konflikt të ngrirë siç po thotë Vuçiqi nganjëherë atje?”, ka pyetur Haradinaj. “Do të vijë ajo ditë që do të duhet me ditë presidenti i ri amerikan, kancelarja gjermane ose kancelarja ose kancelari i ri gjerman, se çka do t’i thonë Kosovës në vitin 2024, 2025, apo 2026. A kanë për t’i thënë rrini e pritni se kemi me bë diçka me juve. Nuk kemi për të pranuar me mbet as konflikt i ngrirë e as nuk kemi për të pranuar me na nda, por kemi për të shkuar në referendum për bashkim me Shqipërinë, mbajeni mend këtë, jo se ne po duam, por qe 20 vjet i kemi dhënë fjalën Perëndimit që po duam me respektuar një vizion të përbashkët për një Kosovë euro-atlantike me hy në BE me shku në NATO, me u bë anëtare e OKB-së, me na njohë Serbia, dhe me dashtë BE-ja me i bindë pesë vendet me na njoh jo me na lënë kështu të varur gjatë, deshi Amerika na ndihmoi me marrë njohjen e Izraelit, ndërsa ku janë partnerët tanë evropian, pse na mbajnë kështu të izoluam, pse na lënë me pritë, e kohë pas kohe na thonë se e keni këtë faj e atë faj. A nuk pat asnjë faj Serbia dhe vendet tjera fqinjë, ata të përkryer apo? Nuk mund të rrimë të varur derisa dikush ta ketë disponimin për t’u kryer çështja e Kosovës”, është shprehur Haradinaj.

15:21

Haradinaj prezanton programin e AAK-së: Hyjmë në zgjedhje për të fituar

Kryetari i Aleancës për Ardhmërinë e Kosovës, Ramush Haradinaj ka prezantuar programin qeverisës të partisë së tij.

Ai ka thënë se me programin 2021-2025 Aleanca hyn me bindje për fitore dhe sukses në këto zgjedhje. Ai e ka përmendur Ushtrinë e Kosovës si një nga meritat e ish-qeverisjes së tij.

“Po i përmend disa punë të kryera pse besojmë që e meritojmë besimin e qytetarëve. Nga 24 punë të kryera të rëndësishme e veçojmë Ushtrinë e Kosovës, pronësinë mbi Trepçën, pavarësimin energjetik transmisioni i kartë Kosovë-Shqipëri, ligji për kryeqytetin dhe ligji për pagat i cili ende nuk është në zbatim. Pse ne besojmë që do ta marrim besimin e qytetarëve jeni ju anëtarë të listës njerëz profesionalë e me integritet. Shumë prej jush e keni pasur mundësinë të dëshmoheni para qytetarëve por shumë prej juve nuk jeni dëshmuar ende dhe Aleanca ua ka dhënë mundësinë”, ka thënë ai.

Haradinaj ka shtuar se AAK-ja e ka programin e përfunduar për mandatin e ardhshëm.

“Program i plotë dhe i kompletuar. Programi përmban disa shtylla. E para, Ekonomia, është një plan i detajuar i cili e ka gjetur formulën sesi të dalim nga kriza ekonomike që e ka shkaktuar pandemia. Fondi i ringjalljes prej 1 miliard që e kemi paraparë, e garanton daljen nga kriza. Dhe në këtë shtylla është paraparë edhe plani për zhvillimin ekonomik në katër vitet e ardhshme që do të jetë zhvillim i qëndrueshëm. E dyta siguria shteti i të drejtës. Shtylla e tretë fushat sektoriale, arsimi shëndetësia mjedisi rinia sporti. E dimë që ka pasur mangësi në qeverisjen në këto fusha dhe e kemi gjetur formulën si ti adresojmë sfidat në këta sektorë. Shtylla e katër fokusim i yni është politika e jashtme fuqizimi i shtetit në arenën ndërkombëtare dhe anëtarësimi i Kosovës në NATO, BE dhe organizata tjera ndërkombëtare”, ka thënë tutje Haradinaj.

Ministrja në detyrë e Punëve të Jashtme, Meliza Haradinaj ka thënë se programi i AAK-së garanton që Kosova është e paprekshme dhe e pakushtezueshme.

“Bashkëpunimi i përhershëm strategjik me SHBA-të, është gurthemeli i politikës sonë të jashtme. Përgjegjësia për forcimin e Kosovës bie mbi ne që jemi rreshtuar përkrah presidentit të ardhshëm të Kosovës dhe gardianit të Kosovës së pacenueshme, Ramush Haradinaj. Programi i sotëm është operacionalizim i vizionit të tij për mbi dy dekada. Përmes këtij programi do të mbrojmë sovranitetin territorin e Kosovës, trashëgiminë historike. Diplomacinë do ta fokusojmë në arritjen e njohjes universale të shtetësisë së Kosovës. Shumë shpejt do ta formalizojmë njohjen edhe nga Izraeli. Duke e shtyrë Kosovën në NATO, SHBA-ja avancon interesat në Ballkan dhe largon ndikimin destruktiv të Rusisë. Do të përgatitemi për anëtarësimin e Kosovës në organizata të rëndësishme ndërkombëtare, që të jemi gati për aksion menjëherë pas skadimit të moratoriumit më 4 shtator. Do ta kthejmë Kosovën në Silicon Valley me investime”, ka thënë ajo.