Kërkohen sjellje të përgjegjshme dhe përmbajtje nga dhuna
Foto: Reuters
Është mbajtur edhe të premten në mbrëmje protesta e tretë radhazi për vrasjen e Klodian Rashës. Protesta zhvillohet në disa pika të kryeqytetit Tiranë, ndërsa protestuesit hedhin sende të forta, shkatërrojnë reklamat në rrugë, apo dhe semaforët, madje dhe stacionet e autobusëve, ndërsa policia është kundërpërgjigjur me gaz lotsjellës. Sikurse edhe të enjten, protestuesit kanë bllokuar rrugën me kazanë mbeturinash. Protestuesit, që më pas i janë drejtuar Drejtorisë së Policisë së Tiranës, janë përplasur me efektivët që janë vendosur për monitorimin e tubimit. Efektivët e policisë kanë nisur edhe shoqërimin e protestuesve në ambientet e Komisariatit. Mësohet se 10 të rinj janë shoqëruar nga forcat “Shqiponja”, te cilët i kapën protestuesit në rrugicat e lagjes.
Premium
“Ata që kërkojnë të jenë në pushtet duhet të shfaqin aftësinë e tyre për të udhëhequr në një mënyrë të përgjegjshme, përfshirë edhe duke refuzuar dhunën. Ata që kanë qenë në pushtet më parë nuk duhet të bëjnë gabimet e së kaluarës, duke sugjeruar se dhuna është e pranueshme”, thuhet në komunikatën e lëshuar pas takimeve të ambasadores Kim me Ramën, Bashën, Kryemadhin dhe drejtorin e policisë, Veliu
Është mbajtur edhe të premten në mbrëmje protesta e tretë radhazi për vrasjen e Klodian Rashës. Protesta zhvillohet në disa pika të kryeqytetit Tiranë, ndërsa protestuesit hedhin sende të forta, shkatërrojnë reklamat në rrugë, apo dhe semaforët, madje dhe stacionet e autobusëve, ndërsa policia është kundërpërgjigjur me gaz lotsjellës. Sikurse edhe të enjten, protestuesit kanë bllokuar rrugën me kazanë mbeturinash. Protestuesit, që më pas i janë drejtuar Drejtorisë së Policisë së Tiranës, janë përplasur me efektivët që janë vendosur për monitorimin e tubimit. Efektivët e policisë kanë nisur edhe shoqërimin e protestuesve në ambientet e Komisariatit. Mësohet se 10 të rinj janë shoqëruar nga forcat “Shqiponja”, te cilët i kapën protestuesit në rrugicat e lagjes.
Protestat e dhunshme që kanë përfshirë prej tri ditësh kryeqytetin e Shqipërisë Tiranë, pas vrasjes më 8 dhjetor të 25-vjeçarit Klodian Rasha nga një efektiv i policisë së Tiranës, kanë vënë në lëvizje edhe diplomacinë amerikane të akredituar në Shqipëri. Yuri Kim thekson se ka takuar për rastin kryeministrin Edi Rama, kreun e PD Lulzim Basha, kryetaren e LSI Monika Kryemadhi, drejtorin e Policisë Ardi Veliu, duke shtuar se ata që janë në pushtet kanë përgjegjësi të sigurojnë një hetim të plotë dhe transparent të incidentit, të ushtrojnë përmbajtje në mbrojtjen e sigurisë dhe pronës publike, si dhe të sigurojnë përgjegjësi në të gjitha rastet. Ndërsa për ata që kanë qenë në pushtet më parë, ambasadorja e SHBA-së u ka sugjeruar që nuk duhet të bëjnë gabimet e së kaluarës, pasi dhuna është e papranueshme.
Kim thekson se vdekja e të riut është një tragjedi, duke shprehur ngushëllime për familjarët dhe të afërmve të tij. “Vdekja e Klodian Rashës është një tragjedi dhe ne i shprehim ngushëllimet më të thella familjes dhe miqve të tij. Ambasadorja Kim bisedoi sot me Kryeministrin Rama, Drejtorin e Policisë Veliu, Kryetarin e Partisë Demokratike Basha dhe Kryetaren e Lëvizjes Socialiste për Integrim Kryemadhi, për të diskutuar mbi të drejtat e qytetarëve dhe përgjegjësitë e udhëheqësve. Ajo nënvizoi se ata që janë në pushtet kanë përgjegjësinë të sigurojnë një hetim të plotë dhe transparent të incidentit, të ushtrojnë përmbajtje në mbrojtjen e sigurisë dhe pronës publike, si dhe të sigurojnë përgjegjësi në të gjitha rastet. Në këtë drejtim, ne vërejmë se autoritetet kanë kapur oficerin në fjalë dhe kanë nisur hetimet. Ata që kërkojnë të jenë në pushtet duhet të shfaqin aftësinë e tyre për të udhëhequr në një mënyrë të përgjegjshme, përfshirë edhe duke refuzuar dhunën. Ata që kanë qenë në pushtet më parë nuk duhet të bëjnë gabimet e së kaluarës, duke sugjeruar se dhuna është e pranueshme. Ambasada e Shteteve të Bashkuara u bën thirrje të gjitha palëve të tregojnë përmbajtje, në përputhje me përgjegjësitë e tyre, në mënyrë që të drejtat e të gjithë qytetarëve shqiptarë të mbrohen, dhe që zërat e tyre, përfshirë atyre në protestë, të kenë mundësi të shprehen dhe të dëgjohen pa dhunë”, thuhet në komunikatën e lëshuar nga ambasada amerikane në Tiranë.
Rama akuzon presidentin dhe opozitën
Më herët gjatë ditës kryeministri Rama akuzoi drejtpërdrejt opozitën dhe Presidentin e Republikës Ilir Meta për nxitje dhe orkestrim të dhunës në protestë. Në një postim në Tëitter, Rama shkruan se “kjo dhunë poshtëron kujtimin e Klodianit, gjoja për drejtësi, por në fakt vetëm për hesapet politike të Lulit Saliut, IIlirit, Monikës!”
Sipas tij, arsyeja është dëshpërimi se s’kanë asnjë shans të rikthehen në pushtet me zgjedhje.
Ndërkohë Rama ka një apel “për prindërit e minorenëve të abuzuar nga LSI”.
“Opozita dhe Presidenti janë jo vetëm nxitësit, po edhe orkestruesit e dhunës që poshtëron kujtimin e Klodianit, gjoja për drejtësi, por në fakt vetëm për hesapet politike të Lulit Saliut IIlirit Monikës! Janë të dëshpëruar se s’kanë asnjë shans të rikthehen në pushtet me zgjedhje! S’kanë më njësi komunale për të mbushur autobuzë, e dinë që përveç turmës së tkurrur të militantëve s’i ndjek më askush dhe paguajnë lart e poshtë deri edhe minorenë, duke u kërkuar të thyejnë e djegin rrugëve të qytetit, që të thonë ja s’ka rend, s’ka siguri, s’ka shtet. Dhe ndërkohë që polici fajtor del para gjykatës, ministri i Brendshëm jep dorëheqjen (edhe pse aspak fajtor, po qytetar fisnik që njeh ndjesën), Saliu krenohet si ka vrarë e si do të vriste akoma, Iliri akuzon policinë, Monika shpërndan gurët, Luli ha përshesh e pret të bëhet dhëndër! Thirrja ime për prindërit e minorenëve të abuzuar nga LSI është ruajini fëmijët nga kthetrat e të paudhëve pa atdhe, ndërsa për këdo tjetër që merr rrugët për të thyer e për të djegur, duhet të jetë shumë e qartë që loja e forcës me ligjin e me shtetin mbaron prapa hekurave!”, shkruan Rama.
Kryeministri Rama drejtoi sërish gishtin e akuzës mbi Presidentin e Republikës Ilir Meta dhe ish-kryeministrin Sali Berisha për protestën dhe dhunën, pas një vizite që u bëri mbrëmjen e së premtes, punonjësve të policisë që janë plagosur në protestat e dhunshme të këtyre ditëve. Rama tha se ata janë nxitës dhe orkestrues dhe se minorenët në protestë janë manipuluar e abuzuar për të vënë nën hu e zjarr kryeqytetin.
“Ato dhjetërat bëni mirë në radhë të parë të mos i flisni me dhjetëra por t’i numëroni. Ato plagosjet bëni mirë t’i shikoni dhe evidentoni e të mos i zmadhoni. Me dhjetëra janë punonjësit e policisë që kanë ardhur në spital, është një sa për dhjetëra. Kush del në protestë, ka gjithë të drejtën e Zotit dhe të drejtën e vet të manifestojë indinjatën e tij për një akt që ka indinjuar të gjithë, por nuk ka të drejtë të prekë asnjë fije floku të askujt tjetër. Policia e Shtetit nuk është një lukuni njerëzish të mbledhur me lekë dhe të nxitur dhe të orkestruar nga një Presidenti i Republikës që akoma s’e ka dënuar dhunën, akoma nuk është kujtuar t’i thotë një fjalë kësaj familjeje që rri këtu, babë e nënë me zemër dridhur për efektivin e policisë, por del dhe një orë përpara lajmit se po i vjen fundit botës nga kjo lukuni dhe inkurajon lukuninë dhe vë gishtin mbi policinë. Prova është kjo që sapo thashë. Prova janë fjalët e presidentit të Republikës që është nxitës dhe orkestruar, bashkë me atë tjetrin, ish-presidentin e Republikës që sot është krenar se ka vrarë njerëz, që u tregon shqiptarëve se dhuna është rruga për të bërë përpara në këtë vend dhe në këtë shoqëri. Prova janë ato pamje, dhe ata minorenë që janë të manipuluar dhe të abuzuar dhe patjetër të joshur dhe me para për të marrë rrugët dhe për të bërë ato që bëjnë pa qenë të vetëdijshëm për çfarë bëhet fjalë. Për minorenët nuk mund të hyjmë në diskutim që ka ndonjë axhendë politike. Është e pandodhur që partia e presidentit të përdorë minorenët për të vënë nën hu e nën zjarr kryeqytetin. Këto janë gjëra që duhen vënë me radhë sipas peshës dhe sipas goditjes që i bëjnë qetësisë dhe sigurisë së njerëzve psikologjikisht dhe pastaj të flasim për ata që ankohen se përse policia reagon. Policia ka qenë përtej kufijve të tolerancës, qoftë natën e parë, qoftë natën e djeshme. Policia si në të gjithë botën ka detyrën të reagojë në mënyrë proporcionale dhe as të tërhiqet dhe as të pranojë të goditet dhe të lërë dritën e syve këtu se duan disa të bëjnë shesh e përshesh bashkë në mes të Tiranës”, tha Rama.
Të premten në Gjykatën e Shkallës së Parë në Tiranë është vendosur masa e sigurisë për policin që akuzohet se ka vrarë 25-vjeçarin. Efektivi që vrau Klodian Rashën dy ditë më parë ka shfaqur pendesë në seancën e sotme në Gjykatën e Tiranës ku dhe iu komunikua masa e arrestit me burg. Polici N.H, ka bërë një ndjesë publike në seancë për familjen e Klodian Rashës teksa u shpreh se nuk kishte qëllim ta vriste, por vetëm mendoi se jeta e tij ishte në rrezik. Efektivi i Policisë është shprehur në seancë se nuk donte ta vriste Rashën, por e kreu aktin duke menduar se po i rrezikohej jeta e tij. ”Kërkoj ndjesë publike në pamundësi për t’ua kërkuar familjarëve. Do të doja t’i kisha këtu e t’i kërkoja falje, sepse nuk kisha qëllim për ta vrarë.”- tha efektivi i Policisë N.H.
