Arbëri

Oda e Hotelerisë dhe Turizmit paralajmëron padi dhe protesta ndaj Qeverisë së Kurtit dhe Hotit

Oda e Hotelerisë dhe Turizmit ka paralajmëruar protestë në rast se as në seancën e ardhshme nuk kalon Pakoja e Rimëkëmbjes Ekonomike. Veç tjerash, kanë njoftuar se edhe nuk do të respektojnë masat në fuqi.

Kryetari i kësaj ode, Hysen Sogojeva, ka bërë të ditur se do të padisin qeverinë Kurti dhe Hoti, për masat që janë marrë gjatë kësaj kohe, e që sipas tij kanë qenë antikushtetuese.

Pas më shumë se një orë e gjysmë takim, Oda e Hotelerisë dhe Turizmit ka marrë disa vendime në rast se nuk kalon Pakoja e Rimëkëmbjes Ekonomike.

"E para u vendos që të kalohet sa më parë Projektligji për rimëkëmbjen ekonomike. Përndryshe pas kësaj, nëse kjo nuk kalohet do të pasojnë protestat, ndoshta fillohet iniciativa e padëgjueshmërisë së këtyre masave aktuale. Pastaj të paguhen të gjithë punëtorët, sepse ende nuk janë paguar punëtorët të cilët e kanë pasur obligim. Interesi bankar të stopohet sa më parë, kjo mos të na i trazojë bizneset hoteliere në Prishtinë", tha ai.

Sogojeva pas këtij takimi tha se po kërkohet edhe që të paguhet qiraja, pasi sipas tij njerëzit janë në hall.

"Ne si Odë morëm vendim që të ngremë padi ndaj qeverisë edhe të kaluarës edhe kësaj sot, sepse deri në Ligjin e pandemisë të gjitha vendimet kanë qenë antikushtetuese, andaj ne do të ngremë padi kolektive, sepse dëmet të cilat janë bërë në atë kohë t'i kthehen bizneseve", ka shtuar ai.

Ai ka shtuar se do të dakordohen edhe me odat tjera, që në rast se edhe në seancën e ardhshme nuk kalon Pakoja e Rimëkëmbjes Ekonomike, do të fillojnë protestat. Ndër tjera, kanë kërkuar sa më parë të shfuqizohen masat të cilat janë në fuqi, meqë siç tha Sogojeva, këto nuk po ndihmojnë në mospërhapjen e COVID-19./KsP