Vllasi: Për shkak të problemeve tona të brendshme Evropa po heziton për vizat

Avokati Azem Vllasi në emisionin Desku në KTV ka thënë se Evropa po heziton të heq vizat për Kosovën për shkak të problemeve të brendshme të Kosovës.

“Më së afërmi heqja e vizave ishte kur na thanë ratifikone marrëveshjen e demarkacionit me Malin e Zi ne me lotsjellës në Kuvend. Sikur të ratifikohej ajo marrëveshje do të kryhej. Çështja e luftës kundër korrupsionit është një çështje permanente nuk është një akt, nuk kemi dhënë shenja”, ka thënë Vllasi.

Ai ka shtuar se shtetet e Unionit Evropian janë të frikësuara se pranë kësaj gjendje brenda siç e kemi në Kosovë nuk po dimë me e bë një shtet funksional me gjithë këtë përkrahje të jashtme.

“Për shkak të problemeve tona të brendshme Evropa po heziton me na i heq vizat”, ka thënë ai.

Avokati Azem Vllasi në emisionin Desku në KTV ka thënë se politika amerikane ndaj Kosovës nuk do të ndryshojë pavarësisht rezultatit në zgjedhjet në SHBA.

“Besoj se qëndrimi i Amerikës ndaj Kosovës nuk do të varet prej asaj se kush do të jetë në Shtëpinë e Bardhë. Mos të harrojmë se presidenti Bushi i vjetër e kërcënoi Millosheviqin, pastaj demokrati Klintoni në pushtet, pastaj republikani Bushi i ri. Ky Trumpi edhe pse ka shumë rezerva edhe kritika ndaj demokratëve që ishin në Shtëpinë e Bardhë megjithatë kjo që ndodhi në Washington tregon se ka përkushtim ndaj Kosovës”, ka thënë Vllasi.

Ai thotë se Trumpi ka polarizuar politikën amerikane.

“Ne nuk duhet të përzihemi kush do të jetë atje kryetar. Duhet të pritet edhe një ditë a dy derisa të shohim rezultatin final, por Amerika qe një kohë gjatë Trumpit është shumë e polarizuar. Trumpi nuk është politikan por është njeri i biznesit, dhe shumë amerikanë të cilëve nuk u intereson se çfarë ndodh në botë Trumpin e pëlqejnë, stilin e tij”, ka thënë ai.

Sipas tij Bideni do të fitojë, megjithatë thekson se politika ndaj Kosovës do të mbetet e njëjtë.

“Njerëzit në Amerikë gjithnjë e më pak i adhurojnë politikanët e karrierës. Por, Bideni megjithatë e ka një karrierë të gjatë dhe të ndritshme politike. Unë besoj se ai do të fitojë por Trumpi nuk do ta pranojë menjëherë që t’ia urojë. Ndaj Kosovës nuk do të ketë ndryshim pamarrëparasysh kush do të jetë në Shtëpinë e Bardhë”, ka thënë Vllasi.

Avokati Azem Vllasi në DESKU të KTV-së ka thënë se Kosova ka humbur besueshmërinë dhe përkrahjen e partnerit kryesor ndërkombëtar, SHBA-së.

Ai këtë e ka përmendur si pasojë afatgjate që shteti kosovar do ta ketë.

“Pasoja afatgjate janë se e kemi humbë besueshmërinë dhe përkrahjen te miqtë kryesorë perëndimorë, te Amerika dhe shtetet evropiane, për shkak të sjelljeve tona të brendshme. Lufta kundër korrupsionit, ata thonë luftojeni korruspionin se korrupsioni e shkatërron shtetin, nuk ka rezultate. Ka gjëra të tjera që perëndimorët, përkrahësit kryesorë kogja janë ftohë nga ne”, tha ai.

Ndërkaq, Vllasi ka përmendur edhe pasojat afatshkurta që Kosova po pëson nga procese politike dhe të tjera.

“Kemi shumë probleme prej pandemisë dhe pasojat e saj, e të tjera. E kemi një qeveri të brishtë që kërcënohet prej partnerit tjetër qeveritar, pasojat afatshkurta do ndihen në jetën e përditshme, para se gjithash në ekonomi. Dialogu me Serbinë nuk duhet të bëhet temë aq të madhe sa po e bëjmë, po e teprojmë me të”, ka thënë ai.

Sipas tij, shumë energji po shpenzohet me dialogun, një process që ai thotë se nuk I dihet fundi.

“Po teprophet sepse shumë energji po harxjhojmë në atë proces të cilit nuk i dihet fundit. Pozicioni i Kosovës dhe ajo që e thekson kryemisnitri Hoti, më ën fund është i mirë e pozicioni është s'ka kurrfarë marrëveshje finale nëse nuk rezulton me njohje reciproke, njohjen e Koosvës nga Serbia”, përfundon Vllasi.

Sipas avokatit Azem Vllasi, nëse Gjykata Speciale do të akuzojë shumë figura të Ushtrisë Çlirimtare, atëherë UÇK-ja do të duket si strukturë kriminale në opinion.

“Përgjegjësia individuale është standard dhe kategori e të drejtës penale, mirëpo nëse përfshihen në aktakuza njerëz kryesorë të shtabit të UÇK-së dhe nëse bëhen shumë aso individë, të kreut të rezistencës së armatosur apo të luftës çlirimtare, apo të UCK-së, objektivisht del se ajo po kualifikohet si një strukturë që ka pasur në krye, në shtab, individë që kanë bërë krime dhe del si strukturë kriminale”, ka thënë ai.

Vllasi ka thënë se Specialja ka nisur raste ndaj krerëve të UÇK-së, por s’ka zbuluar asgjë.

Avokati Azem Vllasi në DESKU të KTV-së thotë se zgjidhja më e lehtë në situatën e krijuar në Kosovë ku presidenti i deritanishëm, Hashim Thaçi, dha dorëheqje, do të jetë zgjedhja e një presidenti jopartiak.

“Nuk ka nevojë të priten zgjedhje të reja, për shkak të zgjedhjes së kryetarit, mundet edhe Kuvendi, jam i bindur se kandidati për president duhet të jetë dhe të zgjidhet një person jashtëpartiak. Partitë duhet të merren vesh dhe t’i bëjnë numrat për një kandidat jashtëpartiak sepse sipas Kushtetutës presidenti është i gjithë qytetarëve”, tha ai.

Vllasi ka thënë se zgjedhja e një presidenti nga një parti do të sillte mosmarrëveshje më shumë mes tyre e sipas tij më e lehta do të ishte një jopartiak.

“Nëse partitë merren vesh që të jetë i një partie, çfarëdo që mundohet të jetë kryetar i të gjithëve, megjithatë do të shihet president i asaj partie të cilës i përkiste dhe do shihet si partisë së tij e jo i Kosovës. Më së miri do ishte president jopartiak. Më lehtë është partitë të merren vesh për një njeri jashtë partie, sesa të merren për ndonjë të një partie”, ka shtuar ai.

Avokati Azem Vllasi ka thënë se deputetët e Kuvendit të Kosovës nuk do të duhej të votonin pro krijimit të Gjykatës Speciale për hetimin e krimeve të luftës.

Ai në DESKU të KTV-së thotë se beson se ata njerëz të cilët akuzohen për ngjarje gjatë kohës së luftës, do të kalojnë më lehtë në procedurë gjyqësorë në Speciale, për shkak se sipas tij, ka qenë pikërisht kohë lufte kur kanë mundur të ndodhin ato.

Ajo që i dha “hije të rëndë” Kosovës, Vllasi thotë se ishte hetimi për krime pas luftës, gjatë vitit 2000.

“Besoj se për atë kohën e luftës, konfliktit të armatosur 98-99, ata që janë të akuzuar për ngjarje të ndryshme të asaj kohe do kalojnë shumë më lehtë para gjykatës sepse kanë ndodhë gjëra gjatë luftës. Kompetenca kohore e Dhomave Speciale është viti 98-99-2000, edhe pas luftës. Pas luftës, sepse kur nuk ishte pushteti serb vriteshin shqiptarët për motive më të ndryshme që e vuri një hije të rëndë dhe të keqe nga ato që ishte para 99-s, pra që ishte lufta çlirimtare dhe rezistenca. Ne ishim atëherë të përkëdhelurit e botës, deri e bëmë shtetin dhe më andej, tash kemi ardhë në situatë prej atyre forcave demokratike që ishim të përkëdhelur, na detyruan të bënim Gjykatë për krime të luftës, që është shumë e rëndë për ne”, shton ai.

Vllasi ka thënë se nëse ishin ata persona që thoni se lufta jonë ishte e drejtë, nuk do duheshin ta krijonin Specialen.

“Ne vetë nuk duhet ta bënim, kuvendi jonë nuk duhej ta bënte atë gjykatë. Nëse ishin njerëzit tanë, në pozicion që lufta ka qenë e drejtë dhe mbrojtëse, lufta jonë ka qenë guerile jo me forca të shtetit”, ka shtuar Vllasi.

© KOHA. Të gjitha të drejtat janë të rezervuara.