Mustafa pas takimit me Haradinajn: Nuk është folur për postin e presidentit

Kryetari i LDK-së, Isa Mustafa, ka mohuar që në takimin e sotëm me Ramush Haradinajn dhe Fatmir Limaj, të jetë diskutuar për postin e presidentit.

“Nuk kemi diskutuar për presidentin. Kemi parë të nevojshme që të ulemi, të bisedojmë e të përgatitemi për buxhetin. Kjo çështje nuk është mirë të hapet, sepse kemi një president në zyre. Nëse dështojmë të zgjedhim presidentin, të gjithë jemi të gatshëm të shkojmë në zgjedhje”, ka thënë Mustafa.

Ai nuk ka dashur të komentojë takimin e djeshëm mes Haradinajt, kreut të PDK-së, Kadri Veseli dhe të presidentit të vendit, Hashim Thaçi.

Kryetari i AAK-së, Ramush Haradinaj, nuk ka pranuar t'i përgjigjet pyetjes nëse do të dalë nga koalicioni qeverisës nëse nuk merr postin e presidentit.

Haradinaj pas takimit që pati sot me krerët e dy partive tjera të koalicionit, Isa Mustafën e LDK-së dhe Fatmir Limajn e NIsmës, tha se beson se do të gjendet një zgjidhje e mirë për të gjithë.

“Nuk jemi në këtë klimë të daljes e të hyrjes, jemi në punë, me përkrah veten dhe vendin, nëpër disa situata që mundemi me qenë. Besojmë se do ta gjejmë një zgjidhje të duhur për të gjithë ne”, ka thënë Haradinaj.

Partia e tij, AAK-ja, ngul këmbë se Haradinajt i takon posti i presidentit dhe anëtarë të kësaj partie në shumë raste kanë kërcënuar me prishje të koalicionit nëse kjo nuk ndodh.

Mandati i Hashim Thaçit si president përfundon në pranverë, por mund të përfundojë edhe më herët, në rast se ndaj tij konfirmohet aktakuza nga Specialja.

Në fakt, sipas Haradinajt, qëllimi i takimit të sotëm me Mustafën e Limajn, ishte ligji për buxhetin dhe ai për rimëkëmbjen ekonomike.

Foli edhe për aktakuzat e Speciales ndaj presidentit Hashim Thaçi dhe kryetarit të PDK-së, Kadri Veseli.

Ai shpreson se nuk do të ketë konfirmim të aktakuzave.

“Besojmë edhe në këtë rast dhe shpresojmë se nuk do ketë konfirmim të propozim aktakuzave. Nëse ka, ne nuk lëkundemi nga besimi në luftën e drejtë të UÇK-së dhe pafajësinë e luftëtarëve të UÇK-së të të gjitha niveleve”, tha ai.

Krerët e dy partive më të mëdha të koalicionit, ai i LDK-së, Isa Mustafa dhe ai i AAK-së, Ramush Haradinaj, janë duke e mbajtur një takim në zyrën e Grupit parlamentar të LDK-së në Kuvend, ka bërë të ditur KP-ja të premten.

Sipas KP-së, në takim është edhe kreu i partisë tjetër pjesë e koalicionit, Fatmir Limaj i Nismës.

Kohëve të fundit është lëkundur goxha shumë koalicioni për shkak të postit të presidentit.

Haradinaj insiston të marrë këtë post pas largimit të Hashim Thaçit. Madje e ka vënë si kusht për bashkëqeverisje me LDK-në.

© KOHA. Të gjitha të drejtat janë të rezervuara.