21:31

Gucati dyshohet për pengim të drejtësisë e frikësim të dëshmitarëve

Kryetari i OVL të UÇK-së dyshohet për pengim në administrimin e drejtësisë, frikësim të dëshmitarëve, hakmarrje dhe shkelje të fshehtësisë së procedures, ka bërë të ditur përmes një njoftimi Zyra e Prokurorit të Specializuar.

Në të shkruhet se Gucati pas arrestimit është transferuar në objektin e paraburgimit të Dhomave të Specializuara të Kosovës në Hagë.

Akuzat ndaj tij janë të parapara në Kodin Penal të Kosovës, sikurse përfshihen në nenin 15(2) të Ligjit nr. 05/L-53 për Dhomat e Specializuara dhe Zyrën e Prokurorit të Specializuar, sipas njoftimit.

ZPS-ja ka bërë të ditur se të dhënat për datën dhe orën e paraqitjes së tij do të bëhen të ditura ditët në vijim.

20:23

Prokurori i Specializuar konfirmon arrestimin e Gucatit, s’jep detaje rreth dyshimeve

Hysni Gucati u arrestua të premten nga Zyra e Prokurorit të Specializuar në pajtim me fletarrestin ndaj tij, ka njoftuar përmes një njoftimi zëdhënësi Christopher Bennet.

“Sipas Ligjit për Dhomat e Specializuara dhe Zyrën e Prokurorit të Specializuar, policia në kuadrin e Zyrës së Prokurorit të Specializuar ka autoritetin dhe përgjegjësinë që të ushtrojë kompetencat që i janë dhënë policë së Kosovës sipas ligjeve të Kosovës. Në Ligjin për Dhomat e Specializuara dhe Zyrën e Prokurorit të Specializuar gjithashtu përcaktohet se personi kundër të cilit Dhomat e Specializuara kanë lëshuar fletarrestim, merret në ndalim”, shkruhet në njoftim.

Njoftimi ka bërë të ditur se EULEX-i kishte dhënë mbështetje operative, në pajtim me mandatin e vet dhe ligjet në Kosovë.

“Edhe Policia e Kosovës (PK) dha mbështetje operative për ZPS-në”, ka bërë të ditur Zyra e Prokurorit të Specializuar.