21:37

Kusari - Lila për Asociacionin: Me këtë diskurs, dëmtimi i shtetësisë së Kosovës do të jetë i madh

Deputetja Mimoza Kusari – Lila në emisionin “Desku” ka komentuar deklaratat e sotme të krerëve të Kosovës dhe Serbisë rreth takimit të nesërm në Bruksel.

Pala kosovare ka deklaruar se nuk do të diskutojë për Asociacionin, derisa ajo serbe ka deklaruar se do të diskutohet vetëm për këtë temë.

E ky diskurs, sipas Kusari-Lilës, mund ta dëmtojë edhe më shumë shtetësinë e Kosovës.

“Pala serbe deklaron se do të diskutojë vetëm për Asociacionin. Duke e parë paternin e informacioneve që vjen nga Kosova dhe nga Serbia, e shohim se në vazhdimësi po mbizotëron ajo çfarë po deklaron Serbia, e jo Kosova. Deri më tash i kemi parë deklarimet e Hotit para se të shkojë në Ëashington se nuk do të diskutohet Ujmani, Mini-Schengeni, këto janë hipoteza. Nëse tash thotë se nuk mund të diskutohet Asociacioni i Komunave pa e premtuar Serbia njohjen është e kotë, sepse Serbia nuk po e premton njohjen. Në fakt Serbia është duke punuar intensivisht që jo mos me ndodh njohja, por me u dëmtuar shtetësia e Kosovës në formatin që ka qenë funksionuar deri më tash”, ka thënë Kusari-Lila. “E kemi një rrëshqitje të rrezikshme të temave dhe unë frikësohem se lejimi i vazhdimit të këtij diskursi do të jetë ende më shumë në dëm të shtetësisë së Kosovës”.

Kusari-Lila është e befasuar edhe me deklaratën e presidentit Hashim Thaçi, i cili paralajmëroi se në Bruksel do të diskutohet për Asociacionin me ç’rast ka bërë thirrje nga Kuvendi që të ndalet Hoti.

“Një element tjetër befasie ishte qasja e presidentit të Kosovës, i cili paralajmëroi temën e Asociacionit në Bruksel dhe i thërret Kuvendit që ta ndalë kryeministrin Hoti. Rezolutat e Kuvendit nuk është se kanë pasur një ndikim të drejtpërdrejt. Ta shohim si sillet PDK-ja. E shoh ose si taktizim të tij, për të ndryshuar kursin ose për të pozicionuar peshën e vendimmarrjes tek zyra e tij. Jam e befasuar që nuk ka pasur koordinim, pasi deri më tani ka pasur ndërmjet Hotit dhe Thaçit. Dhe të vijë deri në këtë pikë tash vetëm ka ndonjë ndryshim, ose nuk ka pasur marrëveshje për të cilën këta kanë pas ndërmjet veti. Dhe ky është një presion publik që presidenti ia bën kryeministrit që të kryejë obligimet që i ka marrë dhe nuk i ka kryer. Po them prapë, kjo mund të mbetet në nivel spekulimi për arsye se nuk kam informacion se pse ka ardhur kjo deklaratë”, ka thënë ajo.

20:44

Kusari - Lila për mocionin: Situata mund të ndryshojë dita-ditës, pakënaqësitë po rriten

Kryetarja e Alternativës, Mimoza Kusari-Lila lidhur me mocionin e mosbesimit ndaj Qeverisë Hoti dhe mos mbledhjen ende të nënshkrimeve të mjaftueshme, ka thënë se situata mund të ndryshojë.

Sipas saj, pakënaqësitë po rriten dhe duhet të ngritët debati në mënyrë që të mbahen përgjegjësitë për premtimet që janë dhënë.

“Unë besoj që nëse partitë në Kosovë, përfshirë edhe deputetët e LDK-së e shohin vetën si ata që duhet të marrin një vendim, që duhet qëndruar në krah të interesave të qytetarëve, duhet ta nënshkruajnë mocionin e mosbesimit për këtë Qeveri”, ka thënë ajo.

Kusari-Lila ka thënë se iniciativa për rrëzimin e qeverisë nuk mund të jetë joserioze, pasi sipas saj, mandati do t’iu jepet qytetarëve.

20:40

Kusari-Lila i quan retorikë boshe premtimet e Hotit për dialogun

Deputetja e Grupit Parlamentar të Lëvizjes Vetëvendosje, Mimoza Kusari-Lila, i ka quajtur boshe premtimet e kryeministrit Avdullah Hoti për dialogun me Serbinë.

Sipas saj, Kosova në takimin e Washingtonit më 4 shtator u përfaqësua nga “një delegacion i prirë nga një kryeministër që nuk e ndien përgjegjësinë e asaj çfarë shkon me këtë post, që do të thotë të jesh legjitim dhe të kesh mbështetje popullore, që nuk i ka”.

“E dëgjoj retorikën e tij. Është retorikë boshe. Thotë vazhdimisht se do të shkoj në Kuvend t’i informoj deputetët. Çka më duhet informimi i tij, kur ai në seancën e fundit informuese deklaroi në kundërshti me të gjitha ato që i ka nënshkruar. Çfarë peshe dhe vlere ka ai të vijë nesër në Kuvend të raportojë e të flasë se s’do të pranojë të diskutojë sovranitetin e Kosovës, asetet e se Kushtetuta është bazë për të, kur ai vetë e shkeli Kushtetutën. Vuri firmën në një dokument që nuk thirret në emrin kushtetues ‘Republika e Kosovës’. Ishte në një vend ku nuk pati dy shtete të përfaqësuara barabartë, për shkak se nuk pat as flamuj e as dokument të nënshkruar bashkë. Në fakt, ai nuk ka mundur t’i bëjë ballë heqjes së pikës dhjetë ku kërkohej njohja e dyanshme. Kemi pas përfaqësim të dobët që nuk përkon me atë se çfarë mbështetje politike duhet ta kishte dhe çfarë përgjegjësie institucionale duhet të mbante”, ka thënë ajo në Deskun e KOHËS.

20:36

Kusari - Lila: Mini-Schengeni shpalosi paaftësinë e palës kosovare në dialog

Deputetja Mimoza Kusari-Lila në emisionin “Desku” në KTV ka thënë se Mini-Schengeni e ka shpalosur paaftësinë e palës kosovare në dialog.

“Mini-Schengeni e përshkruan më së miri paaftësinë e Kosovës në këtë proces negociator. Në fakt e ka treguar defektin që Kosova e ka pasur me procesin si të tillë prej momentit kur ka filluar trajtimi, në veçanti në dy vitet e fundit kur nuk kemi pasur fare transparencë për arsye se Mini-Schengeni nuk është hera e parë që është përmendë”, ka thënë Kusari-Lila. “E dyta, e tregon mangësinë me përmbajtjen, nuk kemi pas në asnjë pikë pronësi në përmbajtje të temave që janë trajtuar dhe e treta me formatin e negociatave, gjegjësisht se kush e përfaqëson Kosovën dhe në çfarë mënyre merren vendimet”.

Ajo ka kujtuar edhe një debat në Kuvend ku politikanët janë shprehur decidivisht kundër Mini-Schengenit.

“Madje në një debat që kam pasur me Hotin dhe Selim Selimin, ata jo që i kanë mohuar por i kanë quajtur edhe hipoteza. E kanë lëvizë në një rrafsh të keqkuptimit tim, që unë e paskam keqkuptuar me zonën Shenzen dhe jo me Schengenin. Aty edhe drejtpërdrejt janë zotuar dhe kanë shikuar si me ofendim ato përmendjet e Mini-Schengenit. Ende më keq nuk kanë dhënë përgjigje as për Ujmanin, e as për asetet e Trepçës”, ka thënë ajo.

Mini-Schengeni, sipas Kusari-Lilës, ka nisur pesë vjet më parë në Serbi.

“Ndoshta në vizitat e Ramës atje, pastaj është aktualizuar vitin e kaluar kur ka qenë taksa në fuqi. Dhe në njëfar mënyre për të evituar ngecjet në lëvizjet tregtare ndërmjet Kosovës, Serbisë e Bosnjës është prezantuar ideja e krijimit të kësaj zone. Tash e kemi një format ku krijohet lëvizja e lirë brenda”, thotë ajo.

Kusari-Lila shton gjithashtu se Kosova ka qenë e përfaqësuar në nivel rajonal me Marrëveshjen e CEFTA-s.