Haradinaj thotë se të hënën mblidhen për të diskutuar lidhur me takimin në Washington

Kryetari i Aleancës për Ardhmërinë e Kosovës, Ramush Haradinaj, ka konfirmuar shtyrjen e takimit të partnerëve në koalicion për të hënën, derisa ka treguar se për çka do të mblidhen.

Ai ka thënë se në këtë takim partnerët e koalicionit do të konsultohen sa i përket përgatitjeve për takimin e radhës për dialogun Kosovë-Serbi që do të mbahet me 2 shator në Shtëpinë e Bardhë.

“Takimi është shtyrë për të hënë. Temë janë konsultat për përgatitjen e takimit të 2 shatorit. Është me rëndësi që takimi i 2 shtatorit të përgatitet seriozisht dhe të arrihet marrëveshje për njohje reciproke, ngase ka mundësi. Takimi është ftuar për liderët e koalicionit, por do të konsultohet edhe partitë e tjera. Në takim do të jetë edhe kreu i LDK-së”, tha Haradinaj nga Deçani ku ka marrë pjesë për faljen e gjakut nga familja e heroit Ismet Ukaj për familjen Zenelaj, raporton EO. 

Takimi i paraparë të enjten mes Hotit dhe partnerëve të tij të koalicionit është shtyrë.

Zëdhënësi i AAK-së, Lulëzim Blakaj i ka thënë KOHËS takimi është shtyrë për ditën e hënë.

“Sot nuk mbahet takimi i paralajmëruar, është shtyrë për ditën e hënë”, ka thënë ai.

Në anën tjetër, nga burimet e veta, KOHA merr vesh se një nga arsyet e mosmbajtjes së takimit është fakti se disa përfaqësues të të koalicionit nuk ndodhen në Kosovë.

Hoti ishte pritur që të enjten t’i bëjë bashkë në një takim partnerët e tij në koalicionin qeverisës.

Takimi ishte bërë i ditur nga konfirmimi i pjesëmarrjes së kryetarit të Aleancës për Ardhmërinë e Kosovës, Ramush Haradinaj.

Megjithatë çështjet që synohej të diskutoheshin nuk ishin bërë publike.

Lidhur me këtë çështje, KOHA kishte pyetur partitë në pushtet e të cilat nuk kanë dhënë ndonjë detaj shtesë. Përveç konfirmimit të pjesëmarrjes në takim, kryetari i Lidhjes Demokratike të Kosovës, Isa Mustafa, ka refuzuar të tregojë arsyet e tij.

Kryeministri Avdullah Hoti pritet që sot t`i bëjë bashkë në një takim partnerët e koalicionit qeverisës.

Për takimin, i cili është paralajmëruar të mbahet të enjten pasdite, është bërë e ditur nga konfirmimi i pjesëmarrjes së kryetarit të Aleancës për Ardhmërinë e Kosovës, Ramush Haradinaj.

Por publike nuk janë bërë çështjet që do të diskutohen. Lidhur me këtë çështje, KOHA ka pyetur partitë në pushtet e të cilat nuk kanë dhënë ndonjë detaj shtesë. Përveç konfirmimit të pjesëmarrjes në takim, kryetari i Lidhjes Demokratike të Kosovës, Isa Mustafa, ka refuzuar të tregojë arsyet e tij.

Temat nuk i kanë bërë të ditura as nga Aleanca për Ardhmërinë e Kosovës e as nga Zyra e kryeministrit Avdullah Hoti.

Në anën tjetër, nga Qeveria e Kosovës kanë thënë se për detajet e takimit, qytetarët do të njoftohen me kohë. Ky takim është i pari që nga përplasjet e fundit mes partive në Qeveri, nisur nga çështja e dialogut e pozita e presidentit.

© KOHA. Të gjitha të drejtat janë të rezervuara.