11:51

Hoti i shpreh ngushëllime popullit libanez

Kryeministri i Kosovës, Avdullah Hoti, i ka shpreh ngushëllime Qeverisë dhe popullit të Libanit për vdekjen e mbi 100 personave gjatë shpërthimit të djeshëm në Bejrut.

Në shpërthimin janë lënduar edhe mbi 4000 persona.

“Në emër të Qeverisë të Republikës së Kosovës dhe në emrin tim, i shpreh ngushëllimet më të sinqerta Qeverisë dhe popullit të Libanit për shuarjen tragjike të jetës së dhjetëra qytetarëve libanezë, të cilët pësuan nga shpërthimi i djeshëm në Bejrut. Edhe në Kosovë, si kudo në botë, lajmi tronditës për këtë tragjedi është pritur me dhembje të thellë. Le të shndërrohet kjo tragjedi në besim dhe vendosmëri për të punuar edhe më fort për një botë paqësore dhe për miqësi mes popujsh e vendesh! Shpirtërisht dhe në lutje jemi me popullin e Libanit në këto çaste pikëllimi! Zoti i bekoftë viktimat e kësaj tragjedie dhe familjet e tyre!” – thuhet në mesazhin e ngushëllimit të Hotit.

09:30

Thaçi: Kosova është pranë Libanit në këtë kohë të vështirë

Presidenti i Kosovës, Hashim Thaçi ka reaguar pas shpërthimit të fuqishëm në Liban. Thaçi ka thënë se Kosova është pranë Libanit në këtë kohë të vështirë.

“Imazhe marramendëse dhe tragjike nga Beirut. Mendimet dhe lutjet tona u drejtohen të dëmtuarve dhe familjeve të viktimave. Kosova qëndron pranë Libanit në këtë kohë të vështirë.”, ka shkruar Thaçi në Twitter.

Një shpërthim i fuqishëm i një depoje ka tronditur kryeqytetin e Libanit, duke vrarë mbi 100 persona dhe duke plagosur rreth 4,000 të tjerë.