7 perditesime
21:32

Apostolova: BE-ja nuk qëndron prapa aktakuzës së Speciales ndaj Thaçit

Përfaqësuesja e posaçme e BE-së, Nataliya Apostolova, ka thënë se nuk beson që Bashkimi Evropian qëndron prapa aktakuzës së Dhomave të Specializuara ndaj presidentit të Kosovës Hashim Thaçi.

Ajo në DESKU-n e Kohës ka thënë se Prokuroria e Specializuar është organ i pavarur dhe duhet të qëndrojë i tillë.

Apostolova ka shtuar se edhe pas aktakuzave, dialogu me Serbinë po vazhdon, duke shtuar se për personalitet që marrin pjesë në këtë proces, vendosë Kushtetuta.

“Në bazë të saj caktohen njerëzit që e përfaqësojnë Kosovën në dialog, sigurisht që kryeministri Hoti mund të shoqërohet nga kushdo që dëshiron. Pra nuk është e shëndetshme të kombinosh ose t’i lidhësh këto dy çështje, por kur flasim për Dhomat e Specializuara dhe refleksionin që ka në Kosovë, dua t’i bëj disa komente, sepse fatkeqësisht kemi parë tashmë një përpjekje për shfuqizim të këtij ligji dhe ishte i bërë në një mënyrë të pahijshme” ka thënë ajo.

Ajo tutje ka shtuar se iniciativa për shfuqizimin e Speciales në vitin 2018 ishte gabim i madh.

Sipas saj, të gjithë ata që lobuan për një gjë të tillë do të duhej të dinin se çfarë mesazhi po përcillte Kosova në sytë e botës, duke shtuar se nuk ishte befasues reagimi i Bashkësisë Ndërkombëtare.

“Unë mendoj se nuk ishte aspak befasues reagimi i gjithë neve, i gjithë partnerëve ndërkombëtarë në faktin se ky ishte një gabim shumë i madh, dhe është po ashtu gabim perceptimi në Kosovë se ky gjyq po i targeton UÇK-në, dhe ajo që e bën është tejet e rëndësishme dhe e kemi mbështetur të gjithë partnerët ndërkombëtarë, si miqtë tuaj. Por kjo nuk është një përgjegjësi kolektive ajo e cila po kërkon gjykata. Ajo po kërkon përgjegjësi individuale të disa njerëzve”, ka shtuar ajo.

Sipas saj, aktakuzat e Speciales nuk nënkuptojnë që personi është i fajshëm.

Ajo e ka quajtur të rrezikshëm perceptimin se Bashkimi Evropian përmes kësaj gjykata po ndjekë persona të caktuar, ose po e targeton UÇK-në.

“Jo ne nuk jemi duke e bërë, janë vetëm individë që duhet të përgjigjen për aktet e tyre në atë periudhë kohore”, ka thënë ajo.

Duke folur për ambientin, ajo ka thënë se është nevoja që legjislacioni të përmirësohet dhe kjo nuk është bërë për një kohë të gjatë.

“Ju e dini se moto e komisionit të ri evropian është mjedisi. Do t’ ju jap një shembull se si do të implementohet kjo në Kosovë veçanërisht. Vizita e parë e përfaqësuesit tonë ishte e lidhur direkt me vizitën e termocentralit të Kosovës, ku ai zyrtarisht inauguroi donacionin tonë, që është 75 milionë euro”, ka thënë ajo.

21:14

Apostolova për dialogun: BE-ja e SHBA-ja, partnerë strategjikë

Përfaqësuesja e Posaçme e BE-së në Kosovë, Nataliya Apostolova, thotë se dialogu Kosovë – Serbi gjithnjë ka qenë lart në agjendën e Bashkimit Evropian.

Ajo tha se tash është një fazë e re dhe se e vuan atë që shkoi pa dialog.

Shtoi se BE-ja e SHBA-ja gjithnjë kanë qenë dhe do të jenë partnerë strategjik, përfshirë edhe zgjidhjen e rastit të Kosovës.

“Me përbërjen e re besoj se BE-ja ka sjellë një energji të re dhe një fazë të re të dialogut. Dialogu ka qenë gjithmonë lart në agjendën tonë dhe e di këtë shumë mirë, sepse kam vuajtur shumë dhe jam përpjekur të gjej një mënyrë për bllokadën që ndodhi për një vit e gjysmë pas vendosjes së tarifës 100%, që të gjej një mënyrë që të rinisë dialogun, por ishte e pamundur. Tash kemi një fazë të re, kemi një nivel të lartë politikan që ka një eksperiencë të lartë në negociata, që është tash duke punuar 24 orë në ditë në këtë çështje. Më parë BE-ja si ndërmjetësues ka qenë duke e mbështetur procesin që ka qenë duke ndodhur për një kohë të gjatë por tani ekipi i ri dhe momentumi pozitiv që është krijuar me marrjen e detyrës nga Lajçaku është që ai dhe skuadra e tij janë të përkushtuar në këtë çështje 24 orë në ditë”, tha Apostolova.

Diplomatja e BE-së mohoi se ka inat mes BE-së dhe SHBA-së në lidhje me dialogun.

Ajo thotë se SHBA-ja dhe BE-ja gjithmonë kanë qenë partnerë strategjik.

“Ne gjithmonë kemi qenë në koordinim dhe udhëheqësit tanë gjithmonë kanë folur me njëri- tjetrin, gjithmonë jemi duke ndarë strategjinë e përbashkët. Kjo strategji është normalizimi dhe stabiliteti i marrëdhënieve. Si do të ndodhë kjo? Ka shumë çështje në këtë pjesë, nuk janë vetëm miqtë tanë amerikanë, por ne kemi edhe partner të cilët na kanë mbështetur. Pra momentalisht nuk do ta lidh këtë energji në dialog me asnjë aktor të jashtëm, është e gjitha duke ardhur si pasojë e faktit se tani kemi përkushtimin e përfaqësuesit tonë të lartë që ta përfundojë këtë dialog sa më shpejt që është e mundur, ne të gjithë e dimë se sa benefit sjell kjo marrëveshje për Kosovën dhe Serbinë”, u shpreh ajo në Deskun e KOHËS.

21:10

Apostolova lavdëron punën e EULEX-it: Kosova duhet të jetë falënderuese

Duke folur për misionin e EULEX-it në Kosovë, përfaqësuesja e posaçme e BE-së, Nataliya Apostolova, ka thënë se nuk pajtohet që ky mision nuk solli asgjë të mirë në Kosovë.

Ajo ka shtuar se EULEX-i ka pasur kufizime rreth asaj se çfarë ka mund të bënte përgjatë viteve sa qëndroi në Kosovë.

“Por, procesi ligjor si i tillë e bëri të domosdoshëm edhe njëfarë bashkëpunimi nga sistemi i drejtësisë në Kosovë. Pra është komplekse. Por dua që ta përmend edhe atë se EULEX-i nuk përbën vetëm drejtësinë. EULEX-i solli këtu zyrtarë doganorë, EULEX-i e mbështeti dialogun për shumë vjet, përfshirë IBM-në”, ka thënë ajo.

Apostolova shtoi se EULEX-i punoi edhe në marrëveshjen rreth drejtësisë, që është marrëveshje e dialogut.

“Pra, EULEX-i solli shumë dhe po vazhdon të sjellë. Për momentin, EULEX-i ka shkuar përtej funksioneve të veta ekzekutive dhe po ndihmon në këto raste që i janë dhënë gjykatës dhe gjyqësorit. Dhe, po i monitorojnë këto raste, po japim këshilla dhe janë të përfshirë në mjekësinë ligjore që në Kosovë është në fazën fillestare, nuk është e zhvilluar. Mendoj se gjithçka që po bën EULEX-i për momentin është e zakonshme pas gjithë këtyre viteve dhe gjithçkaje që kanë bërë. Janë të fokusuar për ndihmë gjyqësore Kosovës.

Ajo ka thënë se nuk pajtohet me njerëzit që e fajësojnë EULEX-in për të gjitha fushat jofunksionale të gjyqësorit.

Apostolova shton se EULEX-i ka bërë shumë dhe Kosova duhet të jetë falënderuese për ekspertizën e sjellë këtu.

“Vlerësoj se ajo që EULEX-i është duke bërë momentalisht është shumë normale pas gjithë këtyre viteve, dhe gjithçka që ata kanë bërë, ky është vetëm një cikël i asaj se ku janë të koncentruar është shumë ndihmuese për Kosovën. Unë do të mund të argumentoj gjithmonë me njerëzit që janë duke e fajësuar EULEX-in, për gjithë mosfunksionimin në fusha të ndryshme, sepse nuk është e drejtë të thuhet. EULEX-i ka dhënë shumë dhe besoj se Kosova duhet të jetë falënderuese për gjithë këtë ekspertizë që ishte sjellë këtu nga shumë njerëz”, ka shtuar ajo.

20:58

Apostolova: Vettingu nuk duhet të përdoret si mjet për spastrimin e anëtarëve të qeverive të kaluara

Përfaqësuesja e posaçme e BE-së, Nataliya Apostolova, ka folur edhe për procesin e vettingut.

Ajo ka thënë se ky proces nuk duhet të përdoret si mjet politik që një përbërje qeveritare të spastrojë anëtarë të qeverive të mëparshme apo prej shërbyesve të mëparshëm civilë.

Sipas saj, vettingu si i tillë mund të jetë mjet shumë i rëndësishëm, por duhet ndërmarrë me kujdes të madh, duke shtuar se i njëjti duhet të bazohet mbi standarde të krijuara prej organizatave të specializuara.

“Një shembull: Këshilli i Evropës. Vettingu nuk duhet të përdoret si mjet politik që një përbërje qeveritare të spastrojë anëtarë të qeverive të mëparshme apo prej shërbyesve të mëparshëm civilë. Prandaj, vettingu duhet të kryhet, vettingu është kryer në Kosovë, është bërë prej nesh shumë kohë më parë. Gjyqësori disi iu nënshtrua procesit të vettingut. Tani, nëse duhet të kryejmë një vetting të ri, do ta këshilloja për kujdes ministrin e Drejtësisë. Ia kam thënë Albulena Haxhiut kur ishte ministre e Drejtësisë, po ia them edhe Selim Selimit tani: duhet të mendohet me shumë kujdes se mbi çfarë standardesh do të bazohet ky proces, por njëkohësisht nevojitet transparencë dhe besim. Në të kundërtën, do t'i jepet një porosi e tmerrshme qytetarëve të Kosovës, që edhe tani janë skepticizëm rreth mënyrës transparente në të cilën funksionon gjyqësori”, ka thënë ajo.

Ajo thotë se në këtë proces ka raste në të cilat ka arsye për skepticizëm

“Për shembull, e dini se sa raste u bartën nga EULEX-i te gjyqësori në Kosovë dhe u grumbulluan duke mos u procesuar për shumë vjet. Pra, nëse je qytetar në Kosovë dhe do që t'i garantosh të drejtat e tua, duhet të jesh i vetëdijshëm që nëse paraqet një rast gjyqësor nuk do ta dish fundin. Kjo është e frikshme. Nëse je qytetar i zakonshëm i Kosovës, sistemin e drejtësisë e sheh si shembull të përkryer të shtetit të kapur, të cilin BE-ja e ka përmendur në raportet e veta”, ka thënë ajo.

20:56

Apostolova flet për ato që po e dëmtojnë shtetin: sundimi i ligjit, numri i zv.ministrave e nepotizmi

Përfaqësuesja e Posaçme e BE-së në Kosovë, Nataliya Apostolova vlerëson se Kosova problemin më të madh e ka me sundimin e ligjit. Në fakt, sipas saj, ky është problem në gjithë Ballkanin.

Ajo, në Deskun e KOHËS ka folur edhe për “kapjen e shtetit”, “armatën” e zv.ministrave, nepotizmin dhe të tjerat që po e dëmtojnë shtetin.

“Shoh shumë sfida në fushën e sundimit të ligjit në Kosovë dhe dua t'i përmend disa prej tyre. Këtu natyrisht nuk dua vetëm të kritikoj, duke thënë se ju duhet ta bëni këtë apo atë gjë. Thjesht dua të them se ne si BE, si partnerët tuaj, si fqinjët tuaj dhe si njerëz që preokupohen me mirëqenien tuaj, jemi thellësisht të përfshirë për t'ju ndihmuar për ta tejkaluar atë sfidë. Sundimi i ligjit është bazë e gjithçkaje. S'mund të përmendet as edhe një fushë e zhvillimit socio-ekonomik në Kosovë që pikënisje nuk e ka sundimin e ligjit. Prandaj, përpjekjet tona janë të përqendruara aty, në radhë të parë. Kemi bashkëpunuar me ju tash e sa vjet, që me ndihmën tonë, të ekspertëve tanë evropianë, të përgatitet legjislacioni të cilin Qeveria ia propozoi Kuvendit për miratim. Pra, ne përzgjedhim metodën që ju përshtatet më së miri, në mënyrë që të harmonizohet legjislacioni i juaj me ‘acquis communautaire’”, tha Apostolova.

Në disa fusha, ajo tha se ka përparim, por në disa jo.

“Njëra prej tyre është reforma e administratës publike. Dua të shpreh kënaqësinë time që zv.kryeministri i parë, Besnik Tahiri, me të cilin kemi një përvojë të gjatë bashkëpunimi në pakon e administratës publike, është duke e shikuar me vëmendje të veçantë. E arsyeja është se nuk mund të zhvillosh institucionet nëse nuk ke administratë publike të përgatitur mirë. E dini shumë mirë që gjatë viteve, Kosova ka pasur aq shumë ministra, numrin e zv.ministrave as që dua ta përmend, kam qenë e zëshme rreth asaj dhe mendoj se kjo është e rrezikshme dhe dëmtuese për administratën publike në Kosovë. Pasi, nëse doni qeveri funksionale, atëherë duhet që të gjithë njerëzit të funksionojnë si ekip, që do të thotë jo vetëm ministrat, por edhe administratat e tyre duhet ta ketë një strategji, të flasin me një zë të vetëm”, tha ajo.

Ajo ka treguar edhe raste që e kanë shokuar gjatë bashkëpunimit me qeveritarët kosovarë.

Ka përmendur numrin e madh të zv.ministrave de mosbashkëpunimin e tyre.

“... dhe dua të them se kam parë në disa përbërje qeveritare, s'dua të përmend shembuj, por t'jua tregoj disa ngjarje që për mua ishin paksa shokuese: Ka pasur raste kur e kam takuar një ministër bashkë me një numër të madh zv.ministrash dhe aty e kam kuptuar se ata nuk ishin ulur kurrë bashkë për t'u takuar rreth menaxhimit dhe për të diskutuar se cilat janë prioritetet e tyre”, është shprehur Apostolova.

Ajo thotë se nuk ka logjikë nëse partitë politike synojnë kah një ekzekutiv jofunksional. Një gjë e tillë do t'i dëmtonte edhe interesat e tyre politikë, sipas saj.

“Nuk mund të kesh ekonomi që zhvillohet, nuk mund të kesh mënyrë të drejtë në të cilën institucionet veprojnë për të siguruar përfitime ekonomike për Kosovën, përfshirë partitë politike dhe anëtarët e tyre, nëse gjendja bllokohet si në shumë raste. Prandaj mos u befasoni që ne si BE, e tërë bashkësia ndërkombëtare, kemi qenë të zëshëm. Pasi, e kemi parë në shumë raste në vendet tona dhe këtë po e bëjmë hapur: Nuk duam t'i përsërisni të njëjtat gabime. Por, sundimi i ligjit nuk ka të bëjë vetëm reformën e administratës publike. Sundimi i ligjit përfshin standarde të larta, në mënyrë që, për shembull, të nxirren përfitime nga projektet tona. E dini shumë mirë se gjatë këtyre katër vjetëve, ne si BE i kemi ndalur disa projekte, pasi e pamë se procedurat e prokurimit ose procedurat e përzgjedhjes së përfituesit nuk ishin transparente”, deklaroi Përfaqësuesja e Posaçme e BE-se në Kosovë.

Ajo ka folur edhe për paratë që BE-ja dhe shtetet anëtare të saj japin çdo vit për Kosovën. Apostolova, thotë se ajo dhe të tjerët japin përgjegjësi për paratë që shpenzohen këtu – 100 milionë euro në vit.

“Do të kisha dashur që shteti im, gjatë procesit të anëtarësimit në BE, ta kishte pasur një përkrahje të tillë bujare. Pra, e keni mundësinë për të përfituar dhe për ta përdorur për agjendën e reformave dhe në të njëjtën kohë duhet t'i respektoni parimet e vëna dhe me këto pako të reja që po jua japim juve. Meqë ra fjala, jemi duke e ridizajnuar IPA-n dhe rreth 50-60 milionë nga IPA, që tashmë i kemi në dispozicion, do t'i ridizajnojmë në atë mënyrë që të përballeni me pasojat e pandemisë në ekonominë tuaj. Por, këtë nuk do ta japim si dhuratë, duam që këto procese të kryhen me standarde të larta dhe transparente të sundimit të ligjit. Po ashtu, do t'ju japim grante”, tha Apostolova.

20:49

Apostolova: Zgjatja e vendimit për demarkimin me Malin e Zi vonoi liberalizimin

Përfaqësuesja e posaçme e BE-së, Nataliya Apostolova, ka thënë se liberalizimi i vizave në Kosovë do të arrihej shumë më lehtë, po të mos kishte zgjatur aq shumë vendimi për demarkimin e kufirit me Malin e Zi.

Ajo në DESKU-n e Kohës ka thënë se nuk donë ta fajësoj askënd, por shton se Qeveria e Kosovës aso kohe do të duhej të ishte më e hapur për ta votuar demarkacionin e kufirit sa më shpejtë që është e mundur.

Apostolova ka thënë se problemet me korrupsion dhe krim të organizuar nuk janë vetëm në Kosovë por edhe në shumë vende të rajonit.

“Po flasim për fillimin e 2016-s. Sidoqoftë, tani po hyjmë në atë që do ta përshkruaja si çështje që ka të bëjë me standardet dhe me vetë proceset e integrimeve të BE-së. Kur flasim për korrupsionin dhe kushtet për liberalizimin e vizave, por edhe sundimin e ligjit në përgjithësi, edhe këto janë çështje që në njërën apo tjetrën mënyrë janë të ngërthyera me procesin e integrimeve në BE, të cilat i kemi nisur me Marrëveshjen e Stabilizim-Asociimit”, ka thënë ajo.

Duke folur për Marrëveshjen e Stabilizim-Asociimit, ajo ka thënë se kjo është e arritur e madhe për Kosovën dhe se vendi vazhdon të ketë status të veçantë për shtete të caktuara anëtare.

“Dhe fakti që kemi arritur marrëveshje kontraktuale mes Kosovës dhe BE-së paraqet arritje të madhe. Këtë po e them duke e ditur se si funksionojnë institucionet tona. Pra, është arritje e madhe shkaku që pavarësisht atij fakti, tash e kemi mundësinë të shpërndajmë para, t'ju ndihmojmë financiarisht në të gjitha sferat e jetës, pra kjo marrëveshje e hapi atë mundësi. Por, MSA-ja është tejet kërkuese, nuk e di a e keni parë, ajo i ka rreth 300 faqe. Pra, përmban shumë zotime për të cilat dy palët janë pajtuar t'i përmbushin dhe kjo nuk bëhet në mënyrë rastësore”, ka thënë ajo.

Sipas saj, konkurrenca në Bashkimin Evropian është e fortë, duke shtuar se nuk mundesh që thjesht të bëhesh anëtare dhe të mbijetosh atje.

“Pra, MSA është marrëveshje kontraktuale që në të vërtetë e përgatit një shtet për ta reformuar sistemin e saj, për t'u bërë ballë sfidave të kësaj konkurrence brenda BE-së. Arsyeja që po pyes është se kemi raportuar vazhdimisht rreth përmbushjes së MSA-së dhe gjithnjë ka qenë fakt se procesi i përmbushjes i këtyre obligimeve nuk shkonte sipas pritjeve”, ka thënë ajo.

20:38

Apostolova lavdëron punën e bërë për liberalizim të vizave dhe gratë

Përfaqësuesja e Posaçme e BE-së në Kosovë, Nataliya Apostolova, ka vlerësuar se në Kosovë megjithatë ka pasur procese që kanë shkuar mirë dhe janë kryer me përkushtim.

Në një intervistë për emisionin Desku në KTV, ajo ka thënë se Kosova ka treguar përkushtim të madh për të marrë liberalizimin e vizave, gjë që nuk ka ndodhur ende.

Ka lavdëruar edhe punën e grave në Kosovë.

“Nuk dua të tringëlloj aq pesimiste dhe nuk mendoj që jeta politike në Kosovë është aq e zymtë. Janë shumë raste, mbase më shumë se të tjerat, që Kosova ka treguar angazhim të fuqishëm. Një nga ta është p.sh. përkushtimi për liberalizimin e vizave. Nuk është një proces i lehtë, e di këtë shumë mirë sepse e kam përcjellë atë për vite. Ne kemi bërë një punë të mrekullueshme këtu në Kosovë, kemi punuar me institucionet dhe ne jemi ata të cilët e dimë shumë mirë se sa shumë Kosova ka treguar vullnet me qëllim që të mbyllen kriteret e vëna. Pra, kur ka këso lloj vullneti nacional, gjërat mund të ndryshojnë. Ju keni bërë një punë shumë të mirë në këtë drejtim, por rregulli i ligjit dhe gjitha problemet që janë të lidhura me luftimin e korrupsionit, krimin e organizuar, këto probleme janë gjithmonë të lidhura me proceset”, ka thënë Apostolova.

Ajo thotë se edhe pse janë përmbushur 95 kriteret, duhet të bëhet respektimi i tyre në vazhdimësi.

Ka folur edhe për unitetin te gratë.

“Ka pasur raste kur Kosova ka treguar unitet, dua të përmend rrjetin e grave. Keni gra fantastike në Kosovë, aq të përgatitura, aq të guximshme, aq të bindura se mund të udhëheqin, të kenë peshë në politikë. Si BE kemi krijuar një rrjet përfaqësuesish të të gjitha partive politike në Kuvendin e Kosovës dhe e vërteta është se këto gra gjatë projektit tonë, të trajnuara në negociata, nën udhëheqjen e partive politike apo politikëbërjes dhe në këtë mjedis, kapërcyen dallimet politike. Pra, ka shumë shembuj dhe s'dua të jem pesimiste. Mendoj se Kosova ka një të ardhme të ndritshme. Por, në këtë kohë të pandemisë, kur të ofrohet ndihma e donatorëve dhe atyre që duan ta ndihmojnë Kosovën, duhet t’i kapërceni dallimet politike dhe s'po e shoh këtë”, tha ajo.

20:30

Apostolova: Për katër vjet Kosova pati shume kriza, tensioni gjithmonë erdhi nga partitë politike

Përfaqësuesja e posaçme e BE-së, Nataliya Apostolova, ka thënë se për katër vjet të mandatit të saj, Kosova ka kaluar në vazhdimësi nëpër kriza.

Ajo në DESKU-n e Kohës ka thënë se këto katër vjet kanë qenë intensive, duke shtuar se tensioni ka ardhur gjithmonë nga zhvillimet politke.

Apostolova ka shtuar se gjatë kësaj kohe ka dashur të shohë më shumë unitet tek partitë poltike.

“Kur erdha ishte koha kur një vendim shumë i rëndësishëm duhet të merrej në Kuvend për kufirin e Malit të zi dhe ky vendim si e dini ishte ngushtë i lidhur me aspiratat e Kosovës për liberalizimin e vizave, pra nuk shkoi shumë lehtë, në fillim të karrierës sime, menjëherë pas asaj, ishim dëshmitarë të votëbesimit ndaj qeverisë së Isa Mustafës, që po ashtu u përcoll me veprime intensive dhe pasiononte në Kuvend”, ka thënë ajo.

Duke renditur krizat që e kanë përcjellë Kosovën në katër vitet e fundit, Apostolova ka përmendur edhe përpjekjet për shfuqizimin e Gjykatës Speciale, ndërrimin e shpeshtë të Qeverive si dhe taksën 100 për qind për mallrat serbe dhe ato të Bosnjës të vendosur nga Qeveria Haradinaj.

“Pra, gjithë këto katër vjet u karakterizuan me këto veprime politike, meqë u desh t’i ndaj përshtypjet e mia personale. Natyrisht se partisë politike punojnë gjithmonë për interesa personale të tyre për pushtet, por në të njëjtën kohë në këto katër vjet do të doja të shihja që ato të jenë më të unifikuara kur në pyetje janë çështjen që kanë të bëjnë me qytetarët e Kosovës, pra me mirëqenien e tyre”, ka shtuar ajo.

Ajo thotë se interesat politike duhet të vihen në plan të dytë kur ka çështje emergjente siç është pandemia.

“Të gjitha partitë politike do të doja t’i shihja të bashkuara, në vend se të shpenzojnë energji për t’i dëshmuar interesat e tyre në Kuvend dhe t’i bashkojnë fuqitë e tyre që t’ia kushtojnë të mirës së qytetarëve të vendit”, ka thënë ajo.