21:49

Bislimi: Zhbërja e Speciales s’po kërkohet për të mbrojtur UÇK-në, por për ta shpëtuar një person

Besnik Bislimi, nënkryetar i Vetëvendosjes, ka thënë se nuk do të përkrahin zhbërjen e Speciales sepse kjo nuk po kërkohet për ta mbrojtur UÇK-në, por për ta shpëtuar një person.

“Kur është aprovuar Gjykata Speciale në Parlament ne kemi qenë kategorikisht kundër, dhe e kemi demonstruar edhe me votë edhe me protesta jashtë. Për arsye se kemi konstatuar se Gjykata Speciale është goditja më e madhe që i jepet vendit dhe UÇK-së që nga viti 1999”, ka thënë Bislimi.

Tutje ai ka folur se si lidershipi politik atëherë kërkonte që të formohej Specialja për të pastruar luftën e UÇK-së.

“Lidershipi politik i atëhershëm publikisht ka thënë ‘Gjykata Speciale nuk e dëmton luftën e UÇK-së, por e pastron luftën e UÇK-së. Gjykata Speciale nuk do të merret me UÇK-në por me individët, ka juridiksion individual’. Gjykata Speciale i gjykon eprorët për vendimet e tyre që i kanë marrë, nxitjen që kanë bërë për veprime të caktuara për periudhën 01 janar 1989 – 31 dhjetor 2000. Vetëm për këtë periudhë do të thotë kufizohet dhe vetëm për Kosovë”, shprehet Bislimi.

Bislimi shton se që nga themelimi i Gjykatës në vitin 2015 nuk ka ndryshuar asgjë.

“E vetmja gjë që duket se ka ndryshuar me vitin 2015 është se atëherë Thaçi ka shpresuar që nuk do të jetë në listë dhe për këtë arsye ka menduar se gjithçka është në rregull. Tash që ka dalë ftesa për të po del që Gjykata është e keqe dhe faktori ndërkombëtar. Këtu mendoj se është problemi sepse tregon mentalitetin e Thaçit, i cili ka qenë i gatshëm me i dhënë shokët e vet me kusht që të shpëtojë veten”, thotë Bislimi.

Bislimi ka shpjeguar se pse nuk e përkrahin një shfuqizim të mundshëm të Gjykatës Speciale.

“Ndryshimi i ligjit nuk po kërkohet për me e mbrojt UÇK-në, por po kërkohet për me e shpëtuar një person. Në drejtimin tonin nuk ka pas kërkesë”, ka thënë Bislimi.

Ai thotë se dy elemente janë me rëndësi për sa i përket Gjykatës Speciale.

“E para: Momenti i publikimit të aktakuzave të pakonfirmuara na ka bërë të qartë se Gjykata është politike, ashtu siç kemi thënë edhe ne më herët. Do të thotë Gjykata bënë politikë. Edhe e dyta është se Gjykata tregon që në errësirë Thaçi vazhdimisht ka pas tendenca për me negociuar për veten. Kur është publikuar aktakuza është thënë se arsyeja se pse po publikohet e pakonfirmuar është se ka aktivitete të personave në fjalë për ta zhbërë Gjykatën”, ka thënë Bislimi.

21:32

Bislimi: Në Kosovë janë dy blloqe, VV-ja dhe të tjerët

Sipas nënkryetarit të Lëvizjes Vetëvendosje Besnik Bislimi, në Kosovë tash janë vetëm dy blloqe politike, VV-ja dhe të tjerët. Bislimi ka thënë se të gjitha partitë tjera janë të ngjashme.

Duke komentuar një sondazh të fundit të cilit VV-ja i është referuar duke thënë se kjo parti nëse mbahen zgjedhjet tash ka më shumë se 50 për qind të votave, Bislimi ka thënë se “numrat mund të përmirësohen edhe më tutje”.

“Fillimisht duhet ditur se sondazhi nuk i përfshin tri zhvillime. S’e përfshin diasporën, u bë para se të shkarkohet Vjosa Osmani nga LDK-ja dhe para se të dalin akuzat ndaj Thaçit e Veselit. Mund të kenë efekt brenda numrave. Ajo që vërehet është se shpërndarja e ulëseve nëse zgjedhjet do të mbaheshin tani do të ishte 56 për VV-në, 18 për PDK-në dhe 18 për LDK-në me nga 15 për qind dhe 8 ulëse për AAK-në me shtatë për qind. Numrat mund të përmirësohen edhe më tutje vetëm nëse punojnë aktivistët e Lëvizjes Vetëvendosje. Besoj se nëse ka pas një të mirë në këtë periudhë apo në tri gjërat e këqija që kanë ndodhur, 1. 25 marsi për shkarkim të qeverisë në mes të pandemisë, 2. aktgjykimi i Kushtetueses që nxori aktgjykim që Kushtetuta është në harmoni me dekretin e Thaçit dhe 3. krijimi i Qeverisë Hoti; tri vendimet pos që ekspozuan dallimin e madh të qeverisjes së VV-së me të tjerëve u ka dhënë hapësirë të tjerëve të tregojnë sa vlejnë e sa janë të gatshëm të shkojnë për pushtet”, ka thënë Bislimi në Deskun e KOHËS.

Sipas tij, në Kosovë ka blloqe false politike.

“Cili është dallimi mes Nismës e PDK-së, mes PDK-së e AAK-së? Jemi dy blloqe. Ata dhe ne. Është VV-ja dhe të tjerët. Të tjerët janë të ngjashëm. Pamë Bedri Hamzën e PDK-së që tha sot se kur t’ju duhen numrat jemi këtu. Është PSD.2” , ka thënë tutje ai.

Ai ka përsëritur qëndrimin që duhet të ketë zgjedhje në vend. Sipas tij, me vendimin që të lejojë mbajtjen e zgjedhjeve të Serbisë në veri, “Qeveria Hoti tha se zgjedhjet mund të mbahen, por ne frikësohemi nga to”.

21:24

Bislimi: Qeveria Hoti ka zero përgatitje për dialog

Besnik Bislimi nga radhët e Vetëvendosjes në emisionin Desku në KTV ka thënë Qeveria Hoti ka zero përgatitje për dialog.

Ai gjithashtu ka thënë se dialogu nuk është çështja më e rëndësishme për qytetarët, sipas sondazhit të fundit.

“Në sondazhin e fundit dialogu me Serbinë e ka marrë mbështetjen vetëm 7.5 për qind e qytetarëve. Në asnjë moment Qeveria Kurti nuk ka thënë se nuk do të dialogojmë, palët tjera kanë thënë se nuk do të dialogojnë, palët tjera kanë thënë se marrëveshja është gati dhe duhet të nënshkruhet”, ka thënë Bislimi, i cili shtoi se këtu e ka fjalën për presidentin Thaçi.

Bislimi shtoi se deklarata e fundit e Boltonit tregon se kishte një marrëveshje të arritur.

“Pas deklarimeve të Boltonit, deri në vitin 2018 çdo deklaratë e Boltonit neve na është thënë se është qëndrim amerikan. Tash Boltoni po del po thotë se ‘nuk ka qenë qëndrim i joni por ka qenë qëndrim i palëve në biseda për ndryshim kufijsh’. Palë në biseda kanë qenë Thaçi e Vuçiqi. Thaçi krejt fshehtas e ka qitë në tavolinë çështjen e territorit”, thotë Bislimi. “Prej momentit kur Hoti mori qeverisjen ai tha se unë e udhëheqi dialogun në momentin që i erdh ftesa për të shkuar në Amerikë ai tha se ‘unë nuk shkoj pa Thaçin’. Kjo tregon konsistencën e tij. Ai e dinë shumë më saktë se si është situata”.

Bislimi ka shtuar se dialogu duhet të përkrahet si instrument, e jo si qëllim.

“Procesi është përkrahur në vazhdimësi nga Vetëvendosje. Procesi duhet me u përkrah jo si qëllim në vete, por si instrument. Qëllimi është diku tjetër. Qëllimi është që të arrihet një marrëveshje nga e cila Kosova përfiton. Kur themi të përfitojmë mendojmë që në fund të procesit gjendja e jonë duhet të jetë më e mirë se që jemi sot. Se për me qenë më keq ashtu siç po na thotë Thaçi një marrëveshje e rëndë e kompromis i dhimbshëm, ne më mirë qëndrojmë kështu”, është shprehur ai.

Sipas tij Qeveria Hoti s’ka fare përgatitje për dialogun.

“Qeveria Hoti ka zero përgatitje për dialog, dhe zero vullnet me e trajtuar. Qeveria Hoti thotë se qëllimi jonë final është që ta marrim njohjen nga Serbia. Do të thotë nëse njohja është synimi, atëherë gjithçka tjetër bëhet instrument, edhe territori, edhe funksionaliteti i shtetit”, ka thënë Bislimi.

20:57

Bislimi: OEK ka bërë sondazhe të falsifikuara, punoi kundër interesave të biznesit

Besnik Bislimi, ish-ministër i Financave, në emisionin Desku në KTV ka thënë se Oda Ekonomik e Kosovës ka punuar kundër interesave të bisnesit, derisa ka akuzuar madje edhe për sondazhe të falsifikuara për të treguar numrin e punëtorëve që janë larguar nga puna.

I pyetur rreth akuzave ndaj Vetëvendosjes për protestën e mbajtur në shesh, ai ka thënë se nuk ka ende asnjë deputetë e aktivistë të prekur me koronavirus.

“Numrat kanë filluar të përkeqësohen në dy javët e fundit, ne kemi mbajtur protestën më 12 qershor. Është qesharake vet ideja me e plasuar këtë. Instrumenti kryesor i përhapjes së virusit është qëndrimi në ambiente të mbyllura në një masë të madhe. Nëse i pyesni qytetarët e Prishtinës do u thonë se një pjesë e madhe e lokaleve të natës kanë qenë të hapura dhe kanë qenë deri në 500 veta. Aty është burimi kryesor i përhapjes së virusit”, shprehet Bislimi. “Kjo edhe është arsyeja se pse Qeveria ka vendosur t’i mbyllë lokalet pas orës 21:00, është vetëdijësuar që na ka rrejtë tërë kohën se është Vetëvendosja”.

Sipas tij ky numër i madh i të prekurve me COVID-19 është edhe për shkak të mosbesimit të qytetarëve ndaj kësaj qeverie.

“Asnjë masë s’mundet me pas efekt përderisa qytetarët nuk sillen të disiplinuar, ata do të sillen të tillë për aq kohë sa i besojnë Qeverisë dhe masave të saj. Një prej indikatorëve kryesorë është besimi i konsumatorit. Derisa ata ndihem mirë ekonomia do të ecën mirë”, ka thënë Bislimi.

Ai ka thënë se Oda Ekonomike e Kosovës ka bërë sondazhe të falsifikuara.

"Përfaqësuesit e biznesit thoshin jo ne po shkojmë në bankrot. Faktikisht edhe bënin sondazhe të falsifikuara ku thoshin kaq punëtorë janë larguar nga puna. Punonin kundër interesave të biznesit. Oda Ekonomike e Kosovës u ka thënë bizneseve, kemi informata nga brenda, duhet të dalim sa më ashpër kundër kësaj Qeverie se Hashim Thaçi na ka premtuar 300 milionë euro sapo ta rrëzojmë këtë Qeveri. Është paradoksale që përfaqësuesit e bizneseve punojnë kundër interesave të bizneseve të cilët është dashur me i përfaqësuar”, ka thënë Bislimi. “Bizneset që janë anëtarë të odave e kanë vërejtur se interesat e tyre nuk janë duke u përfaqësuar. Edhe bizneset që janë më të suksesshme kanë thënë se nuk janë në asnjërën prej odave”.

20:45

Bislimi: Me idenë për Trustin, problemi bartet në të ardhmen

Nënkryetari i Lëvizjes Vetëvendosje dhe ish-ministri i Financave, Besnik Bislimi, e ka cilësuar si të palogjikshëm propozimin e Qeverisë Hoti që qytetarëve t’u mundësohet tërheqja deri në 10 për qind të kursimeve nga Fondi Pensional për shkak të gjendjes së rënduar nga pandemia. Sipas tij, me këtë ide problemi vetëm do të bartej në të ardhmen.

Ai ka thënë në Deskun e KOHËS se mosardhja e diasporës do të rëndojë situatën tejmase në Kosovë. Ka thënë se “efektet e këtij dështimi katastrofal në pandemi, do t’i dimë më mirë në fund të muajit gusht”.

“Vendimi apo ideja e kësaj qeverie për t’i futur duart në Trust është instrumenti më i mirë për ta përdorur për ta trajtuar këtë qeveri. Çdo element që ka të bëjë me qeverisje, mund ta elaborojmë me këtë ide. Fillimisht më duket zëvendëskryeministri Selmanaj ka thënë se do të lejohet qasja deri në 20 për qind që do të kompensohet më pas. Pastaj 10 për qind do të kompensohet pas 3-5 vitesh, tani jo dikush mundet të tjerët jo. E deri te vendimi i fundit që thotë mund të tërheqin, por jo të kompensohen. Kjo tregon se as minimumi i kapacitetit human nuk ekziston te kjo qeveri. S’e kanë idenë se çka duan të arrijnë, e pse duan ta shfrytëzojnë këtë instrument. Nëse unë konstatoj se keni nevojë për injeksion financiar ka instrumente tjera pa e prekur të ardhmen tënde. Ajo po të ndihmon duke ta shkatërruar standardin e jetës në pension. S’ka asnjë ekspert të ekonomisë që është dakord”, ka thënë ai.

Ai ka thënë se me një vendim të tillë “transferohet problemi në të ardhmen me shpresën se mund të përfitojë tash dikush me këtë masë”.

Bislimi ka thënë se me vendimin për mundësimin që qytetarët të tërheqin deri 10 për qind të kursimeve, shumica e qytetarëve do të tërhiqnin vetëm nga 30 euro.

“630 mijë llogari janë në Trust, mbi 300 mijë sosh kanë më pak se 500 euro kursime, ose mesatare 360 euro. 300 mijë persona mund të shohin se mund të tërheqin vetëm 30 euro. Mbi 99 për qind nuk e dinë sa kanë, mund ta dinë, por nuk e marrin. Impulsi është tejet i vogël në këtë rast. Nëse ideja ka qenë të rritet kërkesa agregate, ka edhe propozime të tjera që kanë nevojë për zero inteligjencë, si ajo e AAK-së ndaja secilit ka 100 euro. Sado idiotesk është më i mirë se ky i akademikëve të LDK-së”, ka thënë Bislimi.

20:37

Bislimi: Do të ishte antagonizëm të mbështesnim një Qeveri që e konstatojmë jolegjitime

Besnik Bislimi, nënkryetar i Vetëvendosjes, në emisionin Desku në KTV ka thënë se do të ishte antagonizëm nëse e mbështesin një Qeveri të cilën e cilësojnë jolegjitime.

Ai ka kritikuar Qeverinë Hoti për menaxhimin e pandemisë.

“Ky konstatim s’ka nevojë për një arsyetim, numrat apo ritmi me të cilin po shpërndahet virusi i koronës i përngjan më tepër vendeve që janë mbi 10 milionë banorë. Ka të bëjë edhe me neglizhencën që kjo Qeveri e trajton problemin e pandemisë. Kemi pasur 8 viktima brenda një dite, kurse Hoti ka qenë është marrë me idenë se jemi duke e pritur Vuçiqin për dialog”, është shprehur Bislimi.

Sipas tij gjithçka që ka bërë kjo Qeveri e ka bërë gabimisht, ose jo mjaftueshëm.

“Çdo masë lehtësuese që e kishte marrë Qeveria Kurti e kishte marrë me rekomandimet e qarta të IKSHPK-së dhe paralelisht kishte deklaruar se lirimi i masave varet nga situata në terren. Kjo qeveri nuk ka lëvizë me asnjë masë deri para dy ditësh kur situata ka dalë krejtësisht nga kontrolli. Përgjigja duhet të jetë në raport me rekomandimet e IKSHPK-së. Në fakt më nuk na komunikohet mendimi i IKSHPK-së. Shkarkimi drejtorit të SHSKUK-së tregon se ka një problem bukur të madh këtu dhe mbase ka edhe interesa të tjera”, ka thënë ai.

Sipas tij Qeveria Kurti kishte presion shumë më të madh nga bizneset.

“Jeta normale nuk mund të kthehet derisa ke pandeminë. Presioni ka qenë shumë më i madh në Qeverinë Kurti, ne jemi përballur me presion të madh nga përfaqësues të bizneseve, përfaqësues të Odave vazhdimisht kanë thënë se masat nuk janë të mjaftueshme. Prej momentit që ka ardhë Qeveria pas nesh të gjithë këta përfaqësues janë heshtë, që do të thotë se ose kanë pasur marrëveshje të fshehtë për të qenë partnerë në rrëzimin e Qeverisë ose pjesë e partneritetit ka qenë edhe lehtësimi i masave”, ka thënë Bislimi.

Ai ka treguar se pas situatës që ishte nënkontroll radhën e kishte rimëkëmbja ekonomike.

“Në momentin kur ne e kemi lënë zyrat situata ka qenë krejtësisht në kontroll. Ideja ka qenë se si të fillohet sa më shpejtë përmes Pakos Emergjente Ekonomike. Situata gradualisht i afrohej normalitetit. Pritej edhe ardhja e diasporës, që do të ndihmonte ekonominë. Tash është krejtësisht i paparashikueshëm dëmi ekonomik. Dëmi i mirëfilltë do të dihet në pjesën e dytë të ngushtit. Por, kam frikë se Kosova ka rrëshqitur nga një skenar që pritej që rënia të jetë më e ulëta në Ballkan, në një skenar ku rënia pritet të jetë më e larta në gjithë regjionin”, shprehet ai.

Sipas tij nuk mund të përkrahin këtë qeveri.

“Kjo Qeveri nuk mund të kërkojë ndihmën tonë, kish me qenë antagonizëm nëse përkrahim një Qeveri që e konstatojmë jolegjitime, e t’i ndihmojmë në implementimin e synimeve të saj. Ajo çfarë kemi thënë se çdo nismë brenda Kuvendit të Kosovës që ka për synim stabilizimin e situatës do të mbështetet nga VV-ja. Shembull nëse nesër në Kuvend fillon nisma për projektligjin për koronavirusin ne do ta mbështesim. Është gabim që me vendimet tona rrezikojmë shëndetin e deputetëve”, ka thënë Bislimi.