16:21

Hoti e Zemaj thonë se Qeveria e re është e fokusuar në përballjen me pandeminë

Kryeministri i Kosovës, Avdullah Hoti, dhe ministri i Shëndetësisë, Armend Zemaj, kanë thënë se Qeveria e re e vendit është e fokusuar në përballjen me pandeminë e koronavirusit.

Pas takimit, në ditën e parë të punës, Hoti e Zemaj kanë thënë se qeveria është e përkushtuar të tejkalojë situatën aktuale.

“Do të bashkëpunoj për llogaridhënien në interes të publikut, e rëndësisë së veçantë është edhe vizita e parë e kryeministrit, jo vetëm për shkak të aktualitetit, por edhe që të avancojmë shëndetësinë dhe të jemi të barabartë me vendet evropiane”, ka thënë Zemaj në një konferencë për media pas takimit me Hotin në MSH.

Në anën tjetër, Hoti ka thënë se vizitën e parë e ka bërë në MSH për të “treguar se mbesim të përkushtuar në situatën që po e kalojmë”.

“Për punën që kanë bërë na informuan dhe ato që na presin për javët e ardhshme. Po lutemi që të kalojmë sa më lehtë, ashtu si e kam prezantuar në Kuvend, ne kemi një program bukur të zhvilluar për përballjen me pandeminë”, ka thënë Hoti, që ka shtuar se do të hartojnë një plan afatgjatë për përballjen me pandeminë.

Ndërkaq, drejtori i Institutit Kombëtar të Shëndetësisë Publike në Kosovë, Naser Ramadani, ka bërë thirrje për kujdes nga qytetarët e i ka lutur që t’u përmbahen rekomandimeve.

“Diskutuam për situatën që po e mbajmë në kontroll dhe që është e qëndrueshme. Do të jemi në angazhim të shtuar, me lehtësimin e masave kemi menduar që qytetarët janë të vetëdijesuar për situatën. Apelojmë të kemi kujdes dhe t’u përmbahemi rekomandimeve që të ruajmë shëndetin tonë”, ka thënë Ramadani.

Asnjëri nga të tre zyrtarët s’ka pranuar pyetje nga gazetarët.

15:34

Hoti vazhdon me vizita, pritet nga ministri i Shëndetësisë, Zemaj

Avdullah Hoti, ndalesë tjetër të vizitave në ditën e parë si kryeministër, ka pasur Ministrinë e Shëndetësisë.

Ai është pritur nga ministri i Shëndetësisë, Armend Zemaj, ku është diskutuar për pandeminë COVID-19.

Hoti, sot, nisi punën si kryeministër me një mbledhje të kabinetit, më pas bëri homazhe te varret e ish-presidentit Ibrahim Rugova dhe të familjes Jashari në Prekaz.

15:09

Hoti viziton Prekazin, premton restaurimin e kullave të Jasharëve

Kryeministri i ri Avdullah Hoti dhe anëtarë të kabinetit të tij, pasdite kanë vizituar edhe kompleksin memorial “Adem Jashari” në Prekaz.

Ata bënë homazhe pranë varreve të komandantit legjendar, ndërkohë edhe u njoftuan me gjendjen e kullave të Jasharëve.

Hoti u prit nga Bekim Jashari, kryetar edhe i Skenderajt, i cli këroi që sa më shpejt të investohen në restaurimin e tyre.

“Ne pamë shkurt edhe pamjen e kullave dhe premtoi që do të kenë gjithë kujdesin e nevojshëm për të siguruar që ky vend i shenjtë të mbetet përgjithmonë aty ku kryhen nderimet e nevojshme. Besoj shumë shpejtë, çështje ditësh ose javës mos të them kështu, por do të merret me prioritet”, tha Hoti, përcjell KP-ja.

Sot, Hoti në ditën e tij të parë si kryeministër, vizitoi edhe varrin e ish-presidentit të Kosovës, Ibrahim Rugova.

12:11

Hoti bën homazhe te varri i Rugovës

Kryeministri i ri i Kosovës, Avdullah Hoti, ka bërë homazhe te varri i ish-presidentit Ibrahim Rugova.

Ai gjatë ditës pritet të bëjë homazhe edhe në Kompleksin Memorial “Adem Jashari” në Prekaz.

“Kemi ardhur të nderojmë themeluesin e shtetit të Kosovës, do të vazhdojmë të bëjmë nderime edhe në kompleksin memorial ‘Adem Jashari”, ka thënë Hopti.

09:53

Hoti: Unë besoj në këtë ekip dhe program

Kryeministri i ri i Kosovës, Avdullah Hoti, ka thënë se beson në ekipin e tij dhe programin qeverisës. Ai ka shtuar se prioritet do ta ketë pandeminë COVID-19 dhe rimëkëmbjen ekonomike.

“Është një program ambicioz. Unë besoj në këtë program, besoj në këtë ekip. Duhet të adresohen menjëherë sfidat duke filluar nga pandemia, nga rimëkëmbja ekonomike. Do të ndërtojmë një diskurs tjetër edhe brenda këtij kabineti qeveritar edhe brenda partnerëve të koalicionit edhe me partitë. Do t'i kthehemi punës e jo retorikës. Prioritetet tona përveç luftës ndaj pandemisë e rimëkëmbjes ekonomike, janë forcimi i shtetit ligjor, marrja përsipër në baza kushtetuese e dialogut, adresimi i nevojave në arsim e shëndetësi. Unë pres bashkëpunimin e ngushtë”, ka thënë Hoti.

09:45

Nis mbledhja e parë e Qeverisë së re të Kosovës

Ka filluar mbledhja e parë e Qeverisë së re të Kosovës me kryeministrin e ri Avdullah Hoti.

09:01

Avdullah Hoti nis punën si kryeministër

Krejtësisht i vetëm kryeministri i sapozgjedhur, Avdullah Hoti, sot ka marrë pjesë në ceremoninë e marrjes së detyrës.

Me një kalim para Gardës Ceremoniale, Hoti që dje u votua si pasardhës i Albin Kurtit, ka nisur ditën e parë të punës si i pari i ekzekutivit.

Pak minuta pas marrjes së detyrës, Hoti pritet të mbledh kabinetin e ri qeveritar për të mbajtur mbledhjen e parë si kreu i ekzekutivit.

Në ditën e parë si kryeministër, Hoti, pas mbledhjes së qeverisë do të bëjë homazhe te varri i ish-presidentit Ibrahim Rugova dhe në kompleksin memorial “Adem Jashari”.

Ndërkohë, vizitën e parë si kryeministër do ta bëjë në Ministrinë e Shëndetësisë.

Hoti u zgjodh kryeministër me minimumin e votave të duhura – 61, si pjesë e koalicionit LDK, AAK, AKR-Nisma dhe komunitetet joshumicë.

Dje, tashmë ish-kryeministri Albin Kurti, deklaroi se nuk do t’ia dorëzojë detyrën Hotit me arsyetimin se “nuk mund ta bëjë këtë meqë e ka shkarkuar vetë kohë më parë”.