Arbëri

Faktori ndërkombëtar kërkon nga Kuvendi të ratifikojë marrëveshjet financiare

Foto: Driton Paçarada / KD

Faktori ndërkombëtar ka vlerësuar institucionet e Kosovës për menaxhimin efektiv të krizës së shkaktuar nga COVID-19, por edhe u ka bërë thirrje që të ratifikohen marrëveshjet ndërkombëtare financiare.

Në një deklaratë të përbashkët të Shefes së Zyrës së BE-së në Kosovë, Udhëheqësit të Misioneve të BE-së, ambasadorëve të Norvegjisë, Zvicrës e Mbretërisë së Bashkuar, Udhëheqësit të BERZH-it për Kosovën dhe Menaxherit të Zyrës së Bankës Botërore në Prishtinë, thuhet se tash rëndësi madhore është që rregullat e vendosura nga Qeveria për të parandaluar përhapjen e virusit të respektohen nga të gjithë.


“Për më tepër, besojmë se në këto kohë të pasigurisë së madhe, të gjithë aktorët duhet t’i lënë mënjanë dallimet dhe të punojnë së bashku për të mirën e njerëzve. I mirëpresim të gjitha mundësitë për t’i diskutuar bashkërisht, në instancat e duhura institucionale, masat e nevojshme për kalimin e sfidës së Covid-19, përfshirë ratifikimin e marrëveshjeve financiare të negociuara me BE-në, shtetet e saj anëtare, Institucionet Financiare Ndërkombëtare, si edhe masat kombëtare për të adresuar krizën shëndetësore dhe ekonomike”, thuhet në komunikatën e përbashkët.

Ditë më parë, kryetarja e Kuvendit të Kosovës tha se disa marrëveshje financiare ndërkombëtare duhet të miratohen në Kuvend dhe se për dy prej tyre, afati është fundi i qershorit.

Seanca e radhës e Kuvendit të Kosovës është caktuar për 4 qershor, por ratifikimi i këtyre marrëveshjeve nuk është futur në rend dite, me arsyetimin se nuk ka, siç ka thënë Osmani “dakordim mes partive politike”.