5 perditesime
21:37

Gjini: Pa konsensus të gjerë Kosova dështon në dialog

Të mandatuarit të LDK-së për kryeministër, Avdullah Hoti, duhet t’i mjaftojnë dy javë për të parë se a e ka seriozisht çështjen e bashkimit të partive politike në Kosovë për dialogun me Serbinë, ka thënë nënkryetari i AAK-së, Ardian Gjini, në Deskun e KOHËS. Sipas tij, nëse nuk arrihet konsensusi i gjerë në vend, Kosova dështon në dialog.

Gjini ka thënë se Kosova duhet të ketë përfaqësim sa më të gjerë në fazën finale të dialogun e konsensus të plotë politik për çështjet që e presin. Ka shtuar se presidenti i vendit nuk mund të përjashtohet nga kjo pikë.

“Qeveria duhet të udhëheqë bisedat, e ka thënë Gjykata Kushetuese. Mirëpo kushdo që të jetë në qeveri duhet të dëshmojë, jo të duket, por të dëshmojë që e ka seriozisht insistimin për të pas bazë të gjerë të forcave që duan të kyçen në bisedime. Nëse dështojmë këtë, Kosova do ta ketë shumë problem”, ka thënë Gjini.

Sipas tij, forcat politike ishin bashkuar më lehtë në të kaluarën për shkak se kanë kërkuar pavarësinë, ndërsa tash “është më zor”.

“Sepse s’po flasim për pavarësi, por pse po rezistojnë është se këto bisedime mund të prodhojnë diçka jo fort popullore si pavarësia. Këto raste duhet të shihet lidershipi dhe nervi e ndjenja për vendin. Mund të ndodhemi në situatën kur një parti thotë se e di që mund të bëhet një asociacion a diçka ‘le te bëjnë këta’. Kjo po ndodh. Pak ka liderë që thonë se e marr barrën e nuk i lë vetëm tjerët. Një nga të paktët është Ramush Haradinaj. Disa të tjerë po hezitojnë. Nëse liderët politikë mbërrijnë të ndihmojnë njëri-tjetrin të paktën në bisedime ketë konsensus sa më të gjerë, Kosova do të dalë mirë. Nëse dështojmë, Kosova do të dalë keq. Ndoshta jo vendime të këqija, por ritëm shumë të keq të zhvillimit të Kosovës në marrëdhënie ndërkombëtare. Do të ketë rrethana ku do të gjendet pothuajse vetëm. Bota ka probleme të mëdha. Po t’i shkojë dikush për probleme se në Kosovë s’po merren vesh tre vetë brenda, një vend ku po ka problem me koronavirus ua mbyll derën. Duhet të jemi bashkë nëse e duam fitoren. E them publikisht duhet të mundohemi shumë për të arritur një gjë të tillë e jo të duket sikur po mundohet, sidomos zoti Hoti. Ai do të ketë pjesën kryesore. Pavarësisht a do të pranojnë apo jo, do të shihet oportunizmi i të tjerëve. Kosova do të ketë kryeministër. Për t’u dëshmuar a e ka seriozisht mund të shihet vetëm për dy javë. Do të jetë e dukshme për dy javë se a e ka seriozisht mundin për të bashkuar forcat politike për bisedime. Ka ndjesi këtu. Do të shohim a e ka apo jo. S’po supozoj se nëse e ka seriozisht VV-ja e PDK-ja do të vrapojnë pas tij, por të paktën duhet të lihet një ndjesi se e ka seriozisht”, ka deklaruar tutje Gjini.

Sipas Gjinit, dialogu do të jetë i pasuksesshëm nëse bëhet pa pjesëmarrjen e opozitës.

Ai ka thënë se Kosova e ka bërë të qartë se nuk lejon ndryshim kufijsh e se “ideja e shkëmbimit të kufijve po tentohet të ngjallet kryesisht nga lobi serb”.

Nënkryetari i AAK-së, Ardian Gjini, ka thënë se reciprociteti me Serbinë ka ekzistuar edhe para se të vinte Albin Kurti në krye të Qeverisë.

Ai ka thënë se populli nuk i votoi edhe pse AAK-ja kërkoi që taksa të mbahej.

“Ka përfunduar një periudhë, ne kemi kërkuar ta mbajmë taksën, populli nuk na ka votuar, ai që ka fituar e ka heq. Reciprociteti ka ekzistuar edhe para Kurtit, duhet m’i pa dokumentet shtetërore qe të shihet që ka ekzistuar”, ka thënë ai.

Gjini ka thënë se Qeveria Hoti duhet të bashkëpunojë me Shtetet e Bashkuara të Amerikës pa asnjë dilemë.

Sipas tij, nëse dikujt duhet t’i besojë Kosova, atëherë ajo është SHBA-ja.

“Kurti është ekzemplar i politikanëve që flasin shumë e ja komplikojnë jetën vetes për m’i realizu ato që i kanë në mend. Qeveria Hoti duhet të bashkëpunojë me SHBA-në pa asnjë dilemë. Nëse dikujt mundemi me i besu që ka fuqi edhe vullnet, është SHBA-ja”, ka thënë ai

Ndërkaq duke folur për Gjermaninë, ai ka thënë se ajo është ndër vendet që e ka ndihmuar më së shumti Kosovën porse fuqia e saj politike që të ndikojë në rrethanat në Ballkan është më e vogël se e SHBA-së.

“Unë nuk konsideroj që një grupim politik shfaq antiamerikanizëm nëse në një moment nuk pajtohet me SHBA-në në ndonjë element. Nëse e ke humb Amerikën e ke humb edhe Evropën. Gjermania është nder vendet që e ka ndihmu Kosovën më së shumti edhe me investime edhe me gjithçka. Fuqia politike e Gjermanisë për me ndiku në rrethanat në Ballkan në Kosovë është pak më e vogël se e Amerikës”, ka thënë ai.

21:19

Sipas Gjinit, Kurti qëllimshëm nuk ia dha Thaçit emrin e mandatarit

Nënkryetari i AAK-së, Ardian Gjini, ka thënë se kryetari i VV-së dhe kryeministri në detyrë, Albin Kurti, nuk ka dashur t’ia jap emrin e mandatarit presidentit Hashim Thaçi.

Ai në DESKU-n e Kohës ka deklaruar se Kurti ka dashur të qëndrojë permanent në Qeveri ose të shkojë në zgjedhje.

“Nuk është kulturë politike me e ditë që presidenti ka të drejtë me ja dhënë dikujt mandatin, dhe partia e parë me thënë që nuk ka të drejtë. Logjika e shëndoshë tregon qartë se ata nuk duan t’ia japin emri”, ka thënë ai.

Ai thotë se nëse duan që shteti të funksionojë, presidenti duhet menjëherë ta kërkojë emrin e mandatarit, të mos presë 10 apo 15 ditë.

Gjini shton se nëse Kushtetuesja vendosë kohë për zgjedhjen e mandatarit, do të krijonte provizion kushtetues, sipas të cilit, një gjë e tillë nuk ekziston.

“Që të funksionojë shteti, presidenti duhet ta kërkojë emrin e mandatarit menjëherë, jo pas 10 ose 15 ditëve dhe menjëherë ta dekretojë tjetrin. Unë nuk besoj që Gjykata Kushtetuese mundet me vendosë kohë sepse krijon provizion kushtetues që nuk ekziston”, ka thënë ai.

Nënkryetari i AAK-së ka kërkuar që politikanët në vend të kulturohen politikisht, pasi që sipas tij, gjithmonë mund të gjendet arsye për abuzim.

“Çka nuk iu bie në mend njerëzve kur mësojnë me abuzu me provizione që nuk eksitojnë, duhet me u kulturu politikisht, që kur ekziston një situatë e tillë, dihet që Kurti nuk po do me e marrë mandatin sepse ose po do të qëndrojë në Qeveri permanent ose me shku në zgjedhje. Edhe nëse e rregullojmë këtë defekt kushtetues prapë dikush në të ardhmen ka me gjete një vjegëz me abuzu në të ardhmen”, ka thënë ai.

Ndërkaq për rrëzimin e presidentit Hashim Thaçi, ai ka thënë se nuk është diskutuar brenda partisë.

“Aleanca nuk ka diskutuar lidhur me rrëzimin e presidentit, mirëpo ka pasur momente që ka qenë shumë i dëmshëm”, ka thënë ai.

21:04

Gjini pranon se në institucionet e pavarura ka ndikim të madh politik, por refuzon që këtë ta quajë “kapje”

Nënkryetari i AAK-së, Ardian Gjini, ka kritikuar atë që partia në pozitë, VV-ja, po thotë se po e bën – çkapjen e institucioneve të pavarura të shtetit.

Sipas Gjinit, çkapje do të ishte nëse ato vërtetë do të ndodhnin, porse shton se VV-ja po e bën këtë për t’i kapur vetë.

Gjini i ftuar në emisionin “Desku” në KTV, ka pranuar se megjithatë ka ndikim politik në institucionet e pavarura. Ai ka refuzuar që këtë ta quajë kapje e shtetit.

“Nuk dua të përmend këtë term, por vërtetë ka jashtëzakonisht shumë ndikim politik në institucionet e pavarura. Është e pamohueshme, pasi gjatë krijimit të tyre, meqë janë institucione të pavarura që janë krijuar vonë, pas pavarësisë. Në fazat fillestare ka pasur mbushje të institucioneve, ka pasur shtrirje të ndikimit politik, jashtëzakonisht shumë, këtë e dinë njerëzit. Por çfarë ndodhi kur erdhi VV-ja? Tha se po do me i pastru këto institucione nga elementët politikë, por po i sjell njerëzit e vet. Po e bën Kosovën një shtet edhe më i keq se që ishte. Kjo është regres”, ka thënë Gjini.

Ai ka folur edhe për dy vitet e fundit pushtet të AAK-së. Ka thënë se ish-kryeministri Ramush Haradinaj, kryetar edhe i AAK-së, e kishte të vështirë, pasi ishte në një koalicion me shumë parti dhe shpesh i “mbështetur për muri”.

“Ne e kemi sponsorizuar një projekt ligj duke supozuar se vetë do të jemi në qeveri. Kishim propozuar 15 ministri dhe kishim propozuar zvogëlimin e zv.ministrave. Haradinaj për shembull, është ndodhur në një situatë ose të të heqq dorë prej formimit të qeverisë ose të rrisë numrin e zv.ministrave. Në këtë situatë është gjetur Haradinaj, por ne po mësojmë prej gabimeve, diçka po kopjojmë, diçka po zbulojmë vetë”, është shprehur ai, duke komentuar numrin e madh të zv.ministrave në Qeverinë Haradinaj, mbi 80.

Gjini po ashtu ka komentuar edhe zhvillimet e fundit politike, ku partia e tij AAK-ja, mëton që të formojë qeverinë me LDK-në dhe Nismën.

Ai tha se është kundër mbajtjes së zgjedhjeve, siç kërkon VV-ja, jo për shkak të pandemisë, por pasi ato janë mbajtur para shtatë muajve.

“Nuk mendoj se duhet që sa herë të kemi një mocion mosbesimi të shkojmë në zgjedhje. Deputetët kanë marrë mandat 4-vjeçar, ata përfaqësojnë diçka. Edhe në Britani e Itali ndodhin ndërrimet e qeverive. Në demokracitë parlamentare, nuk shkohet në zgjedhje sa herë ka mocione. Kushtetuta jonë është e ngjashme, por sjellja jonë nuk ka qenë e ngjashme me demokracitë e zhvilluara”, ka thënë Gjini.

20:52

Sipas AAK-së, Vetëvendosje donte t’i zaptojë institucionet e Kosovës

Ardian Gjini, nënkryetar i AAK-së, ka thënë se Lëvizja Vetëvendosje dhe kreu i saj, Albin Kurti, kanë dashur t’i zaptojnë institucionet e Kosovës kur nisi të qeveriste me vendin.

Duke arsyetuar rrëzimin e Qeverisë Kurti, Gjini në Deskun e KOHËS ka thënë se “kemi parë nguti për të zaptuar institucionet”.

“AAK-ja ka besuar se zoti Kurti po qeveris jashtëzakonisht keq e duke vepruar në dëm të Kosovës, qoftë edhe për shkak të sjelljeve të tij, kapriçove që ka, bindjet për akterët tjerë politikë e për trasimin e atyre bindjeve te elektorati i vet, që janë bindje që shkaktojnë urrejtje e jo garë dhe krijimi i bindjeve se në Kosovë ekziston një parti politike e të tjerat duhet shuar. Është populizëm i skajshëm. Mund të flas gjatë për këtë punë”, ka thënë Gjini teksa ka shtuar se në “Qeverinë Kurti ka pas shumë mashtrim e falsitet”.

“Kemi parë nguti për të zaptuar institucionet, sepse për t’i kapë kam thënë më 2009 i pari në Kuvend e tash e kanë mësuar të gjithë. Është shkel Kushtetuta për shkak të insistimit për të zaptuar institucionet, ka pas frikë se me gjendje të jashtëzakonshme pushojnë disa aktivitete e nuk do të mund të merren disa veprime që janë marrë më vonë e që janë në kundërshtim me ligjin, parimet e premtimet e tyre. AAK-ja s’ka pas fare dilemë që Qeveria Kurti do të duhej të shkarkohej”, ka thënë tutje Gjini.

Nënkryetari i AAK-së ka thënë se kjo parti nuk ka biseduar me LDK-në për koalicionin e ri para se të rrëzohej ai VV-LDK. Sipas tij, ka pasur shumë pak zëra kundërshtues brenda AAK-së për një marrëveshje me LDK-në.

“Zyrtarisht s’ka pas negociata para se të ndodhë rënia e qeverisë, pastaj po. Jozyrtarisht kanë mundur të bisedojnë, por s’ka pas biseda zyrtare. S’ka pas nevojë Kurti ta sjellë vendin në krizë, por kur e ka sjellë, s’ka pas logjikë AAK-ja të përkrahë qeveri të pakicës për shkak të problemeve që do të ishin, por ra me më shumë se 2/3 e votave. Të gjitha partitë votuan pro rrëzimit, pos VV-së. Në çfarëdo rrethane do ta votonim rrëzimin, për të mos thënë që në shumë aspekte e kemi ditur se është e dëmshme kjo qeveri. Kanë mundur ta shtyjnë rrëzimin, por nëse kuptohen partitë në sensin normal, janë grupe njerëzish me ideologji të caktuar të përbashkët e ato ndihen të fyera kur dikush i cenon në atë mënyrë. Kur grupet ndihen të fyera marrin masat që besojnë se të paktën nuk lejojnë të poshtërohen. Kjo s’ka të bëjë me një numër njerëzisht që qeverisin, por ka pas grup me mijëra njerëz që janë fyer. Ne jemi në politikë për shkak se kemi elektorat. Mund të ndodhë që një pjesë është irrituar. Mund të ketë edhe të tjerë, pos elektoratit të VV-së, por mund të them se ne kemi ndjesi, politikanët kanë ndjesi se çka mendojnë njerëzit që na votojnë. Votuesi tradicional i AAK-së është në rregull me këtë vendim të Aleancës. Vendimi u mor në Këshill Drejtues me votë unanime, shumë pak vota kundër. Edhe kjo ishte ndjesi”, ka deklaruar Gjini.

20:39

Gjini: Kurti deshi të vendosë autoritet të plotë në Qeveri dhe ta ulë LDK-në

Nënkryetari i AAK-së, Ardian Gjini, rrëzimin e Qeverisë e ka quajtur kalkulim të kryeministrit tashmë në detyrë, Albin Kurti.

Sipas tij, me shkarkimin e Veliut, Kurti duhet ta ketë llogaritur një situatë të tillë, ndërkaq arsyet pse ai mund të ketë dashur ta rrëzojë Qeverinë e tij, ai thotë se nuk i di.

Gjini tutje ka shtuar se Kurti ka dashur të vendosë autoritet të plotë në Qeveri, ta ulë LDK-në dhe ta shkarkojë Veliun.

“Betejat politike nuk janë ndalur askund në botë. Politika nuk ndalet për shkak se nuk ka logjikë me u ndalë. Te rënia e Qeverisë, unë besoj që Kurti ose nuk ka qenë i aftë të bëjë kalkulime politike kur e ka shkarkuar Veliun, ose e ka bërë me vetëdije të plotë. Nëse ka kalkuluar saktë, atëherë e ka marrë atë çka ka dashur, nëse ka gabuar atëherë i ka bartë pasojat. Ai ka dashur edhe të vendosë autoritetin e plotë në qeveri, ta ulë LDK e ta shkarkojë Veliun”, ka thënë ai.

Ai ka thënë se “shkrepësja” e rrëzimit të Qeverisë ishte shkarkimi i Agim Veliut nga pozita e ministrit të Punëve të Brendshme.

Sipas tij, i pari i Qeverisë në detyrë me shkarkimin e Veliut, ose ka dashur të shkaktojë krizë të brendshme ose ta rrëzojë Qeverinë.

“Në çdo konflikt ekziston diçka që e ndezë situatën. Ndezja ka qenë shkarkimi i Veliut. Unë e kam ditë që atë moment që është shkarkuar Veliu, ajo qeveri do të prishet. Kurti e ka ditur se kjo do të ndodhte. Mundet me pas shumë arsye pse Kurti e ka shkarkuar Veliun dhe e ka prishur Qeverinë. Kjo është shkrepësja e rënies së qeverisë. Kurti është dashur ta dijë që këtë kohë nuk është dashur të bie qeveria. Ose ka dashur të shkaktojë krizë ose me rënë qeveria”, ka thënë ai.

20:25

Gjakova pa asnjë rast me COVID-19 tash e dy javë, por kryetari Gjini fton për kujdes

Kryetari i Gjakovës, Ardian Gjini, është i lumtur që tash e tri javë nuk ka raste të reja me COVID-19 në këtë komunë, por shton se beteja ende nuk është fituar.

Ai i ftuar në emisionin “Desku” në KTV, ka thënë se ka dy javë që të gjithë të prekurit me koronavirus janë shëruar. Megjithatë, ai ka ftuar për kujdes, pasi sipas tij beteja me pandeminë nuk është fituar.

“Fatkeqësisht kemi një rast që përfundoi me vdekje, një shtatzënë, por të tjerët janë shëruar.. Kjo s’do të thotë asgjë, s’duhet të relaksohemi, mund të kemi raste të reja, nuk është për mburrje, por është lajm i mirë. Nëse në Prizren ka një rast, Gjakova s’bën të ndihet rejat, po ashtu edhe nëse ka në Ferizaj. Jemi vend i vogël dhe duhet kujdes”, ka thënë Gjini.

I pari i Gjakovës, ka falënderuar edhe të prekurit me COVID-19 – gjithsej 15.

“Duhet një falënderim edhe për personat që kanë qenë të infektuar, kanë qenë solidarë, bashkëpunues, kanë mbrojtur familjen, rrethin dhe Komunën me sjelljen e tyre”, ka thënë nënkryetari i AAK-së.

Ai ka folur edhe për menaxhimin që ka bërë komuna në këtë kohë. Pjesa më e madhe e stafit është lënë e lirë, në një pushim të detyrueshëm. Punët thotë se janë përgjysmuar, por falë situatës kanë dalë punë të tjera, si shpërndarje e ndihmave për familjet në nevojë, dezinfektimi i rrugëve dhe hapësirave tjera.

Gjini po ashtu tha se mbyllja e bizneseve ka dëmtuar rëndë ekonominë e qytetarëve. Ai tregon se një numër i madh janë të lidhur me hotelerinë.

“Njëjtë si në komunat tjera, biznesi është dëmtuar shumë, sidomos ato të vogla dhe të mesme. Shumë punojnë në hotelieri, ata e kanë pësuar jashtëzakonisht shumë. Unë e kam lutur ministrinë Arben Vitia, që baret restorantet e kafiteritë të punojnë, me ‘take-a-ëay’. Shpejt, besoj do të bëhet kjo, të paktën duhet të lejohet që hoteleria ta ndihmojë veten”, ka thënë Gjini.

Gjini duke folur për menaxhimin e situatës me koronavirus, tha se Qeveria ka ndjekur shembujt e vendeve tjera në botë.

Ai ka thënë se është dashur të veprohet ndryshe sa i përket bizneseve, duke shtuar se është dashur të kopjohen vendet tjera edhe në aspektin e ekonomisë.

“Veprimet që i ka marrë qeveria janë veprime standarde qe i kanë marrë të gjitha vendet. Kosova ka mundur edhe te ekonomia t’i kopjojë vendet tjera. Për një muaj janë ndalur të gjitha veprimtaritë. Ka mundur të ketë balancim më të mirë”, ka thënë ai.