Arbëri

Komente konfrontuese për mandatarin vihen para Gjykatës Kushtetuese

Foto: Driton Paçarada / Koha
 

Krerët e të tria institucioneve kryesore të Kosovës, Avokati i Popullit dhe deputetë nga katër parti i kanë dorëzuar të premten në Gjykatën Kushtetuese komentet përkitazi me meritat e kërkesës së Lëvizjes Vetëvendosje (LVV), përmes së cilës Gjykatës i është kërkuar vlerësimi i kushtetutshmërisë së Dekretit të presidentit Hashim Thaçi, nëpërmjet të cilit i propozuari i Lidhjes Demokratike (LDK), Avdullah Hoti, është caktuar mandatar për formimin e Qeverisë së re. Palët kanë ofruar komente konfrontuese.

Ora 16:00 e së premtes ka qenë afati i fundit kur palët e interesuara kanë mundur të dorëzojnë pikëpamjet e tyre në Gjykatë, institucion ky që saktësisht një javë më parë, me shumicë votash, ka vendosur të miratojë masën e përkohshme në kohëzgjatje deri më 29 maj, dhe që të pezullojë menjëherë zbatimin e Dekretit që presidenti e kishte firmosur një ditë më herët. Për pasojë, planet e presidentit për një qeveri të re, janë pezulluar. Kushtetuesja ka kumtuar se kërkesën do ta shqyrtojë me urgjencë, shkruan KOHA.