Gjendja e krijuar nga pandemia Covid-19 ka ndikim në jetën e secilit fëmijë dhe të shoqërisë në përgjithësi.
Situata aktuale është shqetësuese edhe për të rriturit, e mund të imagjinoni se si po ndihen fëmijët tani. Prandaj për ta përballuar më lehtë duhet t’u kushtojmë vëmendje të posaçme edhe më të vegjëlve, duke iu ndihmuar të njihen me masat parandaluese të sëmundjes dhe si mund të kalojnë kohën të mbyllur në shtëpi.
Po ashtu, është me rëndësi të ndihmohen prindërit për t’iu qasur më të vegjëlve në këtë situatë shqetësuese për secilin, duke ofruar këshilla dhe udhëzime si mund të tejkalohet në mënyrë më të qetë dhe të përballueshme kjo gjendje.
Për këtë qëllim Qendra për Arsim e Kosovës së bashku me Sos Fshatrat e fëmijëve të përkrahura nga Fondacioni Kosovar për Shoqëri të Hapur dhe në bashkëpunim me KTV-në kanë krijuar programin informues edukativ “Afër jush”, i cili ndihmon familjet të informohen për kujdesin dhe mirëqenien e fëmijëve në situatë pandemie, në fushat e shëndetësisë, psiko-sociale dhe edukativo-arsimore.
Përmes këtij emisioni, i cili do të transmetohet në kuadër të emisionit “Express”, fëmijët dhe familjet e tyre do të ndihmohen të kuptojnë rëndësinë e shtuar të higjienës gjatë virusit COVID-19.
Nga ky emision prindërit do të marrin ide se si mund të rrisin angazhimin e fëmijëve duke realizuar aktivitete edukative, argëtuese, rekreative, të cilat ndihmojnë zhvillimin e fëmijëve dhe organizimin e ditës në kushtet e shtëpisë.
Emisionet do të kenë edhe kohën e rezervuar për ekspertë, të cilët do të japin këshilla apo edhe do t’iu përgjigjen pyetjeve te marra nga publiku. Ekspertët përcaktohen varësisht nga tema që shtjellon emisioni, ata mund te jenë, mësimdhënës, mjekë, psikologë, sociologë, etj.
Edicioni i parë do të ketë për temë “Adaptimin në situatë të re” dhe do të transmetohet të premten (1 maj). Do të diskutohet me psikologun Lirim Berisha për situatën e krijuar nga pandemia dhe për atë se si ndikon kjo situatë në mirëqenien e fëmijëve.
Si të kujdesemi që të mos shfaqim shqetësimet tona tek fëmijët? Sa është e rëndësishme mbajtja e një rutine të caktuar ditore? Çfarë aktivitetesh u ndihmojnë fëmijëve në këtë periudhë? Ndërsa aktorja Vlora Merovci do të japë një mesazh se sa e rëndësishme është që t’u qëndrojmë fëmijëve pranë në këtë periudhë?
“Afër jush” do të transmetohet çdo të mërkurë dhe të premte, në programin e pasdites në KTV, duke filluar nga ora 16:30.
© KOHA. Të gjitha të drejtat janë të rezervuara.
