1 perditesime
18:18

VV-ja reagon pas akuzave të LDK-së: Po përgatitet për puç

Nënkryetarja e Lëvizjes Vetëvendosjes, Arbërie Nagavci, ka reaguar ndaj akuzave të sotme të LDK-së se partia e saj po bën fushatë linçuese ndaj SHBA-së.

Nagavci, përcjell KP-ja, tha se këto akuza po bëhen si parapërgatitje për një puç nga LDK-ja, transmeton KOHA.

“Është jo veçse e pakuptueshme për mua, por është e habitshme se sa poshtë ka ra një subjekt si LDK-ja dhe në llumin ku ata tashmë janë zhytur vetë, mundohen që të përhapin balt për gjithë të tjerët. Është vërtet e pakuptueshme se si mundën që të përdorin artikuj të tillë duke qenë se, në se e shihni se cilit artikull i referohen, është një artikull krejtësisht i pavërtetë dhe që e merr si objektiv një lajm të publikuar në një faqe të mbështetësve të një subjekti tjetër, për më shumë ata janë nisur prej komenteve në komente, domethënë është krejtësisht e ulët, e pavërtetë”, tha Nagavci për KP-në.

Nagavci, që është edhe nënkryetare e Kuvendit, tha se kjo është parapërgatitje nga LDK-ja për siç tha ajo, puç.

“Gjithë kjo që po ndodh, ky harmonizim i LDK-së, i disa prej gazetave është parapërgatitje për atë që po mundohen të bëjnë, një ‘puç’ duke u munduar që të krijojnë aleanca me ata që deri dje i kanë quajtur kapës të shtetit”, u shpreh Nagavci.

LDK-ja gjatë ditës akuzoi VV-në dhe siç tha ajo, militantët e saj se po bëjnë fushatë të ulët ndaj SHBA-së.

15:44

LDK-ja fton VV-në e Kurtin të ndalin fushatën, sipas saj, linçuese ndaj SHBA-së

Lidhja Demokratike e Kosovës (LDK) përmes një postimi në Facebook, ka dënuar ashpër, siç e ka quajtur ajo “fushatën linçuese ndaj SHBA-së nga ana e militantëve të VV-së”.

“LDK dënon ashpër fushatën e ulët linçuese, e cila po zhvillohet në rrjetet sociale apo përmes deklaratave politike, e orkestruar, qoftë drejtpërdrejt përmes aktivistëve politikë apo forma tjera indirekte, ndaj aleatit të Kosovës, Shteteve të Bashkuara të Amerikës dhe personaliteteve të SHBA-së”, thuhet në postimin e LDK-së në Facebook.

Sipas LDK-së, ish-partnerit qeveritar të VV-së, fushata është e pafalshme, transmeton KOHA.

“Fryma e fushatës së tillë u instalua nga deklaratat publike të disa këshilltarëve të Kryeministrit të Kosovës, e pasuar nga militantë të LVV-së. LDK fton qytetarët e Kosovës të refuzojnë këtë fushatë dhe të mos bëhen pjesë e një diskursi që nuk pasqyron edukatën tonë personale, familjare e qytetare dhe nuk i takon kulturës dhe traditës tonë, si shoqëri e si komb. LDK fton Lëvizjen Vetëvendosje dhe kryetarin e saj, Albin Kurti, që është kryeministër në detyrë, ta dënoj këtë fushatë dhe të ndikojë në ndaljen e saj. SHBA-ja meriton respekt dhe falënderim të përhershëm të Kosovës dhe të çdo qytetari të saj”.