Arbëri

Norvegjia i dhuron Kosovës 442 mijë euro për blerjen e respiratorëve

Ambasada e Norvegjisë në Kosovë ka njoftuar se do ta ndihmojë Kosovën me 442 mijë euro.

Kjo është bërë e ditur përmes një njoftimi në Facebook nga kjo ambasadë.

Sipas njoftimit përmes këtij donacioni synohet blerja e respiratorëve.

“Norvegjia do të kontribuojë me 5 milionë krona norvegjeze për të ndihmuar në blerjen e respiratorëve të nevojshëm për Kosovën në kohën e shpërthimit të COVID-19. Një falënderim i veçantë për partnerin tonë UNDP Kosova. Marrëveshja mes ambasadës së Norvegjisë dhe UNDP-së është nënshkruar sot”, thuhet në njoftim.

Ndërkohë, ministri i Shëndetësisë, Arben Vitia, ka takuar ambasadorin norvegjez Jens Erik Grandalh. Sipas njoftimit nga MSH-ja, ambasadori është ndarë i kënaqur me punën që po bëjnë autoritetet e Kosovës.

“Ai, po ashtu, tha se populli i Norvegjisë, përpos kontributit në vlerë prej 500 mijë eurosh në kuadër të fondit të Bashkimit Evropian në ndihmë për Kosovën, është i gatshëm që edhe në të ardhmen të kontribuojë për çfarëdo që paraqitet nevoja në kuadër të ndihmesës për shëndetin publik”, thuhet në komunikatë.