1 perditesime
00:14

Krasniqi: Heqja e taksës, mashtrim i radhës i Qeverisë

Nënkryetari i i Kuvendit nga radhët e PDK-së, Memli Krasniqi, ka thënë se partia e tij ka mbajtur dhe vazhdon të mbajë qëndrim konsistent.

Në një bisedë në Interaktiv të KTV-së, ai ka thënë se PDK-ja ishte kundër Qeverisë Kurti dhe si pasojë edhe votoi pro rrëzimit të kësaj qeverie në mocionin e iniciuar nga LDK-ja, partner qeveritar.

Ai ka përsëritur se PDK-ja do të mbetët në opozitë në këtë kohë, derisa zërat se partia e udhëhequr nga Kadri Veseli do të mbështesë një Qeveri tjetër i ka quajtur paragjykime.

“Duhet të respektohen hapat kushtetues, për hapat e mëvonshëm do të sillemi përgjegjshëm, sikur deri më tash”, ka thënë Krasniqi. “Ato janë kalkulime të gabueshme, çështje të interpretimit. PDK-ja i ka qëndrimet e veta dhe natyrisht se do të votojë në Kuvend karshi këtyre qëndrimeve në pajtim edhe me programin tonë politik, gjithçka që thuhet për ne është paragjykim”.

Ai ka folur edhe për tarifën e hequr sot për mallrat e Serbisë dhe të Bosnjë-Hercegovinës.

Sipas tij, ky është një vendim gjysmak dhe mashtrues nga ana e Qeverisë në detyrë.

Qeveria në detyrë sot ka njoftuar se ka nisur me masat e reciprocitetit ndaj Serbisë, por Krasniqi thotë se kjo s’ka të bëjë me të vërtetën.

“Ne sot kemi një deklaratë për këtë çështje, është një vendim në bazën e vendimeve mashtruese të kësaj qeverie, realisht nuk ka të bëjë asgjë me premtimet as me konsistencën. Nuk ka të bëjë më reciprocitet, është munduar të kamuflohet me reciprocitetin gradual. Fillimisht tha se do të bëhet reciprociteti pastaj do të hiqet taksa, pastaj tha se taksa e reciprociteti do të ndodhin për një ditë e më pas tha se fillimisht do të hiqet taksa e më pas do të vendoset reciprociteti”, tha ai.

Krasniqi po ashtu ka folur edhe për maunat e kthyer në kufi, pasi nuk i referoheshin Kosovës me emrin kushtetues. Por sipas tij, një vendim i tillë ekziston tash e një vit, i marrë nga Qeveria e kaluar.

“Vendimi ka qenë në fuqi për më shumë se një vit. Ku mbeti reciprociteti për targat e veturave, e shumë të tjera, apo siç i ka quajtur vet Kurti, reciprocitet ekonomik, tregtar e politik”, ka thënë Krasniqi.

E sa i përket çështjes së taksës, sipas tij, qëndrimin më konsistent dhe më të mirë e ka mbajtur partia e tij.

“Është në vazhdimësinë e vendimeve gjysmake, ne ishim të vetmit konsistent që nga janari i vitit 2019, ishim që të pezullohet tarifa për 120 ditë, e nëse nuk do të kishte një marrëveshje për njohje reciproke, atëherë do të vendosej prapë. Kështu edhe do i merrnim parasysh rekomandimet e shtetit mik të Kosovës, SHBA-së”, ka shtuar ai.

Krasniqi ka përjashtuar mundësinë që PDK-ja të jetë në këtë kohë pjesë e Qeverisë, por ajo do të jetë pjesë e dialogut për normalizim të marrëdhënieve me Serbinë.

“PDK-ja gjithmonë ka qenë për të marrë pjesë në proceset që janë interes kardinal për Kosovën, edhe kur kemi qene në opozitë, edhe në kohën kur kemi qenë udhëheqës të qeverisë i kemi ftuar të jenë pjesë e procesit. Edhe në mandatin e kaluar i kemi ftuar, madje i kemi ftuar edhe ta udhëheqin këtë proces. Ne nuk kemi ndryshim të qëndrimeve tona. Në çështjet që lidhen me interesin e Kosovës, padyshim se PDK-ja do të jetë gjithmonë aty. Procesi duhet të mbyllet me pjesëmarrjen e të gjithëve”, u shpreh Krasniqi.

23:53

Krasniqi përjashton mundësinë që PDK-ja të jetë pjesë e Qeverisë së re, pa zgjedhje

Nënkryetar i Kuvendit nga radhët e PDK-së, Memli Krasniqi, në Interaktiv të KTV-së ka thënë se nuk do të jenë pjesë e kalkulimeve të reja për të formuar Qeverinë e re, derisa thekson se do të preferonin zgjedhjet nëse nuk do të ishte pandemia.

“Qëndrimi i PDK-së ka një vazhdimësi, qëndrimi jonë nuk mund të jetë i ndryshëm sepse zgjedhjet janë mbajtur më 6 tetor dhe qëndrimi ynë s’do të ndryshojë deri në zgjedhjet e ardhshme. Pozicionin tonë do ta vazhdojmë dhe do të jetë në dispozitat kushtetuese. Veseli sot ka takuar presidentin dhe ia ka bërë të qartë se s’do të jemi bazë e asnjë kalkulimi që synon pushtetin”, ka thënë Krasniqi.

Ai thotë se për shkak të pandemisë zgjedhjet në këto momente janë të pamundura, prandaj janë për një rrugëdalje tjetër të këtij ngërçi politik.

“Secila parti opozitare, po mundi kërkon t’i mbajë zgjedhjet edhe në javën tjetër dhe në këtë kuadër nuk mund të kemi ndonjë hezitim për zgjedhjet, por për shkak të gjendjes që gjendemi kjo nuk vlen. Askush s’mund ta thotë me një siguri të plotë se sa mund të zgjasë kjo gjendje e pandemisë. Është e pamundur të parashikohet se kur mund të mbahen zgjedhjet. Ne jemi për respektim të dispozitave kushtetuese që japin një rrugëdalje për këtë ngërç politik”, ka thënë Krasniqi.

Ai thotë se Qeveria Kurti e ka humbur shumicën parlamentare.

“Qeveria e ka humbur shumicën parlamentare. Thelbi i demokracisë ka të bëjë me krijimin e një shumice përfaqësuese në Kuvend. Janë deputetët ata që në një moment të caktuar mund të ndryshojnë qëndrimet dhe mund të synojnë të krijojnë një shumicë parlamentare. Legjitimitetin e përcakton Kuvendi. Ne nuk jemi të interesuar të bëjmë çfarëdo shumice të tillë”, ka thënë Krasniqi.

Ai thotë se Kushtetuesja nuk e përjashton që Qeveria të formohet në raundin e dytë.

“Ne jemi në pajtim me aktgjykimin e Gjykatës Kushtetuese. Kushtetuesja nuk e përjashton mundësinë që Qeveria të bëhet në raundin e dytë. Nëse e kemi situatën e njëjtë, që asnjë parti nuk shpreh gatishmëri ose vullnet për të krijuar Qeveri atëherë shkojmë në zgjedhje. Kushtetuta votimin e suksesshëm të mocionit të mosbesimit e konsideron dorëheqje. Te rasti Haradinaj askush nuk ka shprehur gatishmërinë që të krijojë Qeverinë, dhe nëse as tani s’ka gatishmëri atëherë zgjedhjet janë të pashmangshme. Por, ne nuk e dimë deri tani, e dimë vetëm për PDK-në se nuk do të jetë pjesë e një iniciative të tillë”, ka thënë Krasniqi.

Ai thotë se nuk kanë interesim që të bashkëpunojnë me ndonjë parti, përfshirë këtu edhe LDK-në.

“Secila parti mban përgjegjësi për deklarimet e veta. Ne asnjëherë nuk kemi shprehur vullnet që të kemi bashkëpunim me partitë që kanë dalë nga zgjedhjet e fundit”, ka thënë ai.

Ai ka kritikuar Kurtin, i cili ditë më parë në KTV kishte deklaruar se sikur të mos ishte pandemia në ditën e mocionit të mosbesimit do të kishte protesta në shesh.

“Ky mentalitet anarkisht është i gabuar, sepse askush nuk mundet të mendojë se me projeksione të protestimeve mund të zhbëjë vullnetin e qytetarëve që shprehet në zgjedhje, e pas zgjedhjeve atë vullnet e përfaqësojnë deputetët. Ideja se do të kishte protesta, edhe mund të kishte, por do të ishte presion ndaj deputetëve dhe kjo është shkelje e ligjit. Protestat janë legjitime, por ideja për të parandaluar zbatimin e vullnetit qytetarë që shprehet përmes deputetëve për mendimin tim është tendencë për dëmtimin e demokracisë. Në kuptimin e interpretimin kushtetues nuk mund të thuhet se është shkelje (ndryshimi i qëndrimit nga LDK-ja), sepse deputetët e marrin përgjegjësinë për të qenë zëri i qytetarëve”, ka thënë Krasniqi.