21:20

Osmani e Abdixhiku nuk e përkrahën mocionin për rrëzimin e Qeverisë Kurti

Kryeparlamentarja Vjosa Osmani nuk e ka përkrahur mocionin e mosbesimit ndaj Qeverisë Kurti.

Këtë e ka konfirmuar për Kohën një burim i afërt me të.

“Mund t’ua konfirmoj që Vjosa Osmani ka qenë kundër”, tha ky burim në kushte anonimiteti.

Kryetari i LDK-së, Isa Mustafa, pas mbledhjes së kryesisë së partisë, bëri me dije se partia e tij do të iniciojë mocion mosbesimi ndaj Qeverisë Kurti.

Këtë mocion nuk e ka përkrahur as ministri i Infrastrukturës dhe Ambientit, Lumir Abdixhiku.

Vendimi i LDK-së në Kryesi u mor pas veprimit të kryeministrit Albin Kurti për shkarkimin e Agim Veliut nga posti i ministrit të Punëve të Brendshme, dhe sipas Mustafës, prishjes së raporteve me SHBA-në nga mosheqja e tarifës.

Për këtë situatë, sonte në orën 21:30 Kurti pritet t'u drejtohet mediave nga Qeveria e Kosovës.

20:49

Abdixhiku abstenon në propozimin e LDK-së për mocion mosbesimi ndaj Qeverisë

Propozimin për mocion mosbesimi ndaj Qeverisë Kurti, nuk e ka përkrahur ministri i Infrastrukturës dhe Ambientit, Lumir Abdixhiku.

Të mërkurën mbrëma, në mbledhjen e Kryesisë së LDK-së, është votuar nisma për mocion mosbesimi ndaj Qeverisë, por Abdixhiku ka abstenuar. Këtë e ka bërë të ditur Abdixhiku për Kohën.

LDK-ja ka marrë këtë nismë, pasi gjatë ditës kryeministri Albin Kurti shkarkoi ministrin e Punëve të Brendshme, Agim Veliu.